بو شيخــــــة

قعدات تالي الليل


2/11/2011

اما انهم بطالية وماعندهم شغل،او انهم بينحاشون من حريمهم وعذرهم الاجتماع،لانه لي الحين ما ادري شنو سر تجمعاتهم تالي الليل،يعني ممكن يجتمع الحرامية تالي الليل علشان يخططون لبوقة بنك، او يسطون على بقالة،لانهم حرامية،وبين اللصوص والليل علاقة قديمة،بس الظاهر الزمن تغير،وبعض النواب صاروا عشاق ليل وظلمة!
تالي الليل يجتمعون،ويسربون اخبار،وانهم بيكسرون الدنيا،وانه حنضرب بالمليان،وانه راح نشق شقوق ما تخيط،وانه راح يكسرون الطوف ،وانه البيان الي بيطلع بس السطر الاول منه راح يحرقون فيه نص الحكومة،وعلى اخر البيان يمكن يحتلون اميركا!
نواب جلسات تالي الليل وبعد نطرة من الناس،والاذاعات، والكونغرس الاميركي، ومجلس الدوما الروسي،ومخلين اوباما ما ينام بسبة بيانهم، آخر شي يطلعون ويستحبون واحد واحد،والبيان يمتخض ويتمخض و«يلد فارا» والفار هم يطلع منتف ماله خلق نفسه!
نواب من طلب الكرسي سهر الليالي، من كثر ما نفخوا في روحهم، وسووا روحهم ابطال،وانه كل واحد يقدر يشيل ثور على زنده ويمشي فيه من الضاحية لي ام الهيمان، بسبة بياناتهم اكتشفوا الناس انهم ابطال من شرق وروق، لا يهشون ولا ينشون، لا عندهم قرار،ولا شورهم بايدهم،ولهذا السبب اكثر ناس طايحين تشلخ بنواب المعارض اهمه ربعهم،والي طول الاشهر الي فاتت كانت تشجعهم، واكتشفوا فجأة ان نوابهم يموتون على الكرسي الاخضر، ولو تمسح الحكومة فيهم القاع هم راح يظلون على كراسيهم،يعني بالمختصر النواب طلعوا صوت بدون صورة!
twitter.com/bushi5a