كاتب مقال.. بس تجاري

18/2/2010
الصحافة في الكويت عرفت كتّاب مميزين ولهم ثقل في كل حرف يكتبونه..وتلاقي اصحاب القرار من صباح الله خير يدورون مقالاتهم ويقرونها ويحمدون الله اذا ما حاشهم طشّار او انتقاد..من هالكتاب فؤاد الهاشم ونبيل الفضل في الوطن وعبداللطيف الدعيج ومحمد مساعد الصالح في القبس وصلاح الساير وصالح الشايجي في الانباء وجعفر رجب وسعد المعطش في الراي.. وغيرهم من الكتّاب في الصحف الخمس القديمة..اما صحافة اليوم اللي صارت خمستعش وزود برز في الآونة الاخيرة العديد من الاسماء منهم صالح الغنام في «الرؤية» وحسن الانصاري وكتاب من الوزن الثقيل في «الدار» وعلي الزعبي في «اوان» واحمد بن فهد في «الصباح» وفيصل البيدان في «عالم اليوم».. لهم اسهامات كبيرة في مقالاتهم ولهم آراء مهمة وزينة ومفيدة للوطن والمواطنين والمسؤولين..وفي غيرهم يحاول بكل جدارة يبرز تلاقيه بمقال يكسر الدنيا وفي مقال مو ذاك الزود.. وهذا شي جيد ويحسب لهم ومطالبين بالتطوير بين فترة وثانية بطرق القضايا المهمة واللي تكون قريبة من الواقع..اما في نوع من الكتّاب فمالهم لا في العير ولا النفير..مضيعين مشيتهم ومشية الحمامة..نوبة تشوفه ليبرالي ونوبة اسلامي ونوبه ماله لا لون ولا طعم..يكتب عن البلاليط والاستخبارات ويدز حق روحة ايميلات ويرتز بالمقاهي على ما ميش..وفي اللي يقلد او يحاول يقلد الكتّاب الكبار فتلاقي نبيل الفضل بس لابس شماغ او عبداللطيف الدعيج بس حاط سكسوكة..وهلمجرا..وابلغ دليل في اكثر من كاتب يقلدون فؤاد الهاشم.. تحوشهم الانفلونزا بالجذب ويسافرون الاردن ويكتبون انهم رايحين باريس.. شي غريب عجيب..ماخذين في نفسهم ابو المقالب كلهم.. هيك كتّاب ودك ترجعهم ببطون امهاتهم وتفتك من اقلامهم اللي تشابههم.. يذكرونك بالمرسيدس اللي بالبشر مثل فؤاد الهاشم وبالمرسيدس التجاري اللي مثل بعض الناس..وسلم لي على قانون المطبوعات اللي طلع لنا عاهات بيدها قلم وتشخبط شخابيط.

• كلمة راس
العنصر النسائي في الكويت من كاتبات يهبلون..حتى مفرداتهم تهبل مثلهم..والرقة تقطر منهم ومن كلامهم المكتوب بالعسل الممزوج بحب الكويت..يا حلاة كاتباتنا..وجبح للكتاب اللي واحدهم مثل شيبوب ويبي يصير عنتر..