ملعب بـ 9 ملايين بس

14/2/2010
قبل ايام، سمعت عن مؤتمر صحافي بمناسبة تأخر افتتاح استاد جابر لثلاث سنوات، وطبعا تحدثوا ووضحوا وقالوا بانه افضل استاد، وانه مقارنة مع الاستادات الشقيقة، تكلفته رخيصة، ومرة قالوا غالية! وانه مواقف سياراته كثيرة مقارنة مع الشقيقة.. المهم كل ما قالوا شي قالوا الصديقة والشقيقة، وانا قلت خلني ادور على الشقيقة والمعلومات في النت ببلاش، واشارككم المعلومة!
استاد «عش الطائر» تذكرونه، اللي اقيم فيه اولمبيا بكين، هذا الملعب الرائع كلفهم 442 مليون دولار يعني 100 مليون وشوي دينار بس هذا مو سعر الاستاد، هذا سعر بقية المرافق اللي بنيت معها، من مواقف سيارات مظللة، وصالة، ومسبح، يعني اشبه بمدينة اولمبية، بنفس سعر ملعبنا بعد الاضافات!
استاد «الارينا» في ميونخ، اجمل استاد في العالم، بنوه بـ400 مليون دولار ايضا بمرافقه، مبنى للسيارات تحمل 18 الف سيارة، مو 6 آلاف!
«سوكر ستي» في جنوب افريقيا الذي سيقام عليه نهائي كأس العالم بـ370 مليون دولار وفيه مكان لـ15 الف سيارة وهذا اقل من سعره المعتمد بـ139 مليون دولار، يعني وفروا المبلغ ولم يضيفوا!
استاد الملك فهد تسع مواقفه 26 الف سيارة!
هذه احصائية لمن يقول ان كل الملاعب الشقيقة ماعندها مواقف للسيارات مثلنا، وغالية، وراح اضيف لكم هالمعلومة الغريبة!
سورية دولة شقيقة، هذه الشقيقة افتتحت استاد حلب الدولي سنة 2007 ويتسع لـ70 الف متفرج وحصل على شهادات اولمبية، وبني كله باشراف شركات اوروبية متخصصة، ومجهزة باحدث الاجهزة المتطورة.. كم كلفهم؟ كلفهم ياشباب اقل من تسعة ملايين دينار.. ما اكذب روحوا بحثوا وشوفوا!
هذا كلام الارقام، وسوالف الارقام، فرجاء، ما يحتاج جماعة الهيئة والشؤون يقعدون ويبررون لغيرهم، ويبربرون على راسنا، لانه كل شي مكشوف، بس المشكلة في اللي يسوي «مؤتمر صحافي»!