وزارة قطعة ثلاثتعش

15/2/2010
من مميزات ديرتنا العزيزة، انه كل شي متوفر والحمد لله،. تبي سيارة، طيارة، قطار، لبن التيس، ريش الفيل، متوفر! انت بس اشر ويوصلك لي عند الباب، حتى الممنوعات صارت متوفرة، شلون توفرت وهي ممنوعة؟ لأنها ممنوعة فتتوفر بكثرة، تذكرون قبل، الناس كلها تحط عطر تشارلي الاسرائيلي، وتاكل كاكاو «فليك» أكثر من الحين.. لأنه ممنوع!
والمواضيع هم متوفرة في هالديرة، والكاتب ما يقعد يتعب نفسه يدور على موضوع، بس يبطل الجريدة يشوف خمسين ألف موضوع يتكلم عنه، طبعا خمسين ألف مبالغ فيه، يعني تسع أوربعين الف موضوع بس!
نفتح الجريدة ونتكلم عن التربية مثلا، وزارة الحريم، نسميها حريم مو تطنز عليهم لا طبعاً، بس لأنه صج كله حريم، بس عاد ياريت الحريم يديرونها عدل لا طبعا! من يوم ما حطو النظام الموحد وتطوير المناهج والناس دايخة، والطلبة المساكين دايخين، ما يدرون وين يروحون، وشنو يسوون!
قالوا بنقضي على سلبيات نظام المقررات والعام، شنو صار؟ جمعوا بلاوي النظامين وحطوه في الموحد، قبل الطالب يعيش رهبة امتحان آخر العام، قالوا شنو بدل الامتحان نسوي له امتحانين بالسنة ولجان وكنترول ومراجعة وامتحانات.. وطبعاً لازم الامتحانات تتسرب مثل كل سنة!
بس أحلى شي درجاتهم، تصدقون لو تسألون اي مدرس او ناظر أو حتى الوزيرة كم الدرجة النهائية مثلا في مادة علم النفس؟ طبعاً اللي يقول عشرين واللي أربعين واللي خمسين.. لا طبعا! الدرجة من 39 شلون؟ ما أدري أهو جذي! ومادة الحاسوب من 13 درجة، بالله بذمتكم في احد يحط درجات بهذه الطريقة! حتى الدرجات مو عارفين يحطون، على سوالفهم يذكروني بـ «أبلة» عطيات وقطعة ثلاثتعش!