مطعم الأمة

2/2/2010
ماني شايف داعي للضجة اللي أثاروها بعض النواب والكتّاب حول دعوة مسلم البراك للصحفيين البرلمانيين للغدا على حساب الكاتب نبيل الفضل.. بالعكس هذا أمر مشروع وما فيه أي مشكلة.. والدليل على كلامي أن مآدب الغداء والعشاء والإفطار تقام برعاية الحكومة للكل من نواب ووزراء وصحفيين وفراشين للمجلس.. مو هذا بيت الأمة؟ مو هذا بيت الشعب؟ بالتالي ما فيها شي اذا كل نائب تبرع بجزء من راتبه وحط حطة مع ربعه النواب وعملوا غدا أو عشا للصحفيين.. مو احنا بزمن العجايب؟ مو هذا خيار الأمة واختيار الشعب؟ بعدين تعالوا ياللي معترضين وقولوا لي ما حرككم الا هالغدا؟ وينكم عن الممارسات اللي تصير بالمجلس والا تبوني اذكركم؟ بيت الامه مرتع لكل بنغالي يسرح ويمرح بكيفه ولا حسيب ولا رقيب.. أذكركم بدخول الدكتور عمران القراشي يوم انخش بالمجلس بمكتب نائب ولا أحد درى عنه لا حرس ولاهم يحزنون.. تبون اللي ألعن وأدهى وأمر من غدا مسلم البراك على حساب نبيل الفضل؟ قوانينكم يا نواب الأمة اللي مالها لا لون ولا طعم.. هذي الرياضة وقفت بسبب قانونكم العور.. هذي غرفة التجارة تسرح وتمرح ولا أحد حولها.. هذي قوانين العمالة والمعاقين والبدون تلوع الجبد ولا همكم الا غدا مسلم على حساب نبيل؟ أي نعم أنا ضد ان النواب يحولون المجلس لمطعم والخوف كل الخوف ان بعد جم يوم الرومي تكبر براسه ويسوي حفل استقبال حق عيال بطنها بقاعة عبدالله السالم.. والخوف ان سيد عدنان ياخذ بخاطره ويسوي الأربعين بقاعة الوزرا.. وتعال عاد فك روحك.. السلف يبون والإخوان يبون وحلني عاد ذيج الساعة.. أما سالفة مسلم البراك العمية فأنا انتظر تصريح اللي يمشي ويقول الا الدستور.. أشوفه ساكت..

• كلمة راس
عزيزي المواطن الكويتي ثلاثة امور حاول انك ما تورط نفسك فيها.. بنيان بيت العمر لأنه يذبحك بعز شبابك.. وتجديد الليسن لان السكر راح يطلع من خشمك.. وتجديد رخصة محلك لان «الغرفة» بتاكل فلوسك من هالشق لي هالشق..