نعم.. الكويتي على راسه ريشة

1/2/2010
وايد اسمع هالكلمة من الناس..ساعات اسمعها من أم تقول حق ولدها اللي ما يبي ياكل من طباخة امه ويبي يطلب من برة تقول له امه..ليش يعني على راسك ريشة؟ وفي كثير من المواقف تتكرر وينطبق عليها هالمثل او هالمقولة..اما سالفة الكويتي على راسه ريشة..فسمعتها مليون مرة يمكن واكثر من وايد ناس داخل الكويت وبرة الكويت..يعني بالخليج تسمعها بين فترة وفترة اذا رحت الحدود البرية مسافر وتحلطمت يقولوا لك..انتظر حالك حال الناس والا يعني على راسك ريشة؟ وفي حوارات تصير بين الكويتيين اللي يدرسون بره او يتعالجون اذا طلبوا طلبات نوعا ما خاصة يقولونها لهم اهل الديار ذيج..شنو انتو فوق راسكم ريشة؟ آنا اللي اسمي بوشيخة اعلنها بكل ثقة بالنفس وبكل جرأة..نعم نعم نعم نعم كل كويتي على راسه ريشة..تدرون شنهي الريشة؟ صباح الأحمد ريشتنا..صباح الاحمد اللي استحق الامارة عن جدارة واستحقاق ..صباح الاحمد اللي بايعه الشعب رغم الفراغ اللي صار في ثمان ليالي..نعم الشيخ صباح الأحمد الجابر المبارك الصباح ريشة على راس كل كويتي..عزنا من عزه وقدرنا من قدره..ويحق لنا نتبختر بكل مكان بثقة وعزة وفوق راسنا ريشة اسمها الشيخ العود صباح الأحمد الله يحفظه..

• كلمة راس
اللي يقول ان الاربع سنوات الماضية عدت بدون انجاز يذكر! اقول له بملء الفم..كل هذا الحراك السياسي وخطة التنمية وزيارات الرؤساء والمؤتمرات الخاصة ووضع الكويت الخارجي المتطور وما كو انجاز؟ كافي علينا اميرنا بو ناصر من هالشي نعرف ان انجازاته تحجي قبل لا يتكلم احد عنها..الله يحفظك يا شيخ الصباح والكويتيين كلهم..