مرزوء اي ده يا مرزوء

17/1/2010
جميل جدا لمن رجل الاعمال يعلم اولاده التجارة ويشوفهم تحت عينه يمارسون اللعبة على اصولها.. وحلو كتير كتير اذا يفرغ لهم واحد يجابلهم خطوة بخطوة عشان يعلمهم ويدربهم ويكبرهم بالمال والاعمال.. وصاحبنا المعزب العود حط ولده مرزوق عند جم جمبازي ومطبل علموه الفتونة والبلطجة فتلاقيهم يحطون يدامه نساف ويقولون له مرزوء اي ده يا مرزوء.. فيجاوبهم ويقول لهم هذا بانشي.. ومع انه غلطان بالاجابة يصفقون له ويقولون له برافو ياسعادة البيه دن انته جدع وبتفهمها وهيا طايرة.. ومع الايام مرزوق صدق عمره وانطلق على ارض الواقع بمنطلق مرزوء اي ده يا مرزوء.. فتلاقيه يسمي الهمبرجر فلافل والطعمية كلوب ساندوتش وهلمجرا.. المصيبة العودة ان هالمرزوء يدش السوق ويسوق العبط والولدنة على العالم ويحسبهم مثل ربعه كل شي يصير وكل شي تمام يا افندم.. وتحصله يمين شمال يبي يناشب العالم على حلالهم ويشوف الاربعة بالامية تسعين بالامية.. وفوق كل هذا يلعب دور الصانع على حشيش مبيوق.. ويبيع دياي مضروب على انه خلطة سحرية.. لغاية ما دعم الطوفة واصطدم بناس مقطعة السمكة وديلها.. ناس مفتحة باللبن.. ان جيتهم بالطيب مشولك طيب واكثر.. وان جيت تستكردهم طقوك على راسك.. فيا مرزوق طق بريك احسن من الوسايط اللي تقاعد تطرشها.

• كلمة راس
ترى احنا ما نشرنا للحين ولا شيء.. ويا مرزوء افهم ان حلال الناس مو محللك.. لا انت ولا غيرك..واذا انت كنت تعتقد ان فيه ناس سكتولك.. مو كل الناس تسكت عن حقها.. وبيننا سوالف عمية وملفات تترس هاف لوري.. ويصير خير.