عبدالله الرومي .. بدون

10/1/2010
حلو ان الواحد يكون عنده مبدأ وموقف ما يتزحزح عنه..والأحلى لما يكون هالموقف ياي من قناعات مؤطرة بالقانون والشرع والمنطق..والحلو الأحلى ان هالمبدأ والموقف ينسجمون مع حوادث شخصية يكون فيها المستفيد الوطن..تعالو معاي نشوف ونغوص ونتعمق بالنائب السابق ونائب الرئيس الحالي الأخ المناضل ضد قضية البدون المحامي الاستاذ المرشح السابق اللي سوى فرعية طائفية الهزبر عبدالله الرومي..هذا الرجل سليل عائلة كويتية محافظة..تحب الخير..تعطف على الفقير..فيها رجال اكفاء..منها المفكر والسياسي والطبيب..وقبل كل هذا عائلة الرومي فيها كم انسانية لا يوصف..بس حكمة الله سبحانه وتعالى..بدل ما نشوف حسام الرومي هذا الانسان الكبير بأخلاقه العظيم بإنسانيته عضو يمثل آل الرومي والامة الكويتية بالمجلس..طلع لنا عبدالله الرومي وقام يسوّق لنفسه..كواحد تفوح منه رائحة العنصرية..واحد يطق بوجهل عشرة صفر في الجانب الانساني..قسى على نفسه قبل ما يكون قاسي على البدون..والا بذمتكم اكو واحد يخوض انتخابات الرئاسة ويفشل ويرجع يخوض انتخابات نائب الرئيس وينجح بأصوات الحكومة وتترجون منه شي؟ المصيبة ان عبدالله الرومي متناقض بمواقفه وخصوصا الدستورية..تشوفه يخربط ويهرف بما لا يعرف عن الدستور واهو مشلخ مواد الدستور..يستثمر كل المناسبات علشان يقول لنا ان البدون مرتزقة..ان البدون مستفيدين..ان البدون مو أوادم..ويجمع ولا يستخدم كلمة البعض! هذا وانت محامي جذيه كلامك عيل لو انك كوولي شتقول؟ والله يمكن الكوولي اللي يشيل الاسميت على ظهره عنده انسانيه اكثر منك..حشا ما انت من الرومي في شي لأن عائلة الرومي نعرفها زين ونبخصها عدل..ناس ايواد ناس تقطر منهم الانسانيه..وبعدين تعال..هل في بينك وبين البدون سالفة ما نعرفها؟ لكن تدري شلون روح..عساك تنام وتصحى وما تلقا ولا وثيقة تثبت انك كويتي..وساعتها بنشوف شلون بيصير وضعك..جبح نائب رئيس.

• كلمة راس
لغز: كاتب طويل أجلح أملح..يكتب حسب الطلب..على قياس المعزب..مل من الرينج روفر الظاهر يبي بنتلي..يهاجم زملاءه الكتّاب..يتعثر باللقاءات..اذا شسمه ببيروت يقول شعر عنتر..امس بو صلوح الغنام طقه طراق على عتراه..وقبل يومين زفه خلودي بسبب مقال ماصخ..اول حرف من اسمه (المهرج)..