شاء الأمير وشئنا معه

20/1/2010
سقطة يديدة للنائب فيصل المسلم اللي عسى ما شاف مايكروفون إلا ونسى عمره وصار يقول كلام ماله لا لون ولا ريحة ولا طعم.. الغريب انه دكتور والله يبا أنا بدا يداخلني الشك بمدى صحة وضعه كأكاديمي.. المصيبة انه شكله يدل على التقى والورع والدين.. لكن صرت أشك بأنه مثل أهل بولندا بيض وحمر من الحقن.. المصيبة الكبيرة انه كويتي ربا على تراب هالأرض الطيبة اللي ترفض الفتنة وهذا شك ثالث بأنه أفكاره مستوردة من بلاد حكمتيار وربعه.. وفوق كل هذا الأخ عضو بمجلس تشريعي؟ ويفترض فيه يمثل الأمة بأسرها ويطلع لنا ويخالف بالعلن أقوال وأفعال صاحب السمو وولي الأمر.. شي غريب عجيب.. ليش ولمصلحة منو كل هذا يا فيصل؟ كل هذا حب للعريفي اللي يمجد صدام المقبور الله لا يرده.. اللي هتك أعراض خواتك الكويتيات؟ كل هذا علشان دكتور معتوه فكريا.. كل هذا علشان اللي يتهم رجال الدين اللي لهم فضل على الكويت إقليميا؟ أفا يا فيصل ما هقيتها منك وكنت معتقد انك رجعت للصواب لكن روح عسى الله لا يوفق كل من يحاول يهمش دور أهل الكويت اللي بنوها بدمهم وعرق جبينهم.. الحين صارت الكويت دولة سنية؟ وين مكتوب هالحجي ووين قريته؟ بدستور المجلس الوطني؟ والا علموك اياه بالمدرسة بخيطان؟ والله كبيرة هالكلمة وما لازم تمر مرور الكرام.. ووجب على المسؤولين بالديرة محاسبتك.. يا ليتك طلعت على خوالك آل الحمد الكرام اللي لهم وشائج نسب وتجارة مع اهل الكويت كلهم شيعة وسنة وبدو وحضر.. ليتك أخذت منهم مكارم الأخلاق وقريت تاريخهم المليء بالعمل الحر مع كافة أطياف أهل الكويت.. الظاهر اللي يحركك من الخارج دفعك لقول مثل هذا الكلام اللي لازم ترجع عنه وتعتذر.. كل هذا يهون إذا كانت زلة لسان منك.. لكن إذا كنت تقصدها ومتمسك فيها فأبشر بحرب من الله ورسوله اللي حرموا الفتنة وحرموا التفرقة بين الناس.. شي غريب انك تكون عضو بمجلس الأمة ويكون هذا كلامك.. والشرهة مو عليك على كل واحد من النواب يسكت عنك يا فيصل.. وإذا ما اعتذرت في قادم الأيام لنا وقفة معاك نرجعك فيها للحق لأن الكويت وأميرها وشعبها أكبر من انك تفرقهم في وقت كلنا محتاجين للوحدة الوطنية.

• كلمة راس
هذا نداء مني لكل كويتي غيور.. وقفتك ضد تصريح فيصل المسلم واجب يحتمه الدين والمواطنة.. واللي يسكت عنه مشاركه برأيه.. وننتظر المزيد من الإخوان العقلاء للتدخل ولجم هذي الافكار.