مرزوق وفرق الــ 4 في المئة

18/1/2010
في فيلم وثائقي عمله مخرج كويتي وفاز بكذا جايزه اسمه فرق الــ1 في المئة وكان يبي يقول لنا في فكرته ان بين الانسان والشاذي فرق بسيط جدا.وانا من عنوان الفيلم خذيت الفكرة وراح اطبقها على ابن المعزب مرزوق.. لانه الله عطاه شوية طول شاف نفسه يفرق عن العالم وساق فيها وصار طنطل التجار.. طبعا الطنطل أول يخرعونا فيه وحنا صغار.. ومرزوق الطنطل عاش الدور وحسباله التجار بيخافون منه بس لأنه طويل..هذا اول فرق.اما الثاني فالله يسلمكم ان ولد المعزب مرزوق شاف انه شعره طويل وما يحاتي الصلع فقال بينه وبين روحه خلني اتعلم التحسونة بروس القرعان ماني خسران لانه شعري طويل مثل طولي.. اما الفرق الثالث انه مرزوق ولد المعزب متقمص دور العصبي اللي ما يرد على احد بتاتا.. فدش بصوته الجهوري وقام يصارخ يمين ويسار فاعتقد ان الناس انخشت منه وما تقدر تواجهه.. الفرق الرابع يا جماعة الخير ان الاخ مرزوق الطويل بالجسم والشعر صاحب الصوت العالي على الهبني.. شاف ان الجماعة اللي دايما يقولون له تمام يا افندم ويصفقون له فصار عنده احساس ان مخه اكبر من مخ بيل غيتس فصدق عمره ومشى على هالامر لين طاح بالغلط..لكن قبل جم يوم مرزوق اكتشف فرق الــ4 في المئة لما حصل له ناس اطول منه بالكلام والفعل، وشاف بعينه ان الشعر الطويل ما يفيد جدام مقص ما يرد على اكبر شارب اذا جاسو حلاله.. وعرف عدل مدل صوته الجهوري ينفع حق تخريع بتوع تمام يا افندم وما يصلح يدام اصحاب الحق والحجة الواضحة والصوت المنطقي.. واخيرا اكتشف أن مخه مركب يسار من اكل الدياي المنتهي.. فدعم الطوفة اللي صحته.. لكنه لي الحين يكابر مع انه اكتشف ان كله على بعضه ما يسوى الا 4 في المئة بس لي متى بيكابر ويتحمل؟ باجر اقول لكم.

• كلمة راس
في تحت ايدي ثلاثة ملفات واحد لونه اصفر يخص البلدية، والثاني لونه برتقالي يخص لجنة مهمة، والثالث لونه أخضر يخص املاك الدولة.. راح افتحهم بشويش، والمفاجأة ان الملفات الثلاثة فيها اسم مرزوق واسم واحد من جماعة «مرزوء اي ده يا مرزوء» واذا كان مرزوق بو أربعة بالمية يعتقد انا بنتبلى عليه.. خله يطلع ويقول انشروا الملفات.. وبنتحداه!