استاد جابر

25/1/2010
وجب احترام اي مبنى او مشروع يحمل اسم رمز من رموز الكويت سواء كان رمز سياسي او اقتصادي او رياضي او رمز عام قدم للكويت في مجاله الكثير...شلون اذا كان هالرمز اهو الشيخ جابر الأحمد الله يرحمه ويغمد روحه الجنة... هذا الرجل اللي قدم للكويت من عمره وجهده وعقله الكثير..هذا الرمز اللي اجمع العالم كله على تخليص الكويت بسبب مواقفه وكرمه وطيبه واخلاقه..هذا الرجل اللي بحكمته بنى الكويت وخلاها بمصاف الدول الكبيرة.. معقولة يا ناس؟ آخر عمرنا يصير فينا هالشكل.. مشروع حيوي يخدم شباب الكويت الرياضي ويخدم اهل الكويت اللي يحبون الرياضة.. لي الحين هالمشروع ما خلص؟ وفوق كل هذا يحمل اسم ابونا جابر الله يرحمه.. يصير جذيه؟ يعني لو الشركة مو كويتية جان طوفناها وقلنا عادي شركة اجنبية ومحد هامها..لكن المصيبة ان الشركة كويتية ومو اي شركة بعد..شركة لها اسم كبير..لكن نرجع ونقول ان اليهال الطوال ما خلوا شي زين نذكره.. والا مشروع مثل استاد جابر تتعدل ميزانياته ستين مرة ويتركب له حشيش دايخ وتتغير حماماته ثلاث مرات بسبب ولد المعزب مرزوق بو 4 في المئة؟ هذا الولد الطويل ما حط ايده بشي الا اخترب.. يحسب نفسه ذكي واهو والغباء على موعد..يشوف ان شغله عدل وآخرتها الملعب عوي؟ مو قلناها لكم مليون مرة عطوا عيالكم مشاريع ما عليه وخل يستفيدون من اموال المناقصات بس عطوا عيالكم السنعين مو الدايخين..واحد مثل مرزوق بو 4 في المئة حده حده وان ذبح عمره يجابل فروع الدياي ويطمن على الشعير ويفكنا..الناس ملت تبي تشوف افتتاح استاد جابر..ماتبي تشوف مرزوق بو 4 في المئة كل يوم مسوي له جولة بالملعب، يعني قاعد يشتغل..

• كلمة راس
اليوم عطيتكم نبذة ومقدمة لمشروع استاد جابر..ومع الايام راح احط لكم بالوثايق تقاعس مرزوق بو 4 في المئة وربعه مع الهيئة العامة للرياضة في تعديل وتكسير استاد جابر كل ما اشتهو..وهذا فيض من غيض.. والقادم اعظم..وغطيني يا صفية بالاربعة بالمية.