قولجي وحكم ومهندس.. وحكم المحكمة

26/1/2010
مصيبة كبيرة لما تكون الرياضة ومصيرها بإيد ناس مالهم شغل فيها موليه.. الأول كان ولا يزال قولجي فاشل حد يحوشه يقول (رايت) حق الدفاعات وتالي الكرة بالمقص.. وبعد ما افتكينا من شره بالملعب كقولجي بوربع قط الكرة وقضب قلم وقام يشخط فيه يمين ويسار بأخطاء إملائية وتعبيرات منتهية وجمل ما أنزل الله بها من سلطان.. الظاهر يكتب واهو منسدح على بطنه كالعادة لأنه قولجي على قولة جماعة اللوبي.. أما الحكم اللي كان يحكم في الستينات والسبعينات أيام فاول الدشداشة وأيام البلنتي عن سبع قوال.. وأيام ثلاثة كورنر بقووول.. طلع علينا بعد ما كان حارس الأبراج والواجهات البحرية.. وصار منظر وقانوني وقيادي ونائب رئيس.. يا عمي انت حدك حكم مفهي تصفر بأصابعك.. ياينا الحين تحل مشكلتنا وتشخصها ومسوي روحك كلش؟ مو كافي اجتماعاتك بالوكالة وتغيير مواقفك اللي مالها لون ولا طعم وريحتها فايحة.. أنا أقول اذا تبي ترجع تحكم روح حق خالد الروضان بو ناصر يخليك تحكم بدورته.. أما المهندس المعجزة.. فيعتقد أن كل شي بالديرة ملكه ويقدر يتصرف فيه.. ترجى الشيوخ وحب خشومهم لين رزوه بالنادي وتالي انقلب على الشيوخ اللي دعموه معنويا لانه مادياً مو قاصر.. المهم انه دش الرياضة وخلطها بالسياسة.. ومن اسباب هالثلاثة اللي غرروا الشارع الرياضي محد راح يدفع الثمن غير الشعب الرياضي.. وكالعادة مالنا إلا الشيوخ يردون لنا هيبة الرياضة مع الشرفاء.

• كلمة راس
لما القضاء حكم بصحة حل نادي القادسية طلع مرزوق علي وقال (هذا الحكم وسام على صدر الجزاف).. ودي اعرف حكم الأمس اللي طلع بإلغاء قرار حل نادي الفحيحيل والشباب وسام على صدر منو؟ وبيحط المسؤولية برقبة منو؟