قائمة بأسماء الممنوعين

27/1/2010
لأن الوضع خرطي وكل نائب يبي يمنع اللي مو عاجبه من دخول الكويت.. أنا قررت أسوي مثلهم وعندي قائمة من الممنوعين من دخول الكويت أتمنى من وزير الداخلية ينفذها بأسرع وقت..
-1 لاعب منتخب فرنسا 1982 بلاتيني لأنه شلخ دفاعاتنا بكأس العالم.
-2 الممثل توم كروز لأنه إذا دخل الديرة راح ننكشف من الجكر.
-3 المطرب سعد الصغير لأنه غنى بحبك يا حمار وما غنى عن الثور.
-4 المقاول بو عوضين لأنه بنى غرفة التجارة بدون ما تكون مرخصة.
-5 الدكتور هيثم اللي اكتشف علاجاً لمرض الحنجرة وخلا النواب يلعلعون.
-6 ديفيد لانكوم اللي تلفنا بالميك آب وخلا حريمنا يستخفون.
-7 جوزيف بلاتر رئيس الفيفا لأنه ثولنا بقراراته.
أما اللي ودي تمنعهم من السفر من الكويت فهم التالية أسماؤهم:
-1 كل كاتب بيروح بيروت علشان لا يشوف الحرية ويتعلم ويأذينا بمقالاته.
-2 بعض أعضاء اللجنة الانتقالية علشان لا يحرجون الحكومة بسوالفهم.
-3 النواب كلهم إلا بو عبدالمحسن وبوفيصل.
-4 مرزوق بو 4 في المية لأنه الدياي تتبيلته خرطي مو شي ويبوق حلال الناس.
طبعا الشعب الكويتي كله ممنوع من السفر لأنه مديون.. فبالتالي ما يحتاي تحط لهم منع سفر.. وسلامتك وتعيش يا وزير الداخلية.. واذا ما نفذت هالطلبات لي راح أسوي مظاهرة وأطالب الشعب يوقعون على استجوابك.. كيفي كويتي..

• كلمة راس
حليمة رجعت حق عادتها القديمة.. وتبي تقدم اقتراحاً بعقد الجلسات بدون الحكومة.. أنا ماني عارف هذا شلون صار نائب؟ أو انه قاعد يستعبط علينا؟ أو يمكن الخبير الدستوري ماله من أيام المجلس الوطني اهو اللي موصيه يقدم هالاقتراح..عجبي.