الدكتور المتحسف

19/1/2010
شباب منو قرا للدكتور الكبير العظيم الوطني المنصف؟.. انا قريت له!
الاخ شكله متحسف، وقام يسوق بسيارته «رونغ سايد»، ويطوف الاشارة الحمراء، ويطق الرصيف، ويقول بلاها ثقافة وفكر ووطنية، وارجع حق ربعي، اطب معاهم في الهوشة، وافزع لهم، قبل لا اطلع من المولد بلا حمص، عاد شنو علاقة المولد بالحمص ما ادري، هذا مثل وخلاص!
قبل كم يوم كتب مقالة «ارفع راسك يا بدوي» وسوالنا فيلم طويل وعريض، وكأنه البدوي الوحيد في الديرة وممثل عن القبائل، مع ان القبائل من زمان مرفوعة راسهم وما يحتاجون اي كلكجي بتاع الثلاث ورقات - ما اقصد طبعا الدكتور- يقص عليهم بشوية كلام علشان يصعد على اكتافهم!
خلصنا من مقالة رد كتب مقالة عن مركز وذكر وطاح في وزير الاشغال الدكتور فاضل صفر مع انه ما له شغل بالموضوع، ودخل الحسينيات بالسالفة، شنو علاقة المركز بالحسينيات محد يعرف، والاخ ما يدري شنو الحسينيات، وما يدري انها جزء من تاريخ هالبلد، وكان مكان يجتمع فيه الكل، سنة وشيعة!
بس أنا بسأل الدكتور الفاهم كم مرة سمعت انه في حسينية سوت طائفية ضد السنة، او سبوا الصحابة مثل ماي يقولون ربعك.. ان اقولك ولا مرة طول تاريخ الحسينيات في الكويت، ولا احد سوى مثل صاحبك!
ما يخالف دكتور يمكن تفكر تنزل انتخابات وتبي تنجح باي طريقة، يمكن عندك مصالح معينة هم كيفك.. تبي تفزع على كيفك.. قول انا طائفي وقبلي يا قلبي، محد يهاوشك ولا احد راح يمر صوبك، بس عاد لا تمثل علينا شغل المثقفين اللي يتكلمون عن الوحدة الوطنية وكل واحد بقلبه عنصرية ما تشيلها البعارين!