شياطين الإنس

29/9/2009
عندي لكم قصة عن كاهن خلّص دوامه بالكنيسة شال أغراضه علشان يرجع البيت.. واهو بالطريج شاف له واحد طايح براس العاير وينزف دم.. ولأنه الكاهن ديّن ويحب الخير بادر ورفع الريال.. وقال له شفيك؟ فرد عليه وقاله واحد طقني بالسجين وانحاش.. طل الكاهن بويهه وسأله انت شكلك غريب مو عيال قريتنا.. قال له اي نعم انا الشيطان؟ عصب الكاهن وقطه من ايده بيتركه.. هني ضحك الشيطان وقال حق الكاهن.. يا معود تعال انقذني لانك بدوني مالك لزوم موليه.. انا اسوي الشر وانت تسمع خطايا الناس وهلمجرا.. اقتنع الكاهن وشال إبليس لعنة الله عليه ووداه المستشفى.. الشاهد بهالسالفة يا قرائي الحلوين.. والسؤال اللي يطرح نفسه جم مرة عالجنا الشيطان بدون ما ندري انه إبليس؟ جم شيطان عندنا بالكويت؟ طبعا من شياطين الإنس.. لأن شياطين الجن علمهم عند الله ومو من اختصاصنا.. أنا عن نفسي أعرف شياطين كويتيين.. بعضهم بالتأسيس وبعضهم بالتجنيس.. وبعضهم لاعبين بإيدهم وريولهم.. مشلخين أهل الديرة تشلّخ.. ويطقون إبليس اللي من الجن عشرة صفر بالخبث والدهاء.. ومستعدين يسوون شقلبة وما تطيح غترتهم عن راسهم.. أو يكون ما عندهم شغل غير تربيط العصاعص، هذولا نماذج مو أكثر لشياطين يدشون علينا بكل مكان.. ديروا بالكم منهم.. وصج ان وجودهم ضروري على قولة القايل.. لكن حيلكم فيهم طقوهم حاربوهم لعنوا خير خيرهم.. هذا انا حذرتكم ولا تصيرون مثل الكاهن.. دوسوا عليهم لأن الكويت وآل الصباح وأهلها الطيبين ما يصيدهم ألف شيطان.. لأنهم يحبون الكويت وأسرة الحكم بالفطرة.. • كلمة راس تشققت لما شفت مترو دبي.. واستأنست وايد لما شفت جامعة الملك عبدالله.. وعسى الله يوفق كل حكام الخليج وشعوبهم.. لكن لا تنسون وتذكروا ان الكويت بزحمة شوارعها وقلة جامعاتها.. فيها ديمقراطية.. خوارة.. بس ديمقراطية لو استغليناها عدل نبني انسان ونحارب الشيطان.