من هنا وهناك

8/9/2009
الزميل فؤاد الهاشم هذا الكاتب المعتق سكت دهرا عن البطه السوده ونطق دررا في مقالته الاخيره..برّد قلوب الكتّاب اللي صكوا خشومهم من البطه السوده وهرطقاته..بالفعل بو عبدالرحمن يابك ييب يا المحامي الفاشل.. بالفعل الشيخ ناصر المحمد غريب عليك ولا عمرك كنت تفكر تقعد يمه يا كاتب حي الطرب..بس السؤال اللي يطرح نفسه ..هل راح تقدر ترد على فؤاد الهاشم؟؟ أشك انك تقدر تواجه مصيرك معاه..انت بوشيخه دوخك فأكيد فؤاد الهاشم راح يوديك البحرين على اول رحله من الحيا هذا اذا عندك ذرة حيا..يا الداثر..

الكاتب بو قلمين ما غيره ومن خلال مقالاته بالسايد اليمين اذا قط القلم الاول يحكه القلم الثاني ويطلع ايده من دريشه السياره ويكتب اي شي عن بوشيخه..مره يقول بطلت انزل لمستواه وتالي يرد ينتقد سياق المقال اللي بعده..انا عن نفسي ما اغلط موليه بالكتابه..كيفي مغرور..ولا يهمني احمدوه بو قلمين أبد..المراد ان عندي قصه عن بوقلمين كنت ناوي أكتبها بعد رمضان وهونت لأن واحد عزيز علي حيل طلب مني أخف على بوقلمين لأنه حيل متعور ورايح متحلطم عند بعض الاصدقاء المشتركين..مشكلة بوقلمين مثل مشكلة اللي صعد النخله وطاح ولما راح الطبيب عطاه دوا يقتل دود البطن..

الاقتصاد أخر اهتماماتي..بس لاحظت ان اخوانا القطريين شروا الوطنيه للإتصالات..وأخوانا السعوديين شروا فيفا للإتصالات...والحين زين للإتصالات راح تروح حق تاجر هندي..عوافي دام البيعه تسوى..بس آنا مشترك بالوطنيه واهل قطر اكرموني..وفيفا مو مقصر بو عبدالوهاب مواعدنا بجناجف يديده...وما يندرى عن زين عقب البيعه وكلنا ثقه في مالكها اليديد..بس السؤال المهم اللي يطرح ويضرب نفسه جدامي..هالكثر سوق الكويت مغري؟؟ والا عقليات عيالنا مغريه؟؟؟ عيل علام اللي بالمجلس محد سامهم لي الحين؟؟

كلمة راس
موضوع الصفحه الأولى اللي نشرته الدار امس عن رئاسة الوزراء..كان ضربة معلم ..كلام مباشر ورأي سديد وكان على الجرح.. برافو ادارة الدار..وابشركم طالب يقدم الماجستير راح يكون موضوع رسالته من خلال نفس الموضوع..الكويت ولّاده..كثروا منها يا بو علي..