عيب عليكم

9/9/2009
صج عيب، وايد عيب، هذا اللي قاعد يحصل ويصير!انا اقصد ما يحصل من الناس، وتحت عيون المسؤولين، ونوابنا!شنو شعوركم لمن تشوفون رجل بعرض باب الكراج، بكل سهولة يسفط بسيارته، في مواقف المعاقين، وينزل بدون اي احترام للمعاقين ومواقفهم، اكيد بتقولون عنه رجل «جليل الحيا»!المشكلة ان «جليلين الحيا» زادوا، ومصخوها، سمعوا ان ذوي الاحتياجات الخاصة عندهم بعض الخصوصية في المعاملة، ومقارنة مع المعاقين في بقية الدول ما تعتبر شي، ولكنها هم نعمة، الجماعة «جليلين الحيا» وبتشجيع من بعض نوابنا وواسطاتهم، كل واحد فتح له ملف في المجلس الاعلى للمعاقين، وهذوله قصتهم قصة، ماكو لا حسيب ولا رقيب، واخذ وشفط من المال العام، وعلى حساب الخدمات التي تقدم لهؤلاء المساكين!احد النواب يصرح انه في مية الف معاق بالديرة، مرة وحدة مية الف معاق من مليون نفر، يعني عشرة بالمية، شنو هالكلام؟ يبي يقص على منو، الا بس علشان يغطون على ربعهم، اللي هو وكل عياله يسجلون معاقين، علشان ياخذون مخصصات المعاقين، مع ان كل واحد فيهم قد الفيل.يأخذ مخصصات زيادة، وخصومات للسفر، معاملة خاصة في الاسكان وبنك التسليف، وغيرها، وكله على حساب ذوي الاحتياجات الخاصة، اللي بالفعل محتاجين لهذه الاشياء!هذا غير ملفات الطب النفسي، يعني اشكره حرمنة وبوق عيني عينك، والنواب عارفين وساكتين، ليش؟ لانه ربعهم، وناخبينهم اللي يصوتون لهم، هذا اذا مو اهمه اللي مسوين واسطة لهم، علشان يبوقون من المال العام، والشي البايخ والماصخ، ان نفس النائب اللي مسوي هالعملة، يقعد وينفخ صدره ويسولف عن المال العام، قلنا عيب.. بس وين اللي يستحي؟.