تأجيل الدراسة

3/9/2009
اللي يسمعهم نأجل ما نأجل العام الدراسي يقول ان الكويت محتكره جائزة نوبل بكل فروعها العشر السنين اللي فاتت!!! مناهجنا تخليك تطيح على ظهرك من الضحك..مدرسينا بعضهم متخصص بالزراعه ويدرس كيميا..مادري على شنو هالصيحه واللبحه واللويه كلها..
بعدين وينك يا وليد الطبطبائي ووين كلامك ان الله الحافظ والله مدبر كل شي؟؟ والا الموضوع بس بالطرب والغناوي؟؟ ونائب يفترض فيه احترام القانون والدستور اللي اقسم عليه يقول ماني مودي عيالي المدرسه؟؟ هذا العصيان بعينه وعلمه..وبعض الكتّاب صاروا اينشتاين زمانهم وهات يا فتاوي وخزعبلات..يبا الحافظ الله والديره مو مقصره عن عيالها..الله والعام الدراسي عاد..طاولات مكسره وكراسي مافيها براغي وحمامات تفشل..والتكييف يشتغل بالشتا ويخترب بالصيف..واللي العن من هذا كله ان نسبة النجاح يا غافلين لكم الله مره اربعين بالاميه ومره يزيدونها عن الفشله يسوونها ستين بالاميه..وشدعوه عاد اللي قاعدين يطالبون بالتأجيل همهم انتشار المرض ؟؟ ماهمهم الا قعدة الصبح مالهم خلق يودون عيالهم المدرسه..وفي نائب وايد شاد حيله ويبي التأجيل لأن مرته مدرسه..يبيها تجابله وما يبيها تداوم...ركدوا يا نواب مو علينا هالسوالف..ويا شعب الكويت الحبيب تذكروا ان النواب بعضهم طبعا مو صوبكم ولا هامهم شي موليه..والموضوع سياسي بحت..خلوا ثقتكم بمجلس الوزراء كبيره..ترى موضي الحمود بنت الديره وهلال الساير ما يحتاي نشهد بكفاءته..وهذا مبعوث المنظمة العالميه طمنكم..اما جماعة حي الطرب السياسي بعض النواب فلا تعطونهم وي..ولا تسمعون كلامهم..
كلمة راس
اللي يبي يعرف الممارسه السياسيه عدل ويدور عن نموذج حي جدامه..يشوف رد جاسم الخرافي الأنيق اللبق على واحد من ثلاثي التهريج في المجلس..لأن الخرافي من جيل مجالس السبعينات ايام ما كان المهرج يلوث بخيطان بين السكيك..بذمتكم هذا واحد تصدقون كلامه عن التأجيل الدراسي؟؟