البطة السودة

6/9/2009
كتّاب الدرجة السابعة في بعض الصحف بلّشوا ردح بقيادة البطة السودة.. ويهالوا الانترنت وراهم دق ورقص على نفس النغمة.. وناشطينهم اللي ضد الفساد.. الله يرحم.. ركضة دبجة اشتغلوا.. كلهم اجتمعوا واجمعوا ان رئيس الحكومة ما يصلح وان استجوابه قادم.. يا حليلهم يونسون..
جنهم ناسيين ان الحكومة قوية وانتصرت باستجواب البراك للخالد.. أو نسوا ان الحكومة حققت ستة اهداف على قوالجي المجلس.. وخصوصا الهدف الذهبي مال المسرحين.. ما علينا.. لو فرضنا ان في استجواب قادم لرئيس الحكومة؟ على شنو وليش وشحقه؟ حسب البطة السودة ومقالته الأخيرة يقول طيح الله حظ حروفه.. ان الوضع خطير ولازم التعديل يكون شامل سياسيا.. يا أخي انت شعرفك بالسياسة.. وشنو تعرف عنها؟ هل مارست العمل السياسي مثلاً؟ هل صرت وزير قبل؟ نزلت مرتين وييت على بوزك في الانتخابات الأخيرة.. ونسيبك النائب ما يرد عليك موليه.. كل خبرتك عبارة عن 9 سنوات من البوق والانتفاع.. ايام ما كنت بشارع الصحافة رئيس.. ان كنت ناسي اذكرك بموضوع السيارة اللي كنت تسجلها باسمك.. واذا تبي أزيدك ما عندي مانع عن موضوع الإعلانات اللي كنت توقع على تحصيلها بربع السعر الأصلي؟ واذا تبي أفتح عليك بحري واذكرك بالتحويل الشهري اللي يوصل لحسابك من بو فلان (كلمة راس 2).. يا يبا بطل ترى على الجذب والجمبزة على كبر مو زينه.. بالتالي انت وين والسياسة وين.. ودراساتك اللي يشهد على كتابتها الحبر الفلسطيني قديمة وانكتبت زليون مرة.. وموقعك اللي مسجل باسم وافد يلوع الجبد.. وكتبك المستنسخة من مبادئ نيقولاس وربعه قريناها ايام الدراسة.. أما مهنتك الأصلية كمحامي ما كسب ولا قضية.. أمر ثان، يا أخي خلاص لوعت جبودنا بحنتك ورنتك.. روح البحرين حق صاحبك اللي مسويك خصلة بذيل حصانه وفكنا.. اما قصة الفساد مالتك فجد جد ضحكتني وايد وذكرتني بأغنية الراحل فريد الأطرش.. حبينا حبيناك حبينا.. لأنك من كثر اللي تعانيه من كره القراب منك صرت تترجى حب البعاد عنك.. ونصيحتي لك يود اليهالو اللي حولك وهالجم كاتب اللي تاخذ لهم بيزات وتعطيهم النص.. واكتب وقول لهم يكتبون عن البحرين ورحلاتك لها كل اسبوع وترك. • كلمة راس (1) توصلني على الايميل أسبوعيا من 20 الى 40 رسالة يسألو فيها غالبيتهم عن البطة السودة.. وفي واحد اسمه الحركي (bo_s3d) صاده وحط صوره في مدونته.. زوروها وشوفوها.. وركزوا على البطة السودة أيام العز. • كلمة راس (2) انت اللي قاعد بصومعتك تداري نفسك.. ترى انت مكشوف من أول يوم.. وإذا الناس تحترمك لأجل غيرك.. خلاص انتهت صلاحيتك.. وترى الدور صار عليك.