مجاري النواب

14/9/2009
متأثرا بالمسلسلات التاريخية اقول: ياقوم ياقوم، اشدعوه! ماكو في البلد غير الوزير فاضل صفر، النواب هالايام لاحقين فاضل والسبب محطة مشرف، الاخ الوزير وضع رجله بالوزارة، وقال انا قادم من اجل اصلاح الخلل، وقال لكم انه في بلاوي ومشاكل، ويحتاج وقت للاصلاح، يعني الاخ ما كذب ولا ادعى، ولا قال كل حاجة تمام ياافندم!
محطة مشرف بنيت قبل الوزير، والوزير دش الوزارة وشاف المصيبة امامه، طبعا النواب البو ربع، والبو نص، طلبو بتحويل الوزير الى المحكمة، مو بعد للاستجواب، ياسلام محكمة مرة وحدة، يعني مو المقاول اللي بنى، ولا الشركة ولا المستشار ولا المهندس ولا الوزير السابق اللي في عهده تم انشاء المحطة، بل فاضل صفر بشحمه و لحمه ومن معاه ومن والاه!طيب ليش صفر؟ لانه ما يعطيهم وجه، ولا يمشي معاملاتهم، وما يلف ويدور! اما النواب فيبون معاملات، ويبون فوضى، ويبون عجاف، وتمرير ربعهم، ويبون عمولة في كل صفقة، وما يلتقي الحر والبرد، والليل والنهار، والجو النقي مع الملوث من النواب!فحتى لو ركب الوزير سيارته ومر على بيوت النواب وشفط بواليعهم ! او حط مكينة شفط عند بيت كل نائب حتى يشفط مجاريه وتصريحاته، او يمر عليهم الصبح ويبخر بيوتهم، او يدش الحمام وراهم ويشد السيفون.. علشان يقولون عنه خوش وزير، هم ما راح يقولون.. تدرون ليش؟لانه مثل ما قلت، بعض النواب، ريحته فايحة اكثر من مجاري مشرف، يعني اذا قعدت عنده لازم تلبس كمامات، اذا ما تلبس لبس الفضاء بالمرة، ولهالسبب ما يقدر يعيش في اجواء نظيفة... والحل مع كل تصريح لهم .. شدوا السيفون!