بنت حمود

28/9/2009
تبون الصج والا ولد عمه.. عندنا بالديرة متشدقين خلص قازهم.. وانتهت مدتهم ولازم يحطونهم بالمتحف.. صارلهم اربعين سنة يثيرون كل القضايا ولا أحد التفت لهم.. وبعضهم عقب ما شاب حب يروح الكتّاب.. طبعا الكويت فيها مجاملات أكثر من الصين.. ومن هذا المنطلق راح اقول للمتشدقين.. مشكورين على خرابيطكم.. وفكونا وركدوا.. طبعا اللي خلاني اثور عليهم واعصب واتنرفز.. واحد فيهم قال قبل جم يوم كلام مو عدل عن حبيبة المبتعثين من عيالنا.. وأخت الرجال بنت الطيب الراحل حمود بن مبارك الصباح.. هذي الدرة اللي ما خلت شي في سبيل عيالنا اللي يدرسون بره الديرة الا وسوت لهم.. تدش الدوام قبل الثمان الصبح وتطلع بعد الثلاث.. اجازاتها مع الطلبة.. مرتبة امورها وحياتها مع الطلبة المبتعثين.. عندها شهادات بمجموع شهادات كل معارف «الهيس الاربد».. بنت حمود كل نواب الخدمات يشتكون منها لأن القانون مسطرتها.. بنت حمود ما تخاف الا من الله لأنها مع الحق والضعيف ولا يهمها من يدعي عليها بالباطل.. بنت حمود بيدها واهيا من ذرية مبارك انها تسوي شو (shwo) ما حصل في الطالعة والنازلة.. لكن لانها بنت أصل وأسرة كريمة وابوها حمود رباها على التواضع.. كانت وما زالت تمارس صلاحياتها بحدود منصبها.. ولقب الدكتورة محبب لها واهيا شيخة غصبن على اللي ما يرضى وأبوها شيخ ويُدانها شيوخ واخوانها شيوخ.. ومع هذا بنت حمود ما سعت للإعلام ولا عمرها فكرت تسوّق روحها.. بالعكس كان عملها اللي يسوقها والتزامها اللي يعلي شأنها.. وأعتقد وأجزم بأن دعوات اهل الطلبة المبتعثين كانت وراح تبقى توفقها في ثقة سمو الرئيس اللي عينها مستشارة برتبة وزيرة، واذا أحد يشوف ان المستشارين مجمدين.. فوزير الدفاع كان مستشار، وولي العهد كان مستشار.. بنت حمود سمعيها مني لا يهمج واحد شرب الزمان عليه ماي وأكل هارديز.. لا تلتفتين له.. خلج مع ولد عمج الشيخ ناصر وشدي أزره لأنج يا بنت حمود كفو ومخلصة والله يوفقج.. • كلمة راس دكتورة سمعنا أن منصب مدير جامعة الكويت مطروح عليج.. واللي يسلم عمرج يا بنت حمود فكري فيها.. الجامعة معشش فيها الخراب الإداري وتحتاج لجهودج.. واذا مالج نية تقبلين بالمنصب.. هالله هالله بالاستشارات الطيبة ترى عيالنا يحبونج مثلنا.