سمع أذني وشوف عيني

15/9/2009
كنت قاعد كالعادة بالديوانية أستمتع بمشاهدة الربع يتعايوون ويتناجرون ويتناقشون بأمور البلد.. يحسسونك انهم خبراء معتمدين بكل المجالات.. دش علينا واحد سلم من بعيد حسب توصيات هلال الساير.. وفك عن ويهه التلثومة حسب توصيات فاضل صفر.. وقبل لا يقعد وياخذ مكانه دش عرض بالنقاش وقال بالحرف الواحد.. متى تنحل مشكلة الزحمة ونفتك.. شمعنى دبي عندهم شارع حق بطاقات «سالك» مالت الزحمة وعندهم تاكسي بحري بالخور.. والحين عندهم مترو معلق بين السما والأرض؟ فبادرته وقلت له.. دبي مافيها مجلس أمة.. صاح علي وثار وحمق وعصب وتنرفز واشتط.. وقال بترس حلجه.. انت انسان فاسد انت عدو الديمقراطية.. انت ضد الشرفاء.. انت دخيل.. انت.. ما خلا فيني كلمة الا وقالها.. ضحكت وتعدلت بالقعدة وقلت له ممكن تسمعني؟ قال لي تفضل مع إني ضد أفكارك الهدامة.. سألته سؤال واحد.. وقلت له اذا جاوبتني بقتنع واروح معاك كل يوم عند أي نائب وحتى أي كاتب تبيه.. استانس وقال لي اسأل.. قلت له ليش اعضاء مجلس الأمة ومن المجلس التأسيسي ما أجمعوا على مشروع واحد يفيد الكويت؟.. دار راسه وافترت عيونه.. وقال لي وانت شنو اثباتك على هالحجي؟ قلت أنا رحت ودورت بمضابط المجلس فلقيت هالمعلومة.. جاوبني يا ضمير الأمة يا شريف الديرة يا صديق الديمقراطية يا أصيل؟ القطو بلع لسانه وحاول يتهرب وما قدر يجاوبني.. هذي دعوة لكل قراء بو شيخة اللي عنده دليل واحد يناقض كلامي يثبت لي؟ عيل بذمتكم أكو مجلس بالعالم عمره ما أجمع على خدمة بلده.. وتبون تصيرون مثل دبي؟ إن صرتوا مثل بمبي هذا ويهي.. جبح مجلس. • كلمة راس وصلتني رسالة من أب صار له ستعش يوم ما شاف ولده بسبب سوء فهم(!) قطع قلبي.. ويقول في رسالته ان ولده يقرا زاوية بوشيخة.. ومن هالزاوية أقول حق حسن الولد الكبير.. أبوك متشفق يشوفك.. روح له ترى الأبو خيمة.. ترى الأبو ما ينزعل منه يا حسن.. والا ترى بامتنع عن الكتابة.. (بوشيخة عن الغرور).