أنا وسيبويه

25/2/2010
ياحلو لهجتنا ولكن للأسف ناس وايد مايبونها يقولون تقتل اللغة العربية.. وأرد يامعوووود يالطيييب يالحببببيب.. اشمعنى حنا مو اللهجة اللبنانية اللي نسمعها بالقنوات ونحبها ما تقتل العربية؟ طبعا هالكلام قاله لي واحد من المدققين باحدى المطبوعات فيقول اذا صادفت تيس بالطريق لا تقول ان هذه اصخلة لان التيس يختلف عن الصخلة والفرق واضح.. ومثله الثور والبقرة.. فالذكر يختلف عن الأنثى هو صج في بالبشر حالات شاذه كيفهم.. ولكن بالجراد فحنا نسمي الذكر والأنثى جرادة ولازم نسمي الذكر العنظب وهذا مو كلامي ولكنه كلام واحد من الزملاء اللي نسميهم أولاد سيبويه ويقول اذا شفت عنكبوت اللي على الطوفة ذكر فقول في بيتي حدرنق لان هذا اسم ذكر العنكبوت ويزيد الهجرس هو ولد الثعلب والحبربش ولد الحية ومنها عرفت من وين جت كلمة ذول حبربش..وأم قشعم هو الضبع والخوقع هو ولد الذبان اشوه ان له اسم ثاني وإلا جان تروح الجمعية او البقالة وتطلب مبيد خواقعان قولوها بسرعة سبع مرات.. ويقولون ان لغتنا العربية سهلة هي حلوة صح بس صعبة مو بكل شيء فمرض الروماتيزم اللي يشتكون منه نص نص أمهاتنا وابهاتنا وماله علاج اسمه بالعربي مرض.. البدل.. شوفوا اشحلاته وافتكر لو تام على اسمه الأولي جان بسرعة صار علاجه سهل مثل اسمه ويطيبون شيابنا.. ما علينا.. كان ودي أتعلم اللغة العربية الغلجة عشان اكتب مقالة مثل ما يطلب مني بعض القراء مع ان بنتي مدرسة ثانوي عربي.. ولكن كل ما ابدا اتعلمها منها او زميلي ولد سيبويه اغير رأيي خاصة اذا بدوا يعلموني الاصوات ومعنى الأصوات والكلمات اللي لها نفس الدلالة تقريبا.. كمثال ملل كسل فشل شلل دجل زعل خبل زلل جدل والأخيرة تعني المناقشات واختلاف الآراء الى حد قد يصل الى الخصام، مثل مجلسنا يعني صيحة على الفاضي وكلام لا يودي ولا يجيب واغلبهم ناسين المقولة اللي تقول اذا أراد الله بقوم سوءاً حببهم للجدل ومنعهم العمل وعندنا من هالاشكال ذبحونا جدل. خطل..زعل..هبل..عقدنوني.. يبااا خلوني على لهجتي اشحلاتها واللي مايبي يقرع راسه بالطوفة.
إقرأ المزيد...

سوالف المواطنين

24/2/2010
نعتذر نحن كتاب بوشيخة عن عدم نشر مقالة جديدة لهذا اليوم بسبب السفر ونقدم مقالة من قديمنا الجديد

- كنت موجود وسمعت مواطن كويتي عمره 35 سنه.. يروي قصته في احدى دواوين الكويت (مليون ديوانيه عندنا).. المهم ان هالمواطن الكويتي الثلاثيني.. يقول في كلامه.. جان زين الحكومة تشتري فوائد القروض وتخفف عني الحمل.. وياليت وزير الداخلية يعيد النظر في موضوع الطوابع اللي بالمرور لأنها تكلفنا وايد.. وبالمرة المواطن يتمنى ان البنوك تعطيه تسهيلات على قد راتبه علشان ما يتوهق يوم 18 الشهر ويصير عالحديدة..
- دخلت المستوصف رايح اشلع ضرس العقل (بعض النواب ما عندهم) وسمعت مواطنة كويتية تقول حق الموظف.. ليش ما الحكومة وتحديدا وزارة الصحة.. ما تعطي عيادات الاسنان حق القطاع الخاص علشان نضمن ان المعدات معقمه والخدمة زينه.. ردت عليها الموظفة وقالت لها انا لي عورني ضرسي اروح عيادة خاصة والسبب ان ماكو عوار ولا تلوث ولا غيره..
- قبل جم يوم رحت التأمينات الاجتماعية أسألهم عن راتبي التقاعدي وهناك سمعت الشياب (اللي ما يدرون عنهم النواب) يسولفون ويقولون همومهم وعجبني شايب قال خوش حجوة.. قال عسى الله يطول بعمره الشيخ صباح ما خلا علينا قاصر.. بس الوزرا الله يهدانا معاهم معطين النواب على كيفهم..
- عند الخباز الايراني واقف بشتري قرصين خبز حق الريوق.. فسألت ولد مبين عليه طالب بالجامعه.. شلون امورك يبا.. فجاوبني بسرعة الضوء.. اكو شي بهالديرة عدل عمي (ذكرني بالمجلس).. اعانتنا المالية بالجامعه شهر تنزل وست شهور توقف.. وابوي منتف بسبب القروض.. وأمي متسلفه من الفريج كله.. وتقولي شلون أمورك.. ما تنلام يا ولدي..
- قبل لا ادش الجريده موظف الأمن قال لي والنبي يا استاز عاوزك بكلمتين.. قلت له آمر.. قال لي.. اصل الشؤون فتحت التحويل والكفيل بتاعي عاملي دوشه عاوزك يا استاز تدبرني.. (حسيت اني عضو) المهم قلت له ادبرلك ان شاء الله.. وهني قال كلمه بط جبدي فيها.. لو عاوز اديك خمسميه.. قلت له ليش عاد؟ قال لي منتو الكوايته كلكم كده.. عليكم قروض والمهيه بتخلص اول الشهر واهي الدنيا كده.. قلت له آسف ان معاشي ما يخلص اول الشهر.. يخلص 12 الشهر.
إقرأ المزيد...

وحدة وطنية غصباً عليك

23/2/2010
احنا على ابواب العيد الوطني والتحرير، طبعا ابي اصر على كلمة «العيد» حتى لو زعلوا ربعنا اللي كل شي بيسوونه اسلامي على طريقتهم، وكأنه أهمه الوحيدين اللي يعرفون الاسلام، والبقية كفار!
احنا على ابواب العيد الوطني والتحرير، وما دمنا على ابوابها فعلى الاقل لازم نحترم صاحب الدار، والبلد والديرة، والتي عانت ما عانت، مرة على ايد اعدائها، ومرة على ايد عيالها مع الاسف!
على ابواب التحرير تذكرت ايام الغزو، ويوم كنا في الفريج، نقعد في ديوانية بوعثمان العصاري، وعشانا عند بوعلي، يومها الكل كان خايف على الديرة، وقلبه على الكويت، اتذكر شلون الديرة كانت ايد واحدة، لا احد قال، ولااحد فتن، والكويتي ما كان يطوف الاشارة الحمرة، احتراما لديرته ولقوانينها، اتذكر شهداء القرين، اللي الكل كان فيها مشارك شيعة وسنة حضر وبدو، بدون احد يسأل شنو مذهبك، وانت شنو اصلك وفصلك..!
تذكرت صور كثيرة من الحب والتآلف والمحبة بين الكل، وانا اقرأ بيانات الفتنة واعلاناتها وقلت في نفسي ياجماعة اقسم بانه اللي يحب بلده ما يسوي هالشي، واقسم انه ما يهمه، لا وحدة ولاخير البلد اللي ينشر هالافكار، واقسم ان البلد بكل من فيها، من شيعة وسنة بريئين من هالتصرفات الصبيانية، نعم صبيانية وشغل يهال، فلا تعطون العاق لبلده اكثر من حجمه، ولا تعطون الجاهل وتعاملوه معاملة العاقلين.. انا متأكد رغم كل شي ان عيال الديرة فيهم مناعة من هالسموم، ومهما حاول احدهم ينشر سمومه الملونة ما يقدر.. وانا متأكد ان الحكومة راح تتحرك، مو مجاملة لفلان ولعلان، ولا خوفا من فلان وعلان، بل حبا للبلد وخوفا على البلد، وما عليكم سوى الاقتداء بالسعودية، عندما اغلقت قناة «الساحة» بسبب نشرها القبلية.. وهذا ما يفعله عادة من يخافون على الديرة.. وخلونا ننطر ونشوف شكثر وزير الداخلية ووزير الاعلام يخافون على الديرة.. ولا يخافون من بعض الناس في الديرة!
إقرأ المزيد...

غرفة السايق

22/2/2010
بينما كنت أهم بالخروج من باب داري، استوقفتني ام شيخة عند الباب قائلة: «تبا لك يا ابا شيخة».. ثم حملت عصاة كبيرة غليظة وضربتني على راسي..
وقمت من الحلم، طبعا كنت احلم باللغة الفصحى، وسبب الحلم او الكابوس، ان ام شيخة صار لها شهر تحن علي تبي سايق خاص، لان ام مشاري عندها سايق، المهم خوفا من ان الحلم يصير حقيقة، قلت احضر سايق، وطبعا قبل تعيين سايق للمدام لازم ابني غرفة للسائق!
طبعا بناء غرفة سائق تحتاج الف توقيع ومليون ختم، القضية مو سهلة، ما اطولها، رسمت مخطط الغرفة على ورقة كلنكس، وقعدت مع المقاول، واتفقت مع السعر، وقلت له انطرني بس اطلع رخصة البناء!
اليوم الثاني رحت البلدية، واخذ الموظف المعاملة، وطلبني بخريطة البيت، طبعا في الملفات، والله وكيلكم ومحمد نبيكم، اسبوع وانا ادور على خريطة البيت مو لاقيها، يا جماعة شلون انا باني بيت شكبره وما في خريطة، دوروا لي خريطتي، مافي، اسبوع كامل وانا ادور مع الموظفين عن الخريطة، في الاخير عطيت البنغالي اللي يشتغل في البلدية خمس دنانير، طلع لي الخريطة بخمس دقايق!
اسبوع كامل بس علشان اطلع الخريطة، يعني تو الناس.. ورحت عند المهندسين، ولازم خبراء يطلعون ويشوفون بعينهم، ولازم يشوفون حمل الكهرباء، وموقع البيت، وعلاقتي الاجتماعية مع الجيران، وراي مجلس الأمن، ووكالة الطاقة الذرية، والجامعة العربية، بس ماطلبوا مني توقيع عمرو موسى لبناء الغرفة!
ما اطولها شهرين اراكض بس علشان اطلع رخصة للغرفة، يا ورقة ناقصة، يا توقيع غلط، او الطباع كاتب الاسم بالمعكوس، او الاوراق ناقصة، او المدير في اجتماع وتعال بعد اسبوع مو الاجتماع عندهم يطول اسبوع، المهم خلصت الاوراق.. خلال شهرين بس.. واقمت مأدبة عشاء حضره لفيف من الاصدقاء!
وانا طالع سألت الموظف انا ببني غرفة سايق وراكضت شهرين على رخصة بناء شلون لو ببني غرفة تجارة، جم سنة احتاج حتى اطلع رخصة.. قال الموظف بثقة وعلى طريقة يونس شلبي: «يا عمي صلي»!
إقرأ المزيد...

جوهر نظيف

21/2/2010
شنو قال النائب حسن جوهر؟ لا هو كفر، ولا هو اللي نشر، ولا هو اللي جاوب، والنائب من مهامه الاساسية سؤال الوزراء، هذا عمله ولو لم يسأل، لعاتبه الناس وقالوا له لماذا لم تسأل، وتراقب الحكومة!
النائب جوهر المعروف عنه الاخلاص، سأل سؤالا بسيطا عن الغرفة ووزير التجارة اجاب، ومن اجابته تبين ان الغرفة اللي تعطي الشرعية للأعمال التجارية هي نفسها ما عندها شرعية!
اشياء غريبة نكتشفها في هالديرة، الواحد يبي يفتح بقالة، يدور على خمسين الف موافقة، ورخصة، وطالع، ونازل، وصادر ووارد، ورسوم وطوابع وبلدية ومطافي... يالله يطلع الرخصة، وربعنا مسوين غرفة بكامل اثاثها وابوابها ودرايشها، وموظفينها، ومسؤولينها، مع انه مافي لا قانون ولا مرسوم ولا تشريع ولا حتى ورقة كاتبينها على الورق اللي يلف فيه بهاراتي راعي السمبوسة والفلافل في المطعم اللي اتريق فيه عند الشيراتون، تثبت على الاقل انها مؤسسة رسمية قانونية!
المهم ياجماعة نرجع لنائبنا الذي سأل، والذي لم يطلب سوى تطبيق القانون، ولم يحصل على رد، ولكنهم «هشوا» عليه شوية كتاب من صبيانهم، اللي كتب و قال له انت عميل، واللي قال له انت حسود في عينك عود، واللي قال له انت مؤزم، واللي طلع فيها قال هذه مؤامرة على الوطن والوطنية، وواحد فيهم يكون محايد وحاول يرقعها، وقال انه الغرفة ظهرت في ظروف خاصة! شنو ظروف خاصة، محد يدري، غرفة ما فيها شرعية ولا قانون ولا بطيخ.. عدلوها وطلعوا لها قانون، هذا كل ما في الموضوع، بعد اللف والدوران ليش؟! الا اذا كان الكرسي والمناصب اهم من القانون.. عندهم طبعا اهم!
إقرأ المزيد...

كاتب مقال.. بس تجاري

18/2/2010
الصحافة في الكويت عرفت كتّاب مميزين ولهم ثقل في كل حرف يكتبونه..وتلاقي اصحاب القرار من صباح الله خير يدورون مقالاتهم ويقرونها ويحمدون الله اذا ما حاشهم طشّار او انتقاد..من هالكتاب فؤاد الهاشم ونبيل الفضل في الوطن وعبداللطيف الدعيج ومحمد مساعد الصالح في القبس وصلاح الساير وصالح الشايجي في الانباء وجعفر رجب وسعد المعطش في الراي.. وغيرهم من الكتّاب في الصحف الخمس القديمة..اما صحافة اليوم اللي صارت خمستعش وزود برز في الآونة الاخيرة العديد من الاسماء منهم صالح الغنام في «الرؤية» وحسن الانصاري وكتاب من الوزن الثقيل في «الدار» وعلي الزعبي في «اوان» واحمد بن فهد في «الصباح» وفيصل البيدان في «عالم اليوم».. لهم اسهامات كبيرة في مقالاتهم ولهم آراء مهمة وزينة ومفيدة للوطن والمواطنين والمسؤولين..وفي غيرهم يحاول بكل جدارة يبرز تلاقيه بمقال يكسر الدنيا وفي مقال مو ذاك الزود.. وهذا شي جيد ويحسب لهم ومطالبين بالتطوير بين فترة وثانية بطرق القضايا المهمة واللي تكون قريبة من الواقع..اما في نوع من الكتّاب فمالهم لا في العير ولا النفير..مضيعين مشيتهم ومشية الحمامة..نوبة تشوفه ليبرالي ونوبة اسلامي ونوبه ماله لا لون ولا طعم..يكتب عن البلاليط والاستخبارات ويدز حق روحة ايميلات ويرتز بالمقاهي على ما ميش..وفي اللي يقلد او يحاول يقلد الكتّاب الكبار فتلاقي نبيل الفضل بس لابس شماغ او عبداللطيف الدعيج بس حاط سكسوكة..وهلمجرا..وابلغ دليل في اكثر من كاتب يقلدون فؤاد الهاشم.. تحوشهم الانفلونزا بالجذب ويسافرون الاردن ويكتبون انهم رايحين باريس.. شي غريب عجيب..ماخذين في نفسهم ابو المقالب كلهم.. هيك كتّاب ودك ترجعهم ببطون امهاتهم وتفتك من اقلامهم اللي تشابههم.. يذكرونك بالمرسيدس اللي بالبشر مثل فؤاد الهاشم وبالمرسيدس التجاري اللي مثل بعض الناس..وسلم لي على قانون المطبوعات اللي طلع لنا عاهات بيدها قلم وتشخبط شخابيط.

• كلمة راس
العنصر النسائي في الكويت من كاتبات يهبلون..حتى مفرداتهم تهبل مثلهم..والرقة تقطر منهم ومن كلامهم المكتوب بالعسل الممزوج بحب الكويت..يا حلاة كاتباتنا..وجبح للكتاب اللي واحدهم مثل شيبوب ويبي يصير عنتر..
إقرأ المزيد...

ملعب البراحة

17/2/2010
قررت اسوي مؤتمر صحافي، حالي حال غيري، ودعيت كم صحافي من الربع، اللي امون عليهم، ما سبب المؤتمر الصحافي؟ سببه اني بنيت ملعب في البراحة، ورا البيت، اجرت حفارتين علشان يضبطون الملعب، ورحت الشويخ صنعت «قولين» وصبغتهم ابيض واسود، واشتريت شبك برتقالي من سوق السلاح، وانتهى مشروعي والسلام!
في المؤتمر الصحافي، دعيت لي نفرين يشتغلون عندي، واثنين مشغلهم عندي بالباطن، وبدأت المؤتمر الصحافي بهذه الكلمة العظيمة:
ياسادة، ايها الشعب الكريم، في ناس ما يحبوني، وفي ناس قاعدين يشككون في ولائي لبلدي، ولبراحتي، ويقول انني اختلست من ملعب البراحة، يا جماعة هذا احسن ملعب في كل الفرجان، وكل الفراريج «جمع فريج» يحسدوننا عليه، ومقارنة مع باجي الفرجان فاحنا ملعبنا اكبر من ملعب الماراكانا في البرازيل، والارينا في المانيا، وويمبلي في افغانستان!
صج الملعب طلع عوي شوي، بس عادي، المثل يقول اقعد عوي واحجي عدل!
صج العشب يبناه من الصعايدة اللي عند المشاتل، بس طبيعي، يعني نطروا عليه سبع ثمان سنين ويضبط!
صج مدرجات ملعب البراحة لكم عليه، يعني يمكن الواحد وهو قاعد يطب على وجهه بس عادي نلبسه حزام الامان!
صج الملعب يمكن اذا زاد الجمهور ينهار لانه ما ندري المدرجات بانينه بالكونكريت ولا شرق ورق، بس اي شي يصير يعتبر قضاء وقدر!
وصج مافي مواقف سيارات كافية، بس عادي يصفطون في الجليب ويعبرون الجسر!
وصج الملعب شكله بايخ وقبيح وماله طعم ولا لون.. وفيه ريحة.. بس مو مهم اهم شي الاخلاق!
وانتهى المؤتمر على خير!

• كلمة رأس
تساءل العديد ان بعد المؤتمر الصحفي ليش الصحفيين ما سألوا؟ قلنالكم الصحفيين تبعهم.. وما في أسئلة إلا بعد نظرة على الاستاد.. بعدها قالوا الحين بوفيه وانحاشوا الشباب.. طلع ما في أسئلة ولا بوفيه ولا شباب.
إقرأ المزيد...

بدوري

16/2/2010
في كلمة كثيراً ما يرددونها القادة الكبار في حال انهم فقدوا أرض عزيزة عليهم من ممتلكاتهم أو تم احتلالها من عدو ألا وهي «أتعامل مع الشيطان في سبيل عودة الارض» وهذا شي متعارف عليه في عالم السياسة والحروب.. لكن في ناس مستعدة تصير شيطانية بس من أجل المال والسيطرة.. وقصتي لكم اليوم عن واحد من الزعاطيط اسمه بدوري سمع قصة القادة الكبار ويبي يطبقها على العالم.. مسوي روحه مفتح باللبن واهو حد ويهه يبيع ورق.. بدوري دور يمين يسار يبي الشيطان يتعامل معاه فقال له إبليس يا عمي روح بعيد انت أبوك بكبره ما أتعامل معاه يايني انت ويا ويهك.. المهم لف ودار ولقاله واحد واتفق معاه على تبني قضيته.. مثلك عارف ياقارئنا العزيز ان التبني بالديرة هاليومين ماخذ وضعه.. المهم بدوري ضبط الأمور وحب يسوي روحه فاهم مثل اخوه الأهطل اللي متخبط يمين يسار بسبب الخساير والفضايح، وراح يلعب بشوية أوراق يعتقد انها سرية.. والمفارقة بالموضوع ان الاوراق عبارة عن ملف فيه محاضر ومرافعات نظرت أمام القضاء وتعتبر معلومات عامة مو أكثر.. لكن لأن بدوري وصاحبه مخهم على قدهم اعتقدوا انها تشكل فضايح وحبوا يساومون فيها.. لكن أبشرك يا بدوري الهيلقي.. ترى أنا حصلت على ملف مهم تم النظر فيه امام القضاء وفيه مرافعات وشهادات شهود تضحك.. بين ماما وخالو وبدعم من بابا.. وناوي اكتب مسلسل واسميه «المفضوح».. وخل يفيدك مخك المصدي ورفيجك.. وانت بديت انت اتحمل والا نسيت ان الزمن تحول بعد ما صار هندي وتراجع وصار افريقي..

• كلمة راس
زعم الفرزدق ان سيقتل مربعا.. أبشر بطول سلامة يا مربع.. هذا بيت من الشعر أهديه حق كل واحد يفكر مجرد التفكير بمهاجمة الإعلام الناجح اللي يكشف المستور ويبين المتنطعين بالمال العام ومناقصات الدولة..
إقرأ المزيد...

وزارة قطعة ثلاثتعش

15/2/2010
من مميزات ديرتنا العزيزة، انه كل شي متوفر والحمد لله،. تبي سيارة، طيارة، قطار، لبن التيس، ريش الفيل، متوفر! انت بس اشر ويوصلك لي عند الباب، حتى الممنوعات صارت متوفرة، شلون توفرت وهي ممنوعة؟ لأنها ممنوعة فتتوفر بكثرة، تذكرون قبل، الناس كلها تحط عطر تشارلي الاسرائيلي، وتاكل كاكاو «فليك» أكثر من الحين.. لأنه ممنوع!
والمواضيع هم متوفرة في هالديرة، والكاتب ما يقعد يتعب نفسه يدور على موضوع، بس يبطل الجريدة يشوف خمسين ألف موضوع يتكلم عنه، طبعا خمسين ألف مبالغ فيه، يعني تسع أوربعين الف موضوع بس!
نفتح الجريدة ونتكلم عن التربية مثلا، وزارة الحريم، نسميها حريم مو تطنز عليهم لا طبعاً، بس لأنه صج كله حريم، بس عاد ياريت الحريم يديرونها عدل لا طبعا! من يوم ما حطو النظام الموحد وتطوير المناهج والناس دايخة، والطلبة المساكين دايخين، ما يدرون وين يروحون، وشنو يسوون!
قالوا بنقضي على سلبيات نظام المقررات والعام، شنو صار؟ جمعوا بلاوي النظامين وحطوه في الموحد، قبل الطالب يعيش رهبة امتحان آخر العام، قالوا شنو بدل الامتحان نسوي له امتحانين بالسنة ولجان وكنترول ومراجعة وامتحانات.. وطبعاً لازم الامتحانات تتسرب مثل كل سنة!
بس أحلى شي درجاتهم، تصدقون لو تسألون اي مدرس او ناظر أو حتى الوزيرة كم الدرجة النهائية مثلا في مادة علم النفس؟ طبعاً اللي يقول عشرين واللي أربعين واللي خمسين.. لا طبعا! الدرجة من 39 شلون؟ ما أدري أهو جذي! ومادة الحاسوب من 13 درجة، بالله بذمتكم في احد يحط درجات بهذه الطريقة! حتى الدرجات مو عارفين يحطون، على سوالفهم يذكروني بـ «أبلة» عطيات وقطعة ثلاثتعش!
إقرأ المزيد...

ملعب بـ 9 ملايين بس

14/2/2010
قبل ايام، سمعت عن مؤتمر صحافي بمناسبة تأخر افتتاح استاد جابر لثلاث سنوات، وطبعا تحدثوا ووضحوا وقالوا بانه افضل استاد، وانه مقارنة مع الاستادات الشقيقة، تكلفته رخيصة، ومرة قالوا غالية! وانه مواقف سياراته كثيرة مقارنة مع الشقيقة.. المهم كل ما قالوا شي قالوا الصديقة والشقيقة، وانا قلت خلني ادور على الشقيقة والمعلومات في النت ببلاش، واشارككم المعلومة!
استاد «عش الطائر» تذكرونه، اللي اقيم فيه اولمبيا بكين، هذا الملعب الرائع كلفهم 442 مليون دولار يعني 100 مليون وشوي دينار بس هذا مو سعر الاستاد، هذا سعر بقية المرافق اللي بنيت معها، من مواقف سيارات مظللة، وصالة، ومسبح، يعني اشبه بمدينة اولمبية، بنفس سعر ملعبنا بعد الاضافات!
استاد «الارينا» في ميونخ، اجمل استاد في العالم، بنوه بـ400 مليون دولار ايضا بمرافقه، مبنى للسيارات تحمل 18 الف سيارة، مو 6 آلاف!
«سوكر ستي» في جنوب افريقيا الذي سيقام عليه نهائي كأس العالم بـ370 مليون دولار وفيه مكان لـ15 الف سيارة وهذا اقل من سعره المعتمد بـ139 مليون دولار، يعني وفروا المبلغ ولم يضيفوا!
استاد الملك فهد تسع مواقفه 26 الف سيارة!
هذه احصائية لمن يقول ان كل الملاعب الشقيقة ماعندها مواقف للسيارات مثلنا، وغالية، وراح اضيف لكم هالمعلومة الغريبة!
سورية دولة شقيقة، هذه الشقيقة افتتحت استاد حلب الدولي سنة 2007 ويتسع لـ70 الف متفرج وحصل على شهادات اولمبية، وبني كله باشراف شركات اوروبية متخصصة، ومجهزة باحدث الاجهزة المتطورة.. كم كلفهم؟ كلفهم ياشباب اقل من تسعة ملايين دينار.. ما اكذب روحوا بحثوا وشوفوا!
هذا كلام الارقام، وسوالف الارقام، فرجاء، ما يحتاج جماعة الهيئة والشؤون يقعدون ويبررون لغيرهم، ويبربرون على راسنا، لانه كل شي مكشوف، بس المشكلة في اللي يسوي «مؤتمر صحافي»!
إقرأ المزيد...

سكرتيرة ونائب

11/2/2010
سمعت من أحد الإخوان بالديوانية خوش اقتراح بخصوص سكرتارية نواب المجلس اللي وصل عددهم خمستعش سكرتير.. جان زين عاد في إنجاز يواكب العدد.. إلا أكثرهم نايمين ببيوتهم من باب التنفيع ولط الراتب مقابل جم صوت يجلبونهم للنائب أو تلاقيه ولد مفتاح انتخابي يبي يكسب النائب فيه جميل.. الأخ اللي اقترح يقول ليش النائب ما يعين له من هالخمطة ست أو سبع متخصصين كسكرتارية يستفيد منهم في إعداد اسئلته كل في مجاله.. مثلاً.. بدل ما يكون النائب أطرش في الزفة بقانون الرياضة يحط له رياضي متخصص يفيده بهالقانون وينوره.. وعلشان لا يتوهق في مقترح العمل يعين له سكرتير فاهم بالأمور العمالية.. وعلشان لا يصير قوطي وطبل في قضية الخصخصة ليش ما يتعب على سكرتير يكون متخصص في هالأمر.. عجبني هالاقتراح وبدوري قمت وسويت جولة بالمجلس وسألت وتطقست عن سكرتارية النواب وشفت العجب العجاب والشعر شاب من اللي عرفته وشفته.. نائب مخضرم حاط له سكرتير عمره 22 سنة ومخليه يكمل دراسته بره الكويت.. نائب للمال العام مضبط له سكرتير لوتي لمتابعة أبناء دائرته اللي يحبون التقحيص ومجابلهم.. نائب لحيته لي صدره معين ولد أخته سكرتير علشان يجابل عمارته.. وبلاوي زرقة وحمرة وخضرة.. ونائب معين له سكرتير يفهم بالسياكل ونائب ونائب ولوية مالها معنى.. الأدهى والأمر ان غير الخمستعش سكرتير تلاقي نائب حاط له سكرتير أو سكرتيرة ما مهنتهم الا تدزز بالمسجات حق الناخبين.. باجر النائب بالديوانية.. عقب باجر ترى النائب بيطلع بقناة (....).. النائب ألمت فيه وعكة صحية.. وكل دقيقة يصل لك مسج من السكرتير.. لا وفي بعد نواب حاطين سكرتيرات وحركات حق تدزز الورد حق الناخبين ومجابل الناخبات العيايز.. يعني بذمتكم بالله هذا شغل تشريع ورقابة؟ والله يبا النواب يبي لهم ديوان أمني ومحكمة خاصة لمحاسبتهم على سوالفهم الدايخة..

• كلمة راس
في بعض السكرتارية شزينهم يشتغلون بجهد وكد ويزهلقون النائب.. وفي سكرتيرات مقزرينها قز ومطاعم وسينما وقهاوي.. وتلاقيهم ميودين الموبايل ودز بهالمسجات.. الموضوع عميق ويبيله دراسة والا شرايكم؟ جبح مسجات مافيها حبيبي وحياتي ما تنبلع.
إقرأ المزيد...

حظر المكالمات

10/2/2010
على قولة شيخ المعلقين العم الاسمر الحلو خالد الحربان في مباراة الكويت والعراق سنة 1976 بكأس الخليج الدورة الرابعة.. اللي كالعادة فزنا فيها.. ولما صار الفاول على خط الثمنتعش لما شاتها جاسم يعقوب قال الحربان «قوسية عرضية برازيلية فوق رعد حمودي شوفوها شوفوها»، على طول تذكرت هالمقولة ويات على بالي لما شفت شركة الاتصالات الوطنية بقيادتهم القطرية وخبراتهم الكويتية المتجلية بالمدير الفعال الطويل الحلو عبدالعزيز البالول.. شفت لهم خدمة يديدة اسمها حظر المكالمات.. يعني تقدر تحظر اللي تبيه وتفتك من حنته ورنته ولبحته ولويته واتصالاته الدايخة.. المراد ماني مطولها عليكم.. لو افترضنا ان الشيخ أحمد الفهد ضاع تلفونه ولقيته أنا وتعبثت فيه ودشيت على قائمة المحظورين من الاتصال من راح الاقي؟ أكيد مرزوق الغانم لأنه وايد يحن على الرياضة وصالح الملا لأنه مدوخ الشيخ بمعاملاته والصرعاوي اللي لو لاعب يضيع بلنتي يقول السبب الشيخ احمد.. ولو غافلت رئيس المجلس الخرافي وخذت موبايله السوني إريكسون وشفت قائمة حظر المكالمات راح الاقي فيها.. مسلم البراك وأحمد السعدون وعلى راس القائمة حفيده جاسم انور لانه يتصل بأوقات مو مناسبة يبي يروح سوق اليمعة.. أما موبايل النائبة رولا دشتي على طول يطلع لك سعدون حماد محظور مع صورته.. لكن الغريب بالأمر اللي راح أشوفه وأتعجب منه ان موبايل سمو رئيس مجلس الوزراء ما يستخدم خدمة الحظر لأنه بابه وقلبه مفتوح للكل وخصوصا حق بو عبدالله أكثر شخص يتصل فيه.. بس لو قدرت أبوق موبايل محمد هايف اعتقد راح ألقى حظر أرقام النائبات الأربع.. بس تدرون وين المصيبة والسالفة العمية؟ موبايل محمد المطير راح اشوف انه خدمة الحظر شاملة لكل المتصلين إلا وكالة الهارلي.. وعاشت شركة الاتصالات الوطنية وعاش البالول.. فكوا النواب والوزراء من لوية المتصلين الداثرين.

• كلمة راس
يقولون ان قطاع الاتصالات في الكويت مو كويتي؟ شفيها يعني إذا أهل قطر شرفونا بتملك شركة الوطنية؟ يمكن يحوشنا سحب على لاندكروزر.. وشفيها إذا الدويش أخذ فيفا للمملكة السعودية؟ يمكن يحوشنا طشار من الخير العامر.. أما زين فبعد سعد البراك.. صارت مو زين اللي نعرفها.
إقرأ المزيد...

حطولهم ضوابط... بعد!

9/2/2010
شباب صغار لي الحين ما دشوا الدنيا ولا شافوها، تروح ارواحهم هدر بسبة التقحيص والسباقات.. تبون تعرفون ليش؟ وشنو السبب؟ وشنو الحل؟ انا اقولكم الحل شنو، وتعرفون السبب:
-1 شيلوا لافتات للعائلات فقط، لانهم مساكين، كل ما راحوا مكان قالوا لهم ممنوع ما يقدرون حتى يدشوا بعض الاسواق، لانها للعائلات فقط.. بس خوفكم هالاقتراح يعترض عليه شخص هايف ويقول مخالف للضوابط!
-2 حطوا لهم حلبات خاصة للسباقات يقعدون يشفطون على كيفهم بدل ما يدورون في الشوارع هذوله شباب وفيهم طاقة، فتحوا لهم المجال لافراغ هالطاقة يعني الفكرة حلوة بس خوفكم الجمعان يعترض عليها لانه مخالف لضوابطه!
-3 نظموا رحلات سفر خاصة بالشباب باسعار رمزية، هم يفرغون طاقتهم، وهم يتعرفون على الناس، وهم يكتسبون ثقافة جديدة بس خوفكم الظواهر تعترض على الاقتراح لانها مو ماشية مع ضوابطهم!
-4 سووا لهم اندية خاصة ومتطورة يعني مو تسوون نادي تحطون فيه بلياردو وبيبي فوت، الناس تغيرت وتطورت، ولازم نطور انديتنا بس خوفكم الوليد يعترض لان الاندية مخافة لضوابطه!
-5 فتحوا لهم مجالات شغل في العطل دخلوهم دورات تطور من قدراتهم سووا لهم منشآت خاصة ودورات رياضية.. بس خوفكم «الدكتور» يعترض لانها مخالفة لضوابطه!
-6 لازم في مرافق خاصة بالشباب اماكن لعب، ووناسة، على البحر وفي المناطق حتى الشباب لا يقعدون ورا المحول بطالية عطالية.. بس خوفكم الفلاح يعترض لانها مخالفة لضوابطه!
مادام كلهم بيعترضون لانهم يخافون على اخلاق الشباب، ولانهم مو فاضيين، غير للضوابط وهذا ما يصير.. وهذا ممنوع.. فلازم تعرفون ان ذنب هؤلاء الشباب برقبة نواب الضوابط اللي بيخطفون البلد وبيسوونه «سجن كبير» وياما راح نشوف من ورا نوابنا، اللهم لا اسألك رد القضاء بل اللطف فيه!
إقرأ المزيد...

خوش إعلام عندنا

8/2/2010
لو كنت ادري ان في وزارة الاعلام هالكثر فلوس، جان من زمان هديت شغلي، والحداق على طراد 14 قدم، واشتغلت في الاعلام اي شي! اقول اي شي، لانه اللي يعرض في تلفزيوننا الرسمي اي شي، واي واحد في هالديرة يمكن يصير مخرج او معد او مصور او ممثل او مذيع.. المهم من وراها فلوس، حتى اعرف ناس، قاعدين في البيت ويصيرون معدين ومخرجين! واعرف مخرج سافر شهرين، ربعه يوقعون له، واسمه نازل كل يوم في الاخراج، مو تعرفون وزارة هدد وفالتوه!
شنو اكو في وزارة الاعلام، اقول لكم:
تبون وظائف للبطالية والعاطلين واللي ما عندهم شهادات ولا كفاءات..اكو!
تبون مكافآت على الفاضي، للربع في الديوانية.. اكو!
تبون فلوس بدون شغل، وكانهم لاقين فلوس الدولة بالشارع..اكو!
تبون برامج سخيفة، وصوت رايح فيها، والديكورات والاجهزة من القرن السابع عشر..اكو!
تبون فلافل شورما ومسحب ومشكل.. هم اكو!
طبعا في اشياء هم ماكو في الوزارة، وما نبي نتبلى عليهم، والاشياء اللي ماكو في الوزارة، هي: بعض البرامج موسنعة.. وكمان بعض المقابلات والمسلسلات.
بعض الكفاءات ماتشتغل، لانهم ما يبونهم يشتغلون!
بعض الناس مو فاهمة وعارفة، وتخطط عدل، لانهم ما يبون احد يفهم ويخطط، وماكو احسن من الفوضى!
بعض الناس ما تداوم أو تلتزم و تحلل معاشها!
بعض الناس ما تعرف وين تنصرف الفلوس، وتحاتي على ميزانية الوزارة، اللي هي فلوس دولة!
بعض المسؤولين قلبهم مو على تلفزيون واعلام الديرة!
هذه هي وزارة الاعلام وانجازاتها واحلى شي تقرير ديوان المحاسبة اللي نشر والارقام والفضائح اللي فيها، واللي ما تشيلها بعارين، والحلو ان الوزير متحمس لتغيير قانون المرئي والمسموع، علشان يراقب الاعلام الخاص، لا حلوة طال عمرك، وايد حلوة.. ما اقصد القانون اقصد الوزارة طال عمرك!
إقرأ المزيد...

ثلاثة فيصل للبيع

7/2/2010
ابتلت الديرة بعيالها الدايخين الداثرين.. ومنهم ثلاثة يحملون نفس الاسم ونفس الصفات تقريبا.. تلاقيهم بالأماكن المهمة للقرار.. مو معروفين إعلاميا بس مشهورين بعدائهم للشخص نفسه.. وفي الكويت لما تقول اسم فيصل يطمر جدامك على طول اسم الملك فيصل الدخيل.. هذا اللاعب الكبير بأخلاقه وعطائه داخل وخارج الملعب.. يكفينا ككويتيين انه رفع راسنا بكأس العالم وما زال يمثلنا بالإعلام الرياضي.. أما إذا قلت فيصل على مستوى العالم العربي فعلى طول يبرز اسم الراحل الملك فيصل اللي رسم وضع عجيب وكبير في السياسة الخليجية.. وله إسهامات أدبية واجتماعية نشوف صداها لي اليوم بالعالم الإسلامي والدولي.. ولا أبلغ من وجود أبنائه الأمير سعود والأمير الشاعر الرقيق خالد الفيصل الله يحفظهم.. أما الثلاثي اللي اقصده فما يحملون من اسم فيصل المتمثل بالسيف ولا شي.. فهم خنجر مقيت بظهر الرجولة.. وبلاعة بيزة من الدرجة الاولى.. وفيهم كل الصفات المنافية للمرجلة في الخصومة.. الفيصل الأول منهم عبود يخاف من ظله وصاير لعبة بايد اليهال وقراراته ما تمثل قناعاته.. أما الفيصل الثاني فبيو بيو برو برو على قولة العيم.. شيقول له أخوه المعقد يسوي ويعاني من مرض نفسي يسمونه اهل علم النفس (حقدنيشن) حقود بطريقة غريبة على كل انسان ناجح وفوق كل هذا بايع ذمته المهنية لخصوم الدولة رغم انه ياكل ويشرب ويكشخ على حساب الوظيفة العامة.. أما الفيصل الثالث فقصته قصة.. ويذكرني بقراقوش وأحكامه اللي مالها لا لون ولا طعم موليه.. عنده جنون العظمة مع انه تافه.. ويعتقد انه بطل قومي وأهو فار مو أكثر.. اللي يجمعهم ثلاثتهم هاليومين بزر وياهل يلعبون فيهم ويودونهم يمين ويسار.. بس أبشركم يا فياصل الغفلة.. أولكم أيامه معدودة بالمنصب وثانيكم راح ينطق على راسه وثالثكم كتابه راح حق أهل الربط والحل.. جبح فياصل وايد عليهم ينحطون بقفص وينباعون بسوق الحمام بوانيت بو صلوح اللي يحب يصفط قري.

• كلمة راس
رياضتنا عتيدة بتاريخها وشامخة بعطاء أهل الكويت من شيوخ وتجار وغلابة.. وجهازنا الحكومي مليان بالشرفاء اللي يقدمون الكويت على رغباتهم وحقودهم.. وقضاؤنا نزيه وملاذنا الأخير وعمره ما يتأثر ما دام أهل الحكمة موجودين بالحكم الله لا يخلينا منهم.
إقرأ المزيد...

ديسكو إسلامي

5/2/2010
الزعماء العرب كانوا مجتمعين في غرفة مغلقة، وكان الصراخ والهواش والاتهامات بين الزعماء على اشدها - حلوة اشدها - وكل واحد منهم مطلع ملفاته، وخططه، في كيفية مهاجمة اسرائيل، والقضاء عليها، الا زعيم واحد ساكت ويفكر..
طبعا الزعماء استغربوا من سكوته، يعني اكيد وراه شي، فسألوه: ها يازعيم، بشنو تفكر؟ اكيد انت عندك الحل والخطة الكاملة! طبعا بعد ان تنحنح، وتعدل وضبط شنبه، قال لهم: انا مستغرب، شلون هالطاولة الكبيرة مالت الاجتماعات مدخلينها من هالباب الصغير!
الحين بنقل لكم مشهد من مجلس الامة، الحكومة تتحدث ساعة، ساعتين، وعشر.. وتطلع ملفات واوراق، وحسابات ومشاريع وميزانيات، ومليارات واقتراحات عن التنمية.. ونقاشات واعتراضات، واللي يسأل عن الخطة واللي يسأل عن التفاصيل، والمشاريع والاولويات، الا كم نائب كانوا ساكتين ويفكرون.. سألوهم: خير شنو رايكم؟ بعد التفكير وبعد ما عدلوا غترهم، وقعدتهم، وشواربهم، ولحيتهم، قالوا: وين الشريعة الاسلامية في التنمية؟
الكل استغرب من ملاحظة النواب الاشاوس، لانه كلنا مسلمون، ولا اعتقد انه في نائب او وزير، يعبد الاصنام، ويقدم القرابين لهبل! ولا في خطة التنمية اكو بناء بارات وديسكوات للرقص، او بناء كازينوهات للقمار، او تخصيص شاطئ للعراة، او تخصيص اراض لبناء مصانع للخمور، ولا في الخطة اكو بناء اندية للمثليين، ولا بناء معابد لليهود.. يعني شنو علاقة الشريعة الاسلامية بالتنمية ما عرفت؟ الا اذا كان هدف النواب انهم يطلعون اي شي، ويثبتون غصب انهم اسلاميون!
وصايرين مثل «المرائي» اللي كل يوم يروح لصديقه، ويقوله: انا امس صليت عشرين ركعة صلاة الليل لمن تعب رفيجه منه، ونصحه انه ما يقول ولا يتكلم عن صلاته، لان المؤمن الحقيقي ما يكشف عن اعماله! الرجل يومين ثلاث ساكت، بس ماقدر، تاليها راح حق رفيجه وقال له: اخوي، عطني قلاص ماي، لانه مثل ما تعرف، صلاة الليل تعطش!
وهذه هي حالة نوابنا، خلاص عرفنا انكم اسلاميون، وتصلون، وتصومون، وتروحون، الحج ثلاث مرات بالسنة، بعد بتدخلون اي شي اسمها الشريعة بس علشان تثبتون انكم اسلاميون مو حلوة! خلاص يبه يا حكومة، ابنو المباني والمستشفيات بدرايش اقواس، يعني اسلامي.. ها شرايكم، صارت التنمية اسلامية ولا ما صارت!
إقرأ المزيد...

زعلة التجار

4/2/2010
من طلعنا على الدنيا واحنا نسمع يدودنا وأبهاتنا وخوالنا وعمامنا يتحجون عن قصة زعلة التجار بزمن الشيخ مبارك الله يرحمه.. وكل ما صارت سالفة بالديرة يطلعون لنا جم واحد ويشتغلون علينا بهالسالفة.. جنهم يبون يذكرونا بشي يضمن استمرارهم.. يعني بالعربي بعض التجار كل ما حسوا بتلاشي قيمتهم دزوا ربعهم بالصحافة والمنتديات وقاموا يكتبون عن زعلة التجار وان وجودهم ضروري والحكم ما يستغني عنهم.. السؤال اللي يطرح نفسه على الطاولة.. ترى الأسرة الحاكمة في الكويت من 350 سنة ويمكن أكثر عمرها ما تأثرت بتاجر يزعل أو مواطن يهاجر كثر تأثرها بالشعب الكويتي اللي يحبها وتحبه.. وبعدين تعالوا يا اللي تسوقون لنا تجاركم اللي زعلوا واللي يبون يزعلون وقولو لي.. البيزات اللي تبرعوا فيها التجار حق الحكومة ذيج الفترة كانت على أي أساس؟ مو على اساس انه الحكم يضمن الأمن والسلامة مقابل فلوس ياخذها الحاكم ويصرفها على الشعب! والا بتفهموني أن الأسرة الحاكمة ما تملك شي؟ واذا في واحد عقله ناقص قصيتو عليه ترى احنا مفتحين باللبن.. يبا الأسرة الحاكمة على أيام الدولة العثمانيه كانت تدز الهدايا حق السلاطين وتوزع الهبات حق أهل الديرة بأحلك الظروف.. لكن قصتكم معروف أثرها وعارفين دقلبازكم.. تبون تفهمونا أن الديرة بدون تجار مالها قيمة.. طل بعينكم.. الكويت بأهلها فقير وغني شيخ ومواطن بكل طوائفها تحت حكم آل الصباح لها قيمة.. والا بدونهم ما نسوى شي.. والا بذمتكم يا تجار الزعل ما تقولون لي من رزكم؟ منو اللي فتح لكم باب الرزق غير الاسرة الحاكمة! مو الشيوخ اللي عطوكم المكانة الاجتماعية وميزوكم بسبب ولاءكم المطلق للأسرة.. وإذا في جم تاجر أخذ جناح المعارضة كاهو رد للحكم في أزمته المالية وقام يطلب العفو والعطاء.. فلا تكابرون على روسنا وتسوون روحكم كلش.. وعلى فكرة اذا الديرة كانت يوم صغيرة فيها ست أو سبع تجار.. اليوم الكويت كبرت وفيها سبعين ألف عايلة تشتغل بالتجارة وتملك ولاهي بحاجة لاحد.. لكنها تخدم الحكم والنظام تحت راية أبونا العود الشيخ صباح الأحمد وولي عهده الأمين بوفيصل عين السيح.. وأكبر مثال على أن التجار بطلوا زعل هاليومين.. شوفهم شلون يمجدون بالشيخ أحمد الفهد قائد التنمية علشان المشاريع.. لكن من عليه بتقصون.. جبح زعل..

• كلمة راس
غرفة التجارة فكرة الشيوخ بالأربعينات لتنظيم العمل التجاري ورئيسها شيخ.. وترى التجار اللي زعلوا ذيج الفترة كانت أسبابهم معروفة مالها علاقة بالبيزات.. وتقدير التجار من قبل الأسرة مثل تقدير الأسرة للشعب الكويتي ما تفرق بين أحد منهم.. عاد هل بعض التجار يقدرون هالحب؟.. أشك!..
إقرأ المزيد...

مانشيت وتعليق

3/2/2010
* القبس- 30 مليون دينار هدية سالم العلي لمنتسبي الحرس ومتقاعديه
- بوشيخة: هذا درس بالكرم تجاه أهل الكويت!
* الوطن- الرياضة والمعاقون.. «درب خضر»
- بوشيخة: عاد الوسط الرياضي فيه دخلاء ومعاقين ذهنيا شكثرهم؟
* الراي- الجزاف يتلقى كشفا بأسماء جديدة للجان الأندية المنحلة
- بوشيخة: من وين تلقاها من كيفان والا الضاحية؟ على الله يتعلم من غلطته!
* الدار- استاد جابر.. كي لا تقع الكارثة!
- بوشيخة: الله يستر..نبيها طرب وما نبيها تنقلب نشب.. الله يلعن الحرامية!
* الأنباء- البحر: «الوطني» يحقق 265.2 مليون دينار أرباحاً صافية عن 2009
- بوشيخة: نفتخر ببنك الكويت الوطني اللي ما تأثر بالازمة المالية نفس بعض ملاّكه!
* السياسة- العراق يدعو مواطنيه لتسليم الوثائق والممتلكات الكويتية
- بوشيخة: اقبض من دبش!
* عالم اليوم- ضوء أخضر لـ«المعاقين».. أحمر لـ«البدون»
- بوشيخة: واعليه على البدون خنت حيلي والله تمرمطوا بسبب تأليفات النواب!
* الشاهد- الظواهر السلبية : 45 يوماً لقمع المعاكسات
- بوشيخة: افهم من كلامكم ان البلاك بيري حرام؟ والبي بي أم مكروه؟ شهالخرابيط؟
* الرؤية- الحمود للجسار: الاستجواب حق دستوري وممارسة ديمقراطية
- بوشيخة: صارت بين الحريم.. ارجوكم مافي احد يفاككهم خلوهم عسى تخليهم الحكمة.
* الجريدة- مجلس الوزراء يعتمد تعديلات المعسرين
- بوشيخة: الناس دشت السجن والاسر تشرذمت وانتو لي الحين بتعدلون؟

• كلمة راس
وصلني ايميل من دولة الامارات ممهور باسم (ولد زايد) يقول لي اذا ما تقدرون ككويتيين تبنون استاد ومستشفى باسم جابر .. عطونا فرصة كإماراتيين نبني لكم لأن جابر عزيز على زايد ولو كان عايش ما يرضى.. تبون الصج ضاق خلقي وتكدرت.. شوية دم محتاجينها بوجوه القائمين على الاستاد والمستشفى.. ومحتاجين فلقة حق المقاول لانه احرجنا مع العالم.
إقرأ المزيد...

مطعم الأمة

2/2/2010
ماني شايف داعي للضجة اللي أثاروها بعض النواب والكتّاب حول دعوة مسلم البراك للصحفيين البرلمانيين للغدا على حساب الكاتب نبيل الفضل.. بالعكس هذا أمر مشروع وما فيه أي مشكلة.. والدليل على كلامي أن مآدب الغداء والعشاء والإفطار تقام برعاية الحكومة للكل من نواب ووزراء وصحفيين وفراشين للمجلس.. مو هذا بيت الأمة؟ مو هذا بيت الشعب؟ بالتالي ما فيها شي اذا كل نائب تبرع بجزء من راتبه وحط حطة مع ربعه النواب وعملوا غدا أو عشا للصحفيين.. مو احنا بزمن العجايب؟ مو هذا خيار الأمة واختيار الشعب؟ بعدين تعالوا ياللي معترضين وقولوا لي ما حرككم الا هالغدا؟ وينكم عن الممارسات اللي تصير بالمجلس والا تبوني اذكركم؟ بيت الامه مرتع لكل بنغالي يسرح ويمرح بكيفه ولا حسيب ولا رقيب.. أذكركم بدخول الدكتور عمران القراشي يوم انخش بالمجلس بمكتب نائب ولا أحد درى عنه لا حرس ولاهم يحزنون.. تبون اللي ألعن وأدهى وأمر من غدا مسلم البراك على حساب نبيل الفضل؟ قوانينكم يا نواب الأمة اللي مالها لا لون ولا طعم.. هذي الرياضة وقفت بسبب قانونكم العور.. هذي غرفة التجارة تسرح وتمرح ولا أحد حولها.. هذي قوانين العمالة والمعاقين والبدون تلوع الجبد ولا همكم الا غدا مسلم على حساب نبيل؟ أي نعم أنا ضد ان النواب يحولون المجلس لمطعم والخوف كل الخوف ان بعد جم يوم الرومي تكبر براسه ويسوي حفل استقبال حق عيال بطنها بقاعة عبدالله السالم.. والخوف ان سيد عدنان ياخذ بخاطره ويسوي الأربعين بقاعة الوزرا.. وتعال عاد فك روحك.. السلف يبون والإخوان يبون وحلني عاد ذيج الساعة.. أما سالفة مسلم البراك العمية فأنا انتظر تصريح اللي يمشي ويقول الا الدستور.. أشوفه ساكت..

• كلمة راس
عزيزي المواطن الكويتي ثلاثة امور حاول انك ما تورط نفسك فيها.. بنيان بيت العمر لأنه يذبحك بعز شبابك.. وتجديد الليسن لان السكر راح يطلع من خشمك.. وتجديد رخصة محلك لان «الغرفة» بتاكل فلوسك من هالشق لي هالشق..
إقرأ المزيد...