سياسة العيد

2/12/2009
الله فكنا بالعيد من تصريحات النواب وردود الوزراء وخرابيط الناشطين السياسيين وهرطقات بعض الكتّاب.. دش علينا العيد مع المطر والهوا البارد اللي خلا الرهش سيد الموقف والكستنة صاحبة اليد الطولى.. وجاي اللومي والمرامية على رأس القائمة.. شزينها الديرة بدون مجلس يطنطن وحكومة تتخشش.. يا حلاة الكويت بأهلها الطيبين البسطاء وسهراتهم الجميلة اللي محمد هايف يبي يوقفها.. ويا حلاتهم واهما يتسوقون ويشربون الموكا والفوربتشينو بدون أخبار الطبطبائي وخزعبلات البراك ودستور السعدون الخاص.. شعب بو ناصر شحليله وأهو مستانس بين الكوت بوستة والسبيتة والسمرات وطلعات الحداق والبر.. لا سياسة ولا مغثة ولا غيرها.. بالفعل انا اكتشفت ان السياسة القبيحة غطت على جمال ورونق الشعب الكويتي الجميل.. حتى يمعات العيد كانت بين الأهل والأحباب والأصحاب خالية من الهم السياسي وتركزت على الفرح والتفاؤل والالتفاف على أسرة الحكم.. نعم قد تكون قضية حل الأندية طاغية على الحديث والحوار بحكم ارتباط الشعب بكرة القدم.. لكن تبون الصج يا زين الكويت بدون سياسة.. أو بالأحرى يا حلاة الديرة وأهلها وأهما يتعاطون الجانب المشرق من الكويت وعيالها.. ترى الكويت مو بس مجلس وحكومة.. الكويت فيها فنانين ورسامين وممثلين ولاعبين ومبدعين يستحقون نسلط الضوء عليهم؟.. والا نواب المجلس ما عندهم الا التنهوص والصراخ والتأوه على ما ميش.. وهذي الكويت صل على النبي اهيا ديرتنا وفيها اللي نبي.. وعاشت لنا الكويت وعاشوا أهلها واللي يحب الكويت يضحي لأجلها.. يا حلاة الديرة وأهلها وتعسا للمؤزمين اللي صوروا لنا البلد على أنها استجواب وتصريحات مو أكثر..

• كلمة راس
اللهم لا شماتة.. افتكر اللي يقول ان دول الخليج سبقونا.. جان زين يشوف جدة والمطر.. ودبي والاقتصاد.. علشان يعرف ان الكويت حافظها الله بشيخنا العود صباح وولي عهده نواف وسمو الرئيس ناصر وأهلها الطيبين.. وهذا دليل على أن السياسيين صوروا لنا ان الخليج سبقنا علشان يغيبون عنا الواقع.. تبقى الكويت الأجمل الأفضل ماضي وحاضر ومستقبل.