الله ينور عليكم

15/12/2009
يا حلاة قادتنا وأهم يدشنون الربط الكهربائي بين دول المنطقة.. يا زين تفاعلهم الجميل وحبهم لبلدانهم.. لما شفت الشيخ صباح يبتسم فز قلبي وتمنيت تدوم هالابتسامة.. واحد مثله الله يحفظه مستضيف اخوانه اكيد يفرح بهالشي.. واحنا كشعب كويتي نفرح لفرح صاحب السمو.. واحنا طماعين نبي الزود.. ودنا العملة تتوحد والحدود تنفتح للخليجي والمقيم على أرض الخليج.. ودنا نشوف سكك حديد ودنا نشوف هالحب يترجم الى افعال على ارض الواقع.. عسى الله لا يحرمنا من ابتسامتك يا بو ناصر يا كبير يا راعي الأوله.. لكن هم بعد ودنا جماعتنا في مجلس الأمة يتعظون ويتعلمون من هالكبار الله يحفظهم.. يعني الديمقراطية اللي نتمتع فيها تبي إنجاز.. وإلا شفايدة الحرية بدون فعل؟ الواحد من زود المشاكل اللي يشوفها من مسلم وربعه وفيصل وتنظيمه الداثر والسعدون ومشتهاته للدستور.. قام يكفر بالمجالس.. يا ليت النواب يتمعنون ويشوفون بعقولهم القاده الكبار ويتعلمون منهم.. نبي مشاريع تربط مصلحة الكويت وشعبها ببعض ما تفرقهم.. نبي مشاريع واقتراحات تنفع الكويت وأجيالها القادمة.. وإذا الاستجوابات ملحة وضرورية ما في ضرر بس المطلوب شوية عقل.. والتجربة خير برهان.. الاستجوابات الأخيرة كلها مصالح شخصية وشخصنة وخرطي بخرطي.. شوفوا الرجال وتعلموا منهم.. ربطوا بلدانهم بالكهربا وأضاءوا الدنيا بأفعالهم.. كفو يا حكامنا.. كفو يا قادتنا.. كفو يا بوناصر قول وفعل.. والدور والباجي على النواب يفكرون ويستلهمون هالشي منك..

• كلمة راس
أنا الخليجي والخليج كله طريجي تبارك يا خليجنا تبارك.. أغنيه أسمعها بكل إذاعات الخليج وقنواته لما يكون وقت انعقاد القمة.. ياريت يطلع لنا شاعر ويكتب شي يديد على الأقل نسمع أغنيتين مو أغنيه والسلام.. أما مجلس الأمة فعندي أغنية عنه راح أقولكم عنها تالي..