قرب الشيوخ شِيخة

11/12/2009
تعودنا من الصغر أن أي أسرة حاكمة في العالم القرب منها يزيدنا شيخة وعز.. واجدادنا وابهاتنا ياما سولفوا لنا عن كرم الشيوخ لشعوبهم.. وعطاياهم الخيرة وأخلاقياتهم الراقية.. ترى الشيخ انسان ما يختلف عن أي انسان ثاني.. بس يتميز بصفات المرجلة والفروسية والكرم واحترام الكبير والصغير بزود.. لانه تربى على هالشي.. ولأنه انصب كل اهتمامه بهالجانب.. وتبون الصج أنا عاشرت شيوخ الكويت، رجال وينحطون عاليبين ويشوفون الشعب بعين واحدة، ويستحقون ان الواحد يكون من شعبهم اللي يحكمونه.. لكن محمد الجاسم الله يرضى عليه.. صارله شهرين يتبرأ من علاقته بالشيوخ؟ ويصرح من خلال مقالاته بأنه ما تربطه أي علاقة في الشيخ ناصر صباح الاحمد وزير الديوان! ليش ما أدري؟ يعني هل الجاسم يشوف روحه فوق الشيوخ؟ هل ما يتشرف بمعرفتهم مثلا؟ والا يعني الاخ شايف ان قربهم ذل؟ أو عنده عقدة من الشيوخ وتحديدا من الشيخ ناصر الصباح.. او يمكن يشوف ان بو عبدالله عنده اخطاء، بالتالي ما يستحق معرفته؟ في الف «ان» بالموضوع.. أنا عن نفسي أتشرف بالشيوخ كلهم والشيخات بعد كبيرهم وصغيرهم.. لانهم خوش ناس وطيبين ويحبون الكويت وايد.. بس الجاسم يصر بمقالاته انه ما يعرفهم ولا يعرفونه.. تدرون شلون؟ أنا أقول المشكلة في الجاسم مو في الشيوخ أكيد.. يمكن كثر ما شلخهم بمقالاته وانتقدهم انتقاد هدام.. قام يصد عنهم! أو يمكن بعد ما ترس خدوده من خيرهم ما قدر يرد الجميل لهم فانحرج وقام ينكر علاقته فيهم؟.. والا يمكن قالوا له شي وفهم هالشي غلط فما حب يكشف عمره! افتر راسي منك يا الجاسم.. صورك تارسة الجرايد مع الشيوخ.. علي الخليفة ترسك دعم.. ومحمد الخالد رزك بالطالعة والنازلة.. يات على بو عبدالله يعني؟ شفيك تتنكر منه بشكل خاص ومن الشيوخ بشكل عام.. ترى رفجة الشيخ شِيخة.. الا اذا انت مو مقتنع فيهم هذا شي ثاني..

• كلمة راس
الحبيب يقول في مقاله الانترنتي «ان الدار تهين وتجرّح الشيوخ» والله محد شلخ الشيوخ وجرّحهم غيرك.. ولا احد كثرك تجرأ بصفاقة ووقاحة القلم على آل الصباح.. محد سلم من لوثة قلمك.. فلا تبيع شرف القلم لانك ما تملكه.. والدليل ناصر المحمد وغيره من الشيوخ، وفي اسم ما أقدر أكتبه لأن القانون ما يسمح لي.. جبح معقد من الشيوخ.