عطني اسم أمك

26/11/2009
بعض النواب قاموا يكتون فال ويضربون الودع بسبب استجوابات زملائهم وتصعيدهم وتحديهم للنظام السياسي في الكويت.. فتلاقي تصريحاتهم مخربطة ومالها أي أساس من العقلانية.. تحصلك نائب يوم الأحد يمدح وزير الداخلية وينتقد وزير الخارجية.. الاثنين ينتقد وزير الداخلية ويهدد وزير الخارجية بالاستجواب.. ونائب ثان مفتر راسه ياشايل له شمعة ورايح امن الدولة.. أو ماخذ معاه قراطيس ورايح النيابة.. وبعد يومين يسولف عن احترام القانون! حالة النواب غريبة عجيبة.. ولا تستغربون اذا شفتوا نائبا يروح حق ساحر وثان يروح حق مشعوذ علشان يكشف له.. وساعتها بيقول له الساحر عطني اسم امك واقول لك اللي بيصير.. على طاري اسامي الامهات آنا أعرف اسامي امهات كل النواب.. وحاولت اسوي لهم «عمل».. دشيت المطبخ وخلطت أسامي امهات النواب مع هردة وشوية حسو.. تالي حطيتهم بالفريزر اسبوع.. ولما طلعت الخلطة وفتحتها.. شميت ريحة تلوع الجبد.. على طول يبت الجدر وحطيت الخلطة على الجولة مع شوية ماي.. وخليتها تفوح لين خاب ثناها.. وتشكل الدخان أو البخار من فوق الجدر بالجملة التالية (حتى لو) واحترت فلجأت لواحد من الربع اسم امه بدرية.. وقلت له السالفة.. قال لي مالك الا تروح حق ولد ليلى تراه يفهم بهالأمور.. وبالفعل فسرها لي وقال.. حتى لو جملة، لي أخذت أول حرف من كل كلمة تصير (حل) يعني المجلس رايح ملح بسبب تصابي النواب.. بعضهم طبعا.. علشان جذيه عرفت سبب تصريحاتهم وتخبطهم.. وقولوا آمين..

• كلمة راس
قضية الرياضة وحل الأندية لازم نسوي لها عمل.. علشان جذيه ارجو تزويدي من اللي يعرف أسامي أمهات رؤساء الأندية.. يمكن نقدر نكتشف الحل والسبب ونعالج قضيتنا.. ونفتك من هالربربة.. ونرتاح وناخذ كاس العالم بالمعاياة.. ويمكن ننظم كاس العالم في الكويت لتصريحات النواب..