يعني بو عمر

8/12/2009
تبون الصج انا بحاول اتقمص دور بوعمر وأحاول أكتب بطريقته وعلى ستايله اللي هاب فيه هاليومين.. بجرب حظي يمكن يرفع علي قضية وبالمرة اقلده عدل وارفض دفع الكفالة..(طبعا بكتب مقال عن بو صباح رئيس الحكومة).. جيكو علي بقلد بو عمر من المقدمة.. وصلتني معلومات من ضابط استخبارات روسي ميت قبل ستعش سنة..(ياني بالحلم) يقول الضابط هيلقوووف ان (م) التاجر الهولندي قاعد يحاول يوصل حق وزارة التجاره علشان يزور بطاقة التموين الخاصة فيني وتروح علي ماجلة الشهر...(شرايكم جني ضبطت الدور) خلوني اكمل تكفون...وهالشي طبعا طعن بخاصرتي وانا مستهدف وحسب ما نقل لي ضابط استخبارات هنقاري صار له ست سنين بغيبوبة..(قوية بس هم حلوة خل نضحك) المهم يقول الهنقاري شبروحيس..ان التاجر (م) حاول أكثر من مرة انه يثير الفتنة بين عائلتي الكريمة..مرة يقول حق شيوخة لا تسمعين كلام ابوج..ومرة يقول حق ام شيوخة ديري بالج ترى بوشيخة عنده خرزه يخلص فيها شغله ويقص عليج..وانا ماراح اسكت وراح افضح ممارسات رئيس الحكومة لانه كل يوم يتصل بالتاجر (م) ويقول له هاجم بوشيخة لأنه بوشيخة عنده اتصال مع استخبارات بومبي اللي يلبسون قميص وشورت بني (شدراهم؟؟) بس انا لهم وما راح اخليهم..ووصلني خبر اكيد من مرت اوباما ان رئيس الحكومة داز كتاب حق اوباما (ولك شنو انت بو شلاخ) المهم داز كتاب اوباما حاطه بالدرج الثالث بملف لونه أزرق مكتوب عليه ان بوشيخة مينون والدليل انه اذا قعد مع واحد عشر دقايق يتخيل انها عشر سنين ويبدي يخربط ويجذب ويخرف..انا لكم يا رئيس ويا (م)..وراح اكشفكم..
تعبت ما اقدر اكمل يخرب بيته بو عمر باباي شيصير له..من وين اييب هالحجي..الظاهر مو منه من نومة الخيمة.

• كلمة راس
فيصل المسلم مو معتوه ولا غبي ولا أثول ويدري ان الجلسة اذا تحولت سرية راح يتوهق ولازم يقول اسامي النواب اللي قبضوا على قولته ويثبت هالشي بتقديم الشيكات بالتالي راح يعميها ويخربها ويطلع من المولد بلا حمص..فأعتقد انه راح ينسحب ويصير بطل ويقلد السيد القلاف..بس هم ما راح تطوف على الشعب الكويتي..