بو شيخــــــة

استجواب.. كلش مو طائفي


23/6/2011

التحالف الوطني والمنبر الديمقراطي أصدروا بيان واضح ومرتب يوضحون موقفهم من كتاب التعاون مع رئيس الوزراء، والبيان يقول وبوضوح ان الاستجواب طائفي ويزرع الشقاق في المجتمع!
نواب التنمية والاصلاح ومنهم النائب وليد، طلعوا وصرحوا، واستغربوا، وقالو «وين الاستجواب طائفي ونحن نتحدى ان الاستجواب طائفي» بكل ثقة يقولون نتحدى لو الاستجواب طائفي!
انا اقدر اعتبر هالاستجواب مثل الرقية، من اي صوب نشوفها تطلع رقية، من تحت من فوق، يمين يسار هي رقية، ومشكلة الاستجواب اللي قدمه الثلاثي انه طائفي والنواب من اول يوم دشوا المجلس كان واضح ان اجندتهم طائفية، يعني لو نشوفها من تحت لي فوق تعتبر طائفية!
الموضوع مو موضوع ايران وعلاقتها ورايهم فيها، هذي دولة تعرف تدافع عن روحها، المشكلة بالاستجواب انه يتكلم عن شريحة من الناس ومن النواب اللي يعتبرهم النواب خطر، وانهم متحدين مع الرئيس، وهم واضحين في استجوابهم يتكلمون عن تحالفات الرئيس مع فئة اجتماعية واخر شي يقولون وراس التنمية الاستجواب مو طائفي!
يعني لو واحد اول مرة يدخلونه المجلس ويقولون له شرايك بالاستجواب بيقول لهم طائفي من عرجه!
لو يسالون احد هالسواقين اللي يسوقون سيارات النواب عن رايهم بالاستجواب هم بيقولون طائفي مع انهم ما يعرفون يقرون عربي!
لو يسالون راعي البرد اللي واقف برة المجلس شرايك بالاستجواب بيقول لهم انه استجواب طائفي وبارد، وابرد من البرد اللي عنده!
يعني مهما يحطون له مكياج يسوون عمليات تجميل لبراطم الاستجواب يقصرون خشم الاستجواب يشفطون بطن الاستجواب.. هم في النهاية بيطلع اسمه طائفي!