بو شيخــــــة

أمثال صينية للكويتيين


12/7/2011

اليوم بعطيكم كم مثل صيني من الصبح، تاخذونه بعد الريوق، علشان تزدادون حكمة على حكمة! المثل الأول: «النمر يضع مسبحة بوذا على رقبته»، وهذا المثل يقال للولد النصاب، اللي يتظاهر بالدين والتقوى، وانه خوش انسان، ولكن في الحقيقة هو نصاب كلكجي، طبعا ممكن نطبق المثل على بعض نوابنا اللي فجأة يصيرون مؤمنين، ويشيلون مسابيح الورع، وهم اكبر نصابين في العالم!
المثل الثاني: «ضفدع الطين يتثاءب» وهذا المثل يشير الى هذا النوع من الضفادع فمه كبير، ودائما مفتوح، والمثل عن الناس الذين يفاخرون ببطولاتهم المزيفة وكلامهم الفارغ، فلا تغترون وايد بنوابكم، مبطلين حلجهم اربع وعشرين ساعة، فهم مثل ضفدع الطين!
المثل الثالث: «يفتش عن العظام في البيض» وهذا المثل يقولونه للانسان اللي يدور اي سبب، ويفتش عن اي شيء كمستمسك ضد غيره، وهذه حالة نوابنا - هم رجعنا لنوابنا، الظاهر الامثال الصينية كلها تطبق على نوابنا - اللي يدورون على العظام في البيض، ومقنعين ربعهم انهم راح يلقون العظم في البيض!
المثل الرابع: «التبرج قبل دخول النعش» وهذا المثل يقولونه للي يبي يكشخ حتى وهو ميت، ويبي يغطي وجهه الحقيقي، هذا المثل ممكن نطبقه على تجمعاتنا السياسية الميتة، اللي تتجمل وهي ميتة، واللي تحاول تحيي روحها بالمكياج الصارخ والصراخ في الاستجوابات، بس هم ماكو فايدة، لان وجههم الحقيقي بين في الاستجواب الاخير، ومهما يسوون ويحطون مكياج، تظل القباحة فيهم!
المثل الخامس: «من يعلق كيسا في الهواء يحصد الهواء» وهذا المثل ينطبق الف بالمية على المدرسين، اللي لاحقين النواب ووزير التربية علشان كادرهم وعلشان ينصفونهم، وآخر شي حصدوا الهواء، من ورا كادر يفشل، وهذي آخرة من يمشي وراهم!
twitter.com/bushi5a