بو شيخــــــة

وين مسافر؟

7/7/2011

هذا ابيخ سؤال يسألوني بالصيف، يعني ما يقول لي بتسافر ولا ما تبي تسافر؟ لا الاخ ثقة يقول لي وين بتسافر، حسباله «بيل غيتس» اخوي بالرضاعة!
لا والابيخ لمن انا قاعد مع ام شيخة نتكلم في الشأن الدولي ينط واحد ويسألنا وين بتسافرون هالسنة؟ يعني الحبيب صايد الحركة وكانه احنا كل سنة قاعدين نسافر هني يمشي وهني انا ابتلش مع ام شيخة وكلامها اللي تقوله باليوم سبع مرات انت ليش ما تسفرني وانت ما تحب تسافر الا بروحك وانت بخيل ما تصرف علينا.. وشمعنى ام فلانة سافرت وام علانة طول الصيف بأوروبا!
وطبعا انا ارد عليها واقول لها يا ام شيخة انا مو نائب في البرلمان انا مواطن على قدي اشتغل موظف بهالوزارات من وين ادور فلوس سفرة بالالاف اقول لها يا ام شيخة انا ما استفيد من الاستجوابات ولا انا استفيد من مركزي كموظف محترم ونوابنا ما شاء الله عليهم صيفا شتاء ربيعا خريفا كل راكبين طياراتهم ويفترون على كل دول العالم ولو بيدهم راحوا القمر والمريخ مع الاميركان!
قلت لام شيخة يا مرة اليابان فيها زلازل، اندونيسيا فيها براكين، وماليزيا حر ورطوبة، وبانكوك فساد واخاف على نفسي، والبصرة ما فيها كهربا ومصر مظاهرات في التحرير ودبي زحمة وتركيا غالية واوروبا فيها بكتيريا واميركا بعيدة والبرازيل ما نعرف برازيلي ما في غير نروح الاحمدي نصيف يقولون براد بالاحمدي!
وطبعا بغيت اكمل كلامي واقنعها بان احسن ديرة في العالم ديرتنا وان الغبرة لها فوائد وان الجو راح يبرد وكلها يومين ويخلص الصيف وانه نوفر فلوسنا لليوم الاسود بس ما شفت غير العين الحمرة وتعرفون الباجي اكيد عشتوا مثلي هالتجربة!