مجد بن حثلين

في قناة «المختلف» المتجددة شفت لقاء لأمير قبيلة العجمان الشيخ سلطان بن حثلين.. تفاجأت بمعرفة هذا الرجل وإلمامه العجيب بكل اللي قاعد يصير في الوطن العربي والعالم الاسلامي والعالم الدولي.. ولقيت عنده تشخيصات رهيبة لوضعنا الداخلي.. بو فلاح يحسسك وانت تستمع لحديثه بأنه مركز دراسات ناطق.. عنده دراية غريبة بنسيج المجتمع الكويتي وبأدق تفاصيله.. قليل الحديث وجزيل المعاني..

يشهد الله على اني ما أعرفه شخصيا ولا التقيت فيه موليه.. لكن هذا الرجل سليل المجد ومحد ينازعه عليه أبد.. طبعا كالعادة بوشيخة فر قرص البحث واتصل واستنجد بكل اللي يعرفهم من قبيلة العجمان باستثناء سعد ومحمد لأنهم صاروا من عيال الخالدية.. ما علينا.. وعرفت ان بو فلاح اول من أسس مبرة لقبيلته ولحقته كافة القبايل.. وأول من نظم فرعيات القبائل لاختيار الافضل ولحقته كل القبايل بس بصورة ممسوخة.. ودريت ان بو فلاح له جاهيات بكثر شعر رأس نواب العجمان من خلالها انقذ وزوج وأصّل اشخاص من كافة الاطياف.. له مساهمات ما يحب احد يذكرها بعمل الخير.. له علاقات جبارة من أدنى الأرض إلى أقصاها.. وله محبين من كل القبايل والحضر بكل تفرعاتهم.. اذهلني هذا الرجل بثقافته الراقية وتمنيت لو ان الكل يقتدي فيه من ابناء قبيلته.. ولأن الشيخ سلطان بن حثلين كفاءة تمنيت لو يكون بالمجلس الأعلى أو يكون مستشار للحكومة.. لأنه انسان جدير بالثقة والاحترام ويخاف على الكويت بشكل مختلف عن خوف الآخرين.. وبوفلاح نموذج موجود بالكويت مثل باقي النماذج الراقية.. وما من خوف على الديرة وبوفلاح ومن مثله وشرواه فيها.. • كلمة راس سبحان الله الامير سلطان بن حثلين معروف ولا يحتاج تعريف لكن لقاءه في «المختلف» وسع دائرة اللي يعرفونه اكثر.. ولا تدش ديوانية بالدائري الثاني إلا وتلقى روادها يقولون.. كفو عليك يا بوفلاح صج انك من أهل الكويت وتستحق الاحترام بكل جدارة.