إجازة دائمة

أقسم بالله العظيم ان اللي قاعدين يسوونه بعض النواب هاليومين غلط وعيب ويفشل ولا هو من اخلاق ناس بمقام التشريع والرقابة.. شي ماصخ باصج ماله معنى.. كل نائب صاير علينا كاوبوي وشاهر سيف المنطق الأعوج.. ونازل طالع بتصريحات وعنتريات مالها معنى أبد.. لعنبو غيركم انتو بإجازة.. فهموا اجااااااااااااااااااااازة.. جابلوا عيالكم.. ارتاحوا.. علشان ترجعون تالي بأفكار مهمة.. يبا العمل البرلماني ماهو رقابة والسلام.. وله اسس ومعايير.. عيب يا نواب الامة المكلومة.. عيب يا نواب الشعب الدايخ اللي انتخبكم.. عيب هذا الارهاب الصبياني تجاه رجال شرفاء قبلوا المسؤولية..

عيب هذا العصيان السياسي لتمنيات صاحب السمو.. لا يغركم هذا أو ذاك بكتابته البذيئة.. لا يهزكم زعطوط يكتب بجريدة.. لا ياكل بعقلكم حلاوة واحد اثول مثل العود اللي استشرف آخر عمره.. البلد ما تتحمل.. الناس ملت منكم.. عيب والف عيب عليكم هذا اللي قاعدين تسوونه.. كل يوم طالع نائب وموجه ثلاثمية سؤال حق الوزراء.. حمدوا ربكم انكم بالكويت وبوسوا ايدكم مقلوبة.. طاح حظج يا ديمقراطية اذا صرتي بيد هذولا.. وبعدين وين شرف الخصومة ياللي بعضكم ما عنده علم عن شرفها.. وشنو لغة التهديد المنحطة اللي قاعدين تسوقون لها.. ارتقوا ركدوا.. والله ثم والله ان الشعب الكويتي تفل عليكم العافية.. وكره اليوم اللي صارت عنده ديمقراطية بسبب ممارساتكم.. نازلين فينا تصريحات على الهبني.. اذا فيكم خير وفيكم مرايل حلوا قضايا الوطن الكبرى.. مو قضاياكم الصغيرة.. الله يلعنها ديمقراطية انتو اهلها.. وقولوا آمين عساكم بإجازة دايمة انتو ودستوركم اللي دستوا ببطنه.. • كلمة راس في مقالة الامس «مجد ابن حثلين» وقع خطأ محمود في كناية امير قبيلة العجمان الشيخ سلطان بن حثلين.. كنت اسميه بو فلاح والصحيح انه بو راكان.. بس هم ما رحت بعيد لأن بو راكان هو بيلوجيا ابو فلاح بن راكان بن سلطان بن حثلين حفيده، ولأن ابن الابن ابن فكان الخطأ محمودا.. مما لا يقتضي التنويه وإنما الشرح فقط..