بو شيخــــــة

معلم مقهور


5/7/2011

تالي الليل داق علي: يابوشيخة الحقنا اكتب عنا!
قلت له: خير منو معاي؟
قال لي أنا معلم!
سألته اسمك معلم، قال: لا يبه شغلتي معلم؟ استغربت قلت له معلم شورما ولا حدادة، قال لا، معلم مدرسة مثل كل هالمعلمين اللي يراكضون ليل نهار ويجابلون عيال الناس!
وكمل كلامه ولا خلاني اسأله منو وشنو، قال لي: يا بوشيخة انا معلم من خمستعش سنة، احضر، واوقف بالطابور، وأحيي العلم، وادرس، وألاحق الاولاد، واتابع دفاترهم، وحضورهم وغيابهم.. يعني المعلم في الكويت الوحيد اللي يداوم ويستغل طول اليوم، ولمن يروح البيت هم يكمل شغله ويحضّر، ويصلّح، ويعد ويسوّي وسائل، وكله من جيبه مو على حساب الحكومة!
وكمل وقال: تدري ليش يابوشيخة، لان المعلم ما يحصل امتياز اذا ما دفع من جيبه للمدرسة، وسوّى وسائل، مع ان الامتياز في التربية يابوشيخة مو مثل باجي الوزارات، يعني بالميت يعطونا مكافأة ميتين دينار بالسنة، وغيرنا الف دينار وانت صاعد!
وما وقف المعلم وقال: يابوشيخة حاسدينا على عطلة الصيف، حسبالهم ثلاث اشهر مثل قبل، ما يدرون انها شهرين بعطلهم، يعني حالنا حال الموظفين العاديين، فما في زود ولا ناقص! وغير هذا نشتغل مسائي، ونصحح، ونشتغل كنترول، ومكافآتنا ما تنزل الا بعد بسنة، انا اشتغل مسائي لي الحين ولا شهر نزل لي، حتى عمال النظافة ياخذون معاشاتهم اول بأول!
يابوشيخة، كل الوزارات حصلوا كادر، لا احد تهاوش، ولا احد قال شمعنه، بس وصلت للمدرس قالوا له، ليش ياخذ، وانه لازم لائحة، واحنا نعطيه «بونص»، بونص شنو يابوشيخة احنا نبيع ملابس وفانيل وننطر الارباح، علشان نحصل «بونص»!
بعد فيني يابوشيخة بس ما اقدر تعبت، وما قول الا الله يسامحهم.. وبس بروح انام الحين تبي شي؟ وطبعا المعلم سكر الخط بعد ما سمعت صوت طلق ناري! واطالب الثلاث سبعات سابقا يلحقون عليه!