بو شيخــــــة

كل نائب وجنطته


14/7/2011

بما انه كل نائب شايل جنطته، راكب طيارته، مسافر للديرة اللي يحبها، فاقترح عليهم وهم رايحين، يقارنون بين طيارة «الكويتية» وبقية خطوط الطيران، حتى يقعدون السنة الجاية ويحلون مشكلة الكويتية، ويخلصون البلد من الخساير، ويرفعون اسمها لانها تحمل اسم الكويت، مو اسم بوشيخة ولا ام شيخة، ولا علان ولا فلان!
واقترح وهم نازلين من الطيارة، ويفترون في مطارات العالم، يشوفون شلون صايرة مطاراتهم، من نظافة، وترتيب، وتطوير، وخدمة راقية، ووجوه بشوشة، مو مثل مطارنا اللي الواحد يقولك داش سوق شعبي، وريحة التدخين بكل مكان!
واقترح ايضا وهم راكبين التاكسي ورايحين فنادقهم بوخمس نجوم، يشوفون الشوارع هناك، ونظافتها، واحترام الناس للمرور، علشان يحطون حل لأزمة المرور في الديرة، اللي فيها ثلاثة ملايين وفيها ازدحام اكثر من مدينة بوعشرين مليون نسمة!
واقترح يتمشون في اسواقها، ويقارنونها مع اسواقنا، اللي تفشل، لا رقيب ولا حسيب والغش اشكثره عيني عينك، التاجر يرفع الاسعار ولا في أحد يقوله ليش، وشحقه!
واقترح يمرون على المناطق، يقارنون بين خدماتهم والبيوت، وبين مناطق مثل الجليب، وغيرها من المناطق اللي تفشل، واللي صايرة مكان للمجرمين والحرامية!
واقترح يسألون حكوماتهم عن القوانين وشلون تطبق، وشلون يلتزمون فيها، وشلون الناس تراقب وتحاسب النواب قبل الوزراء وشلون يتحاسب الوزير والنائب على قلم رصاص واقترح بعد يزورون برلماناتهم، ويقابلون نوابهم ويتعلمون منهم شلون يتكلمون، وشلون يعارضون، وشلون البرلمان مكان محترم للناس بدل شغل البلطجة اللي قاعد يصير عندنا! وأخيرا اقترح يشترون لنا صوغة ويوزعونها على ناخبيهم، ما دام مو فايدينا بشي!
twitter.com/bushi5a