صدقوهم
29/6/2011
اذا يبت عامل عربي ودخلته البيت وقلت له تعرف تصبغ؟ بيجاوبك أعرف، وأعرف امسح، وأعرف صحي، وأعرف أمدد كهربا، وأعرف اطبخ وأعرف أركب الدش، وأعرف العب بلياردو وأعرف ازرع، وأعرف ادرس رياضيات.. طبعا لازم تصدقه!
واذا سألت واحد في الديوانية شنو آخر اخبار تسونامي اليابان؟ راح يجاوبك ان الاجراءات اللي اتبعتها اليابان سليمة وانهم سيطروا على تسعين بالمائة من المفاعل النووي وان امريكا ساهمت في معالجة اخطار المفاعل، وان السمك الياباني حاليا احسن من كل اسماك العالم ووفقا لدراسات حديثة فان اليابان راح تتخطى ازمتها الاقتصادية.. طبعا لازم تصدقه!
واذا سألت راعي التاكسي الاسيوي انت تعرف وين بيتي؟ راح يجاوبك بدون ما تشرح له العنوان طبعا اعرف، واعرف كل طرق الكويت والبصرة والخبر والدمام واقدر اوصلك حتى مكة وارجعك في نفس الليلة واقدر اسوق السيارة وانا مغمض.. طبعا لازم تصدقه!
واذا سألت صحافي كويتي عن اخر الاخبار؟ وقال لك انه قبل شوي كان مع احد القيادات في جهاز حساس وانه في اخبار اكيدة عن تطورات راح تصير خلال ايام وانه وعده انه ما يكشف السر بس اهو قالك لانك تمون عليه وانه راح تصير ضجة كبيرة سبب هالخبر.. طبعا لازم تصدقه!
واذا طلع نائب وقال لك انه احنا نحارب المال السياسي ونحارب اللي يبيع ضميره علشان مصالحه الخاصة وانه هدفنا في الحياة والممات مصلحة الكويت والشرق الاوسط وانه راح نفديها باموالنا وعيوننا.. طبعا اكيد ولاشك.. لازم تصدقه!
الأربعاء، 6 يوليو 2011
