بو شيخــــــة

الحمير الأربعة


20/6/2011

في الجرايد قالوا إن الاحصائيات الرسمية في دولة الكويت تقول، إنه بعد البحث تبين ان عدد الحمير أربعة فقط لا غير؟!
طبعا ليش هيئة الزراعة طلعت بيان وقالت في بالديرة اربعة حمير؟ لان الناس قالت انه في مطاعم تبيع لحم حمير، مع ان سعر الحمار في الكويت اعلى من سعر اربعة خرفان، ويمكن الاشاعة طلعت مع الخبر الي نشروه الصحف، عن خطوط جوية كانت توكل مسافرينها لحم حمير!
المهم الموضوع كبر، وانتفخ، والناس قامت تقول شنو هالمطعم، وحق منو المطعم، وهل المطعم على البحر ولا في البر، وفي اخر الفيلم تبين انه حلم، يعني اشاعة!!
نرجع لحميرنا الاربعة، لاني بالفعل اعتبرهم كائنات نادرة في الكويت، ويمكن ينقرضون، ولازم اصور معاهم للذكرى، لانه بعدين راح نتحسف لانه ماصورنا معاهم للتاريخ.
ما علينا، وانا اسف اذا دشينا في سوالف الحمير، وهدينا وضعنا السياسي المتكهرب، مع انه صيفنا كالعادة بدون كهربا، بس هالايام الوضع احسن شوي، لانه صيف والنواب كل واحد مجهز جنطته، الي رايح المكسيك، والي نازل على البصرة، والي رايح عبادان، وبيهدون الجمل بما حمل، والناس ومشاكلها، التربية وبلاويها، الصحة ومصايبها، وما يرجعون الا بعد خمسة اشهر، وهذي أحلى الشهور في الديرة، الشوارع فاضية، والديوانيات هادية، والسوالف خاثرة والناس تقعد بهدوء في المجمعات، تسمع موسيقى واغاني رومانسية، والطيور تغرد على كيفها، واذا الناس بيتناقشون عن مسلسلات رمضان، واخبار الكنغر في استراليا وبس!