قريت

16/11/2009
قريت مقال الكاتب الصحفي نبيل الفضل المنشور بجريدة الوطن تحت عنوان (Irex).. وحاشني عقر بقر.. تالي تعومست.. فجأة حسيت بالأرض تدور من حولي ثلاث مرات بالثانية.. ومرة واحدة صفنت واسترجعت الذاكرة وشفت انه كلام منطقي ومتناغم وجميل.. اي ليش لأ.. اللي قاعدين يأزمون الديرة ممكن، وأكيد قاعدين ياخذون الثمن الإصلاحي بطريقة ما توحي أنها عمالة وخيانة عظمى.. الأدهى والأمر ان هالجم نفر قدرت احصرهم.. شغلهم الشاغل تخريب ديمقراطيتنا وتشويه مجتمعنا تحت ذريعة الدستور (اللي داسوا ببطنه).. وأول مرة أعرف أن بوبراك يؤمن بنظرية المؤامرة.. مو منه من اللي شافه منهم..
قريت مقال لواحد ما غيره، اللي عقب دهنه والصمان قام يروح بيروت وجزر المهايط.. الله يرحم ذيج الايام.. يتقلقص بالدرجة السياحية.. وكل نص ساعة يعد فلوسه.. وكل ثمان دقايق يجيك على جوازه اللي مافيه الا ختم سورية والبحرين ويمكن بانكوك.. ما علينا.. هذا الاجلح الأملح اللي متعود يقول حاضر سيدي.. ياي يعلم محامي ماهر وسياسي محنك صار له سنين وبنين شلون يتحجى ويصرح.. مو هذا الزمن ردي اللي خلاه يصير سياسي وكاتب.. عاد هذا واحد من المجموعة اللي كتبت عنها فوق..
وقريت مقال النائب الأسبق والوزير الأسبق.. والكاتب اللي ان شاء الله ما يصير أسبق الحلو الأنيق اللبق علي البغلي المحامي.. عن الدستور وسالفة الشيطان الأخرس.. وبالفعل عرفت أن حماة الدستور ما ينفعون يحمون روحهم من سوالفهم العمية.. والا أكو نائب ما يعرف يقول كلمة «الدستور» عدل شايل سيفه وداش.. السوق الداخلي.. وقاضب ورقة علشان يقول لنا ان الامة مصدر السلطات جميعا؟.. جبح نواب يقطرون ملاقة.. وعسل يا البغلي بالبشت وبالبدلة..

• كلمة راس
أنا كوني مواطن درجة أولى.. أتساءل وقصدي شريف.. اللي حل الاندية لأنها رافضة تعديل القانون على قولته.. هل طلب منهم بكتاب رسمي هالشي ورفضوا؟ هل ناقشهم.. وبعدين هل اللي عينوهم مكانهم بصامة مطلوب منهم الموافقة وأهم مغمضين؟ شهالعبو.. بس والله وحصلنا كبش فدا برتبة وزير.. وعلى قولة مطشر.. بعيد الدرب شيوصلك حيث المسافة بعيدة..