المواجهة

25/11/2009
في مرض منتشر بالديرة وايد خطير.. وتأثيراته ألعن من إنفلونزا الخنازير والسرطان مجتمعين.. أسهل شي بالديرة انك تقضب ورقة وقلم أو تفتح مدونة وتكتب فيها التالي.. فلان حرامي وأمه كانت حفافة وخال أبوه يبوق صل ودج من عمارة بو فلان.. والأسهل انك تقدر تفتري
كثر ما تقدر وتحط معلومات مغلوطة عن اي شخصية عامة.. نائب كاتب وزير تاجر شاعر اللي هو.. وممكن تنسبها بالتالي وتقول ان مصدر المعلومات (عبدالله بن سبأ).. انزين.. إذا واحد لايث يجذب يمكن نعديها.. إذا موظف صغير يجذب نمشي له الموضوع.. لكن المصيبة ان الجذب صار صفة ملازمة لبعض النواب والتجار.. ومو أي نائب أو أي تاجر.. تلاقي نائب ينحدر من عائلة عريقة ومو محتاج شي ويجذب ويبهرج ويتهم الناس بمناسبة وبدون مناسبة.. المصيبة إن فيه جم واحد مستفيد يصدقونه واهما مو مقتنعين بكلامه.. ويأيدونه بالطالعة والنازلة.. بالله عليكم نائب جذيه جذاب شالحل فيه؟ ولو انه يجذب بعقل أو جذبة بيضة نطوفها له.. لكن الحبيب يجذب وينقل كلام عن أكبرها وأسمنها ومحد يحاسبه؟ فلا تلومون الناس إذا جذبت وتجنّت مثله.. أما المثل الثاني فهم يهالو أو بالمعنى الأصح عيال تجار.. تلاقي واحدهم الصبح غترة وعقال وبالليل لابس قوملق.. ويتحجى عن المرجلة.. تحتار.. تشوفه إذا سولف يوهمك بالجذب انه يملك الكويت كلها وعنده شراكات عريقة مع شركات عالمية وأهو طل بعينه ما عنده ما عند يدة بونصيب.. تسمع كلامه تستغرب كل ما طلع مشروع ناجح يقول أنا شريك فيه.. وطايح له جذ وتخرف على العالم.. المصيبة وين.. المصيبة بعيال التجار اللي يملكون بالشركات أقل نسبه ويسولفون جنهم يملكون الشارع اللي فيه مقر الشركة.. وفوق شينهم قواة عينهم.. يجذبون ويهددون واهما يا الله من فضلك.. عيوبهم تارسة الديرة وبلاويهم اللي اكثر من دخان الزقاير وصمونة الهمبرجر.. هذي مصيبتنا بالكويت الجذب والتجني ما يكلفك إلا كرامتك وماي ويهك.. فهنيئاً لكم يابعض تجارنا ونوابنا.. ويوهكم نشف مايها وكراماتكم حالها حال دلاغ حنيف..

• كلمة راس
كل النواب يقولون وقالوا «المواجهة هي الفيصل» نعم وآنا أأيدهم وأقول إن المواجهة أفضل شيء.. وبالذات مع النواب والتجار اللي يموتون بالجذب.. لازم نواجهكم ونفضحكم لأنكم ما تفهمون الا هاللغة.. وأبشروا بالمواجهة يايتكم يايتكم.. من أموركم العامة الى الخاصة اللي خليتوها عامة.. بغباء!..