مصدقين روحهم !

23/11/2009
مساكين هالحرس الوطني إذا قعدوا، قالوا شنو هالحرس، ليش قاعدين، بس طايحين له أكل.. وإذا تدربوا، قالوا ها بيحلون المجلس، والدستور بيعلقونه - سمعت بيعلقونه على البلكونة بس البلدية مانعتهم - عشان جذي قاعدين يدربون الحرس علشان قمع المظاهرات اللي راح تترس الشوارع..!

خلونا نتصور ان المجلس علقوه، لا سمح الله، شنو راح يكون رد فعل الناس؟
1 - بعضهم يقول زين ارتحنا كم سنة، لي ربك يفرجها، وخلونا نشوف الحكومة شتسوي بعد ما كانت تقول ان البرلمان اهمه السبب، وبعد سنتين نتظاهر!
2 - بعضهم يقول لك، سنة وحدة كافي، لانه الديرة بدون نواب ضيقة خلق، ومو وناسة، خاصة ان الديرة ما فيها اي مجال للترفيه، بعد ما دش المد الأحمر البر وصار كل شي ممنوع!
3 - وبعضهم يقول انا بطلع مظاهرات ضد الحل بس مو الحين في فبراير، الحين توه داش البراد، وما لي خلق، بالربيع أحلى مع الأعياد، على الأقل الواحد يشتري له كرتون فوم علشان يعارض الحل بالفوم الملون!
4 - بعضهم يعترض بس مع الربع في الديوانية، قبل لا يلعبون هاند، بس عاد يطلع مظاهرات لارجاع النواب شكو؟يعني هو يتظاهر ويتعب ويصرخ وتاليها النواب يردون المجلس باردة مبردة، يعني اشدعوة النواب مسكتين ذابحين روحهم عالدستور، مواغلبهم صايرين مثل الحصالات!
5 - بعضهم يقول لا، لازم نطلع مظاهرات سلمية، مثل ما يبي الصحفي والمذيع والعسكري الكبير.. فيركب البورش ويتمشى في شارع الحب ويدق هرنات، يعني هم مغازل وهم معارضة!
باختصار يا جماعة، لا شغب، ولا مظاهرات، ولا هوسات، لانه المجلس وجوده وعدمه صاير واحد، لا وضررة صاير اكثر من نفعه والسبة ربعنا النواب!.. قال شنو الحرس يتدربون علشان يقمعون المظاهرات اللي بتطلع لو حلوا المجلس.. لا ومصدقين روحهم!