النواب فاهمين غلط
28/8/2011
خلونا نشوف شنو عندنا من مشاكل، ما في ديرة ما فيها مشاكل، بس الفرق انه في ديرة تحل مشاكلها وفي ديرة ما تحل، وفي ديرة ما يخلونها تحل مشاكلها، مثل ديرتنا العزيزة!
عندنا مشكلة الجامعة، طلبة متخرجين، مستانسين، مجهزين جنطهم واقلامهم رايحين الصالون مضبطين شعرهم شارين نظارات ريبان علشان يداومون في الجامعة فجأة يكتشفون انه ما في مكان شلون ما في مكان وينه الوزير؟ وينه مدير الجامعة؟ اي واحد يحل لنا الموضوع المهم صعدنا نزلنا يمين يسار اخيرا توصلوا الى حل ترقيعي نقبلهم الحين والباجي على دفعات يعني مثل النساف يشيل التراب على دربين وثلاث!
عندنا موضوع بوبيان والميناء البحري والمشاكل اللي عليها واللي يحاول البعض مع تحريض من بعض الاطراف ان يشعلون القضية والموضوع مهم للكويت وكل ما بنوا الميناء اسرع احسن وافضل للكويت وللعراق ونوابنا ما يدرون وين الله قاطهم لا حركة ولا بركة ويسافرون هاواي لحل مشكلة الميناء!
عندنا مشكلة الكهرباء اللي مو راضية تنحل كل سنة نفس القصة بنفس الوقت موتورات خربانة مكاين تحترق مناطق كاملة برمضان بدون كهرباء ومافي احد يتجرأ ويقول انه في فساد بالوزارة!
لو بقعد احسب ماراح اخلص من قصة مشاكلنا اللي تحتاج حل عاجل بس نوابنا خوش نواب هادين كل شي وصايرين دوليين فجأة يبون يحررون ليبيا وبعدين سوريا وبعدين القدس وبيمرون على كشمير وتايلند يعني اي ديرة فيها مشاكل حتى لو مشكلة ازدحام السيارات يبون يسقطون نظامها ويحلون مشاكلها لان النواب فاهمين غلط حسبالهم انهم نواب كأس العالم وكل واحد متخيل نفسه باتمان وسوبرمان.. رجاء قضبوا ارضكم وجابلوا ناخبيكم رحم الله والدينكم!
twitter.com/bushi5a
إقرأ المزيد...
الأحد، 28 أغسطس 2011
الثلاثاء، 23 أغسطس 2011
الكراج على حسابي
23/8/2011
يا جماعة الخير، الامور كلها تنحل بالتفاهم، وخاصة مشكلة الشركة الوطنية للطيران، انا وفقا لخبرتي في الطيران ولاني تقريبا كل شهرين ثلاث اسافر اروح دبي والبحرين والبصرة بالطيارة فانا عندي خوش اقتراح علشان اطلع الشركة الوطنية من هالمعضلة!
طبعا تسألوني شنو تقصد بالمعضلة؟ اقولكم ما ادري بس دائما اسمعها، والكل يقول معضلة فقلت اقولها مثلهم يعني مثقف وفاهم، المهم حل مشكلة شركة الوطنية للطيران وطياراتها عندي وانا بوشيخة!
فاذا الشركة ما عندها فلوس، واعضاء المجلس هم مفلسين انا حاضر ورقبتي سدادة من باجر اروح ابيع الذهب اللي عند ام شيخة وهالايام الذهب غالي وابيع الكابريس مع ثلاجتين من زمان حاطهم بدار الجيل واسلف الشركة على الاقل يدفعون فلوس البنزين للطيارة والعمال!
بعد شنو يبون مهبط خاص بالطيارة هم عندي، وراي بيتي شارع عريض ومافي زحمة او كلش كلش ينزلون طياراتهم على الدائري السابع والناس تنزل وكل واحد يركب سيارته ويروح بيته يعني العملية ما تحتاج لوية وكراج وبدل دهن وماي راديتر للطيارة ومن نفس المكان الطيارة تكمل طريجها!
طيب واحد يقول لي الطيارة وين تصفط تحتاج هذي هل لها حل انا بيتي في ارتداد خمسين متر وفيها مظلات يصفطون الطيارة عند بيتي وفي عندي سايق يغسل السيارة والطيارة يعني يقدرون يصفطون الطيارة عند الباب وسايق الطيارة هم اقدر انومه عندي بغرفة السايق!
واذا اقتراحي مو شي خلاص يبه ردوا فلوس المساهمين و«تصطفلوا» انتو وطيارتكم!
twitter.com/bushi5a
إقرأ المزيد...
الاثنين، 22 أغسطس 2011
بو مشاري عند السفارة
22/8/2011
قررت تلبية دعوة الجماهير المليونية لدعم الشعب السوري، أو الصج ما قررت، صاحبي بومشاري، لزم علي، الا تعال معاي بروح اعتصم، قلت له مثل ما تحب، هدينا الديوانية، ركبنا سيارتنا، وعلى مشرف، قلت له: بومشاري مو الاعتصام بساحة الارادة، رد قال: لا بمشرف عند السفارة السورية، لانهم بيوصلون رسالة!
بيني وبينكم قلت يمكن البريد مسكر وبيودون الرسايل ويسلمونها السفارة بايدهم، ما علينا المهم رحت الاعتصام وانا في بالي مظاهرات الستينات، ايام عز الشباب
لمن كنا نطلع ونهتف ضد اسرائيل، والاستعمار، والامبريالية!
ما اطولها عليكم، وصلت السفارة، الامن محوط المكان والناس واقفة، المصورين والصحافيين اكثر من الجمهور، كل هالدعاية، ومظاهرات في يوم الثلاثاء العظيم، والمسيرات المليونية في العالم العربي، واللي طلعوا في الكويت مية نفر، تسعين منهم سكرتارية نواب، وثلاثة جايين يطمشون، واثنين مباحث، وثلاثة حسبالهم يوزعون تموين ببلاش، وانا غصب ياي، يعني اللي استجاب للدعوة بس بومشاري!
هم ما اطولها، المهم وقفنا وبدينا نسمع الهتافات، ماكوا اسلوب كلش، الشعارات كلها سب، يعني سمعت كلمات مثل حمار، وجحش، وكلب وحصان وخروف.. وما سمعت لا تضامن، ولا حب الوطن، ولا مصلحة الوطن، يعني لو ينشرون الاعتصام كامل على الفضائيات، بدون قطع اكيد بناخذ اوسكار السب والشتايم، ومع الاسف كانت الشعارات مسبة للشعب في سورية قبل نظامها، ويكشف مستوى اللي قاعد يديرون التحركات السياسية والاعتصامات في البلد!
المهم بومشاري هو يهتف اول وثاني هتاف، أنبه ضميره، واستسخف نفسه على هالحركات والشعارات، وقرر يهدهم، تلفت يمين يسار يدور علي، وانا من اول دقيقتين كنت راكب
السيارة وراد البيت! بومشاري
لي الصبح ناطرني عند السفارة!
إقرأ المزيد...
الأحد، 21 أغسطس 2011
منو بوشيخة ؟؟؟
21/8/2011
يا جماعة والله دخت وافتر راسي الكل يسأل ويبي يعرف منو بوشيخة ومالومكم إحنا شعب يحب الفضول يعني مثلا لو شفنا حادث بالشارع فضولنا يخلينا نصفط بنص الشارع ونعطل السير علشان نشوف الحادث وجم واحد كان بالسيارة ومنو الغلطان.
هذي مو سالفتنا وخلونا نرجع لمحور حديثنا ان الكل يبي يعرف منو بوشيخة وبما ان احنا داشين على العيد عساكم من عواده وتدرون بدينا لوية التشري لليهال وبعدها تقعد الصبح يوم العيد ويرن بإذنك صوت محمود الكويتي واهو يقول «العيد هل هلاله» وتبلش زوارات العيد وخساير هالعيادي وتدفع وما تلحق فيمكن ما يصير لي مزاج اكتب بهالزحمة وبعد ما صار مؤشر بورصتي احمر من المصاريف فعلشان جذي وعلشان ارضي فضولكم راح اقول لكم سر بوشيخة واعترف لكم بشخصيته.
بوشيخه طال عمركم شخصية حقيقية ووهمية بنفس الوقت كان يكتب مقالاتها موظف بجريدة «الدار» وأصرت إدارة الجريدة إنها ما تنزل باسمه الشخصي وحطت اسم وهمي «بوشيخة» لانها تدري ان نوعية هذا الموظف «قلابي» يعني اليوم معاك وباجر ضدك «ذكرني بالمرشح اللي يوم خسر بالانتخابات قال لربعه تاكلون من خيري وتنتخبون غيري؟»..
وبعد إقالة هالموظف قام يكتبها اكثر من كاتب وانا واحد منهم.. ولا تستغربون لما قلت لكم ان شخصية بوشيخة حقيقية وهمية لان بوشيخة يمكن اللي قاعد يمكم بالديوانية ولا بالقهوة او اللي يمشي يمكم بالسوق ولا المسافر وياكم على نفس الطيارة ولا اللي سافط يمكم عند الاشارة ولا رفيجكم بالدوام ويمكن يكون بوشيخة انت اللي قاعد تقرا هالمقالة لاني وايد استفيد من ملاحظاتكم ونقاشاتكم ورسايلكم واحولها لمقالات توصل صوتكم للشخصيات المهمة وغير المهمة وعايش وياكم وحاس بهمومكم ومشاكلكم لان بوشيخه اهو الابو والولد والاخو والصديق لكم.
اعتقد الحين بردت جبودكم وأرضيت فضولكم وهذا ردي حق كل اللي يبي يعرف منو يكتب مقالات بوشيخة ويسأل عن هالشخصية اللي حيرت ناس وايد واتمنى لكم عيد مبارك مقبول والله يعيده علينا وعليكم بالخير.
• كلمة راس
قبل ما كنت اقدر اقول كلمة «راعي النحشة» وما كنت اقدر انتقد طلال وعذبي... أكيد عرفتوا ليش !
إقرأ المزيد...
الخميس، 18 أغسطس 2011
نقطع راس السفير مرتين
18/8/2011
عندي اقتراح حلو مادام الوضع كله صاير ماصخ، واقتراحي اقدمه للنواب عسى الله يحفظهم مادام هدوا شغلهم وقاموا يشتغلون قصابين، واقترحي ان يصدرون قانون يسموه قانون «ضوابط السفراء» وبهالقانون يحددون صفات السفراء بالديرة:
إذا السفير من دولة هندوسية وبوذية ويعبد الاصنام يسمح باعدامه!
إذا السفير من دولة كافرة، طبعا هني نحط قانون يفرض على السفير ان يتوب الاول إذا ما تاب نقتله من خلال قطع راسه مرتين!
إذا السفير من دولة مسيحية ندز له لجنة التعريف بالاسلام علشان يهديه، اذا ما اهتدى نجلده حتى يعلن اسلامه واسلام اهله!
إذا السفير كان لدولة تمنع النقاب، نجبر زوجته تلبس النقاب، وهو يقصر بدلته!
إذا السفير في ديرته محلات الخمور مسموحة لازم يعاقب السفير بالجلد والحبس بتهمة شرب الخمر في بلده!
إذا السفير دمه ثقيل، نصدر قانون بجلده خمسين جلدة، ويتم استبداله بسفير ينكت!
إذا السفير ما عندنا معاه ولا مع دولته اي مشكلة ندور لنا على مشكلة علشان نعاقبه!
المهم في هذا القانون اللي افكر فيه انه نطلع لكل سفير قانون ونبهدل عيشة السفراء حتى يتعلموا الادب في ديرتنا مع اني ما ادري شنو يتعلمون المهم مادام مو قادرين نسوي شي، ولا النواب فيهم شدة يطلعون قانون محترم للناس، على الاقل نطلع حرتنا بالسفراء، واحد نطرده واحد نجلده وواحد نذبحه.. لانه النواب صار لهم سنين بيذبحون الفساد والواسطة والعنصرية والطائفية.. وبعد هالسنين اكتشفنا انهم قاعدين يذبحون الديرة!
twitter.com/bushi5a
إقرأ المزيد...
الأربعاء، 17 أغسطس 2011
بومشاري عند السفارة
17/8/2011
قررت تلبية دعوة الجماهير المليونية لدعم الشعب السوري، أو الصج ما قررت، صاحبي بومشاري، لزم علي، الا تعال معاي بروح اعتصم، قلت له مثل ما تحب، هدينا الديوانية، ركبنا سيارتنا، وعلى مشرف، قلت له: بومشاري مو الاعتصام بساحة الارادة، رد قال: لا بمشرف عند السفارة السورية، لانهم بيوصلون رسالة!
بيني وبينكم قلت يمكن البريد مسكر وبيودون الرسايل ويسلمونها السفارة بايدهم، ما علينا المهم رحت الاعتصام وانا في بالي مظاهرات الستينات، ايام عز الشباب لمن كنا نطلع ونهتف ضد اسرائيل، والاستعمار، والامبريالية!
ما اطولها عليكم وصلت السفارة، الامن محوط المكان والناس واقفة، المصورين والصحافيين اكثر من الجمهور، كل هالدعاية، ومظاهرات في يوم الثلاثاء العظيم، والمسيرات المليونية في العالم العربي، والي طلعوا في الكويت مية نفر، تسعين منهم سكرتارية نواب، وثلاثة جايين يطمشون، واثنين مباحث، وثلاثة حسبالهم يوزعون تموين ببلاش، وانا غصب ياي، يعني اللي استجاب للدعوة بس بومشاري!
هم ما اطولها المهم وقفنا وبدينا نسمع، الهتافات، ماكوا اسلوب كلش، الشعارات كلها سب، يعني سمعت كلمات مثل حمار، وجحش، وكلب وحصان وخروف.. وما سمعت لا تضامن، ولا حب الوطن، ولا مصلحة الوطن، يعني لو ينشرون الاعتصام كامل على الفضائيات، بدون قطع اكيد بناخذ اوسكار السب والشتايم، ومع الاسف كانت الشعارات مسبة للشعب في سورية قبل نظامها، ويكشف مستوى اللي قاعد يديرون التحركات السياسية والاعتصامات في البلد!
المهم بومشاري هو يهتف اول وثاني هتاف، انبه ضميره، واستسخف نفسه على هالحركات والشعارات، وقرر يهدهم، تلفت يمين يسار يدور علي، وانا من اول دقيقتين كنت راكب السيارة وراد البيت! بومشاري لي الحين ناطرني عند السفارة!
twitter.com/bushi5a
إقرأ المزيد...
الثلاثاء، 16 أغسطس 2011
ناطق ينطق نطق
16/8/2011
في كل ديرة في ناطق رسمي باسم الحكومة، شغلة الناطق الرسمي مثلا، انه اسبوعيا، يدش قاعة المؤتمرات الصحفية في مجلس الوزراء، ويقول ويصرح عن موقف الحكومة تجاه اية قضية، بالاضافة طبعا الى آخر اخبار اجتماع مجلس الوزراء، وبعدين طبعا الناطق الرسمي، يوقف ويرد على كل اسئلة الصحافيين المسؤولين عن تغطية اخبار الحكومة..!
كلام حلو، والوزير علي الراشد، صار ناطق باسم الحكومة، والاخ الوزير الظاهر انه فاهم المهمة غلط لانه لا يسوي مؤتمر صحافي، ولا يجابل الصحافيين، ولا له شغل باحد، بس يطلع ويقول تصريحين ويختفي، ويدز فاكس بتصريح ويختفي، يصيده صحفي وهو يتمشى بالسوق ويصرح ويختفي!
وطبعا تصريحاته ما تتعدى، ان الحكومة راح تدرس هالموضوع، والحكومة متابعة لاخر المستجدات، والحكومة ما زالت متابعة لاخر التطورات، وكلنا نحب الكويت، وكلنا فدا الكويت، بس ناقص يحط لنا مقطع اغنية من اوبريت العيد الوطني مع كل تصريح!
اقول هالكلام لانه المفروض الوزير، والناطق الرسمي يعطي الصحافة آخر اخبار الحكومة، واخر تصريحات الحكومة، واخر اتصالات الحكومة ، مو الاخ طايح له تصريحات وكلام انشائي مصفف ماله اول ولا تالي، وفي الآخر نكتشف ان الوزير تكلم وايد، وفي نفس الوقت ما قال شي!
فيا سعادة الناطق الرسمي، اما تنطق بنطق رسمي وواضح حتى نعرف شنو قاعد يصير، او انه تسلم المايكرفون لناطق ثاني، لان الناطق الرسمي مو منصب للكشخة، الناطق يعني هو الي ملم بكل سياسات الحكومة، وكل تحركات الوزارات وخططهم المستقبلية والمشكلات التي يعانون منها.. وبس طال عمرك يا ناطقنا الرسمي!
إقرأ المزيد...
الاثنين، 15 أغسطس 2011
شاهد عيان يستهبل
15/8/2011
الإعلام العربي بصراحة يستهبل على مخنا، لانه يفترض انه احنا نصدقه في كل شي، خاصة في اعلامهم عن سورية، مع ان المفروض يكون الاعلام صادق، واحنا لا شفنا صادق ولا عادل ولا ماجد! مثلا، وزعوا فيلم، قالوا ان الشبيحة يقطون القتلى من الجسر، شفنا الفيلم، طلع في الاخير العكس، واللي يسمون نفسهم ثوار ذابحين الناس ويقطونهم من فوق الجسر، ما ادري شلون ناس تثور على الظلم وفي نفس الوقت، تذبح الناس، وتقطهم بهذه الطريقة الوحشية!
الثانية، قصة شاهد عيان، شاهد العيان يقولك انا من حماة، وبعدين يعطي تقريره عن حلب وحمص ودرعا، عفية شاهد عيان، وعيون اللي تشوف كل هالمدن، وبنفس الوقت!
اخذ كذبة ثالثة، يحطون لنا شاهد عيان، نعم شاهد العيان، شنو اخبار مدينتكم، فيبدأ شاهد العيان يقول، انه جميع الاتصالات والكهربا والماي مقطوعة بالمدينة، ومع ذلك الشاهد يسولف نص ساعة مع التلفزيون مع ان الاتصالات مقطوعة!
اخذو كذبة رابعة، قالوا ان الكهربا مقطوعة عن المستشفيات، واربعين طفل خدج ماتوا في مستشفى واحد، وحطوا لنا صورة ملونة لشوية اطفال خدج يبكون، يعني بذمتك النظام قاطع الكهربا، وارهاب، وقتل، ونفس الوقت مخلينهم يصورون صور واضحة وملونة يعني الاطفال الخدج كلهم عيال المعارضة ما فيهم واحد ابوه حكومي!
كذبة خامسة، خبر عن مليون متظاهر في حماة، هي كل حماة فيها سبعمية الف، من وين طلعوا المليون!
والسادسة لمن يقولون عدد القتلى، من الصبح يعلنون خبر عدد القتلى، مع انه لو حادث باص، وتقرير رسمي يقعدون يومين على ما يتأكدون، طبعا هذا كله والنظام مسيطر والدبابات تحاصر ويقمعون ويذبحون والاخ بسهولة يعرف كم قتيل!
أقول هذا مو لاني ضد الناس، بس لمن الاعلام اللي يساند الثورة بدون مصداقية، الثورة هم تفقد مصداقيتها!
twitter.com/bushi5a
التعليقات لا تعبر عن رأي صحيفة الدار، إنما تعبر عن رأي اصحابها
يحق للصحيفة حذف التعليق أو جزء منه إذا كان يمس شخصيات اعتبارية أو يمس العقائد والأديان أو يخدش الحياء
الاسم البلد الموضوع
الكويت الأردن باكستان فلسطين لبنان سوريا الهند العراق مصر ايران السعودية الامارات مصر عمان قطر البحرين اليمن المغرب الجزائر تونس كندا الولايات المتحدة فرنسا ليبيا
مقالات أخرى للكاتب
التاريخ عنوان المقال
الأحد, أغسطس 14, 2011 مسلسلات نكد وغمّ وطراقات
الخميس, أغسطس 11, 2011 الحكومة شكو
الأربعاء, أغسطس 10, 2011 الحدود مفتوحة الله وياكم
الثلاثاء, أغسطس 09, 2011 ياكله العيار
الاثنين, أغسطس 08, 2011 سفير للقتل
الأربعاء, أغسطس 03, 2011 «إلا الدستور» طلع خرطي
الأحد, يوليو 24, 2011 حمار وركبه خبل... هات دبرها!
الجمعة, يوليو 22, 2011 داخل «سلطان».. طلع «عدوان» منتف!
الخميس, يوليو 14, 2011 كل نائب وجنطته
التالي الأخير
:: آخر أخبار البحرين ::
جمعيات بحرينية تقاطع الانتخابات التكميلية...
برنامج تلفزيوني يتسبب بأزمة بين البحرين و...
المنامة: العلاقات مع إيران لازالت متوترة ...
وزير العدل البحريني: من يقاطع الانتخابات...
"الوفاق" البحرينية المعارضة تعلن مقاطعتها...
يقولون
ان النواب التأزيميين شادين حيلهم لمنع إحالة هايف للنيابة بعد تجاوزه الدستور والأعراف الدبلوماسية والشرع.
سؤال بريء
• الأول: ليش البرامج الدينية للإعلام الرسمي تجاهلت ذكرى وفاة أم المؤمنين السيدة خديجة
إقرأ المزيد...
الأحد، 14 أغسطس 2011
مسلسلات نكد وغمّ وطراقات
14/8/2011
ما أدري شنو حالة النكد اللي تنزل فجأة على المنتجين والمخرجين في رمضان، كل واحد مبطل حنفية النكد والغم، وقاعد يطلع حرته بالمشاهدين المساكين، وطبعا تلاحظون ان كل المسلسلات نفس القصة ونفس النكد!
لازم الاخو فقير ومسكين والاخو الثاني وايد مجرم يطق العالم!
لازم البطلة في كل مسلسل تنطق تسع طراقات بالتمام والكمال علشان تضبط الدور!
لازم في بطلة بالمسلسل تبوق بالرياييل، تبوق ريل اختها، او ريل امها، او ريل بنتها المهم تبوق وخلاص، علشان الناس يكرهونها!
لازم في معاقين في اي مسلسل، طبعا المعاق او يكسر الخاطر وايد، وما عنده اي دور، وكله مسكين مع انه اعاقة الانسان لا تعني انه اقل من غيره، او يحطون بعض المعاقين للضحك وهذه قلة فهم وادب!
لازم الطنازة على اللون والشكل وبدون شكل ولون ما تصير عندنا كوميديا!
لازم في وايد بنات في بيت واحد، ادري شنو قصتهم هالبنات كل سنة مجمعينهم او في قصر او كراج او مزرعة يعني المهم مع بعض وكله عندهم مصايب تنحل في اخر حلقة!
لازم الممثلات يبكون في الحلقة الواحدة مرتين، والمصيبة انه انقلبت السالفة قاموا الرياييل يبكون وهذه مصيبة!
رمضان شهر الخير الناس تبي تريح تبي تبتسم من يوم صيام طويل، مو يطلعون لنا وكل واحد بوزه شبر بالمسلسل وكانه ماكلين حلالهم!
يا منتجينا ويا قنواتنا المحترمة رجاء من السنة الجاية خفوا علينا شوي وريحونا من همكم وغمكم شوي تكفة طلبتها منكم من الحين!
twitter.com/bushi5a
إقرأ المزيد...
الخميس، 11 أغسطس 2011
الحكومة شكو
11/8/2011
في رمضان الأسئلة الغريبة تزيد، وكان الناس تصوم أول مرة في حياتها، وكانه عمرهم ما صاموا فيقعد الواحد يتصل: الو، شيخنا انا زلقت بالمطبخ ودعمت دولكة العصير فشربت كلاصين عصير كوكتيل بالغلط انا فاطر ولا صايم!
او يقعد يتصل: الو شيخنا وانا قاعد اطالع فوازير مريام فارس، ما شفت نفسي الا اكلت رقية كاملة.. انا فاطر، ولا صايم!
او يسأل: أقول شيخنا، اذا انا مت وانا صايم اقدر اقوم مرة ثانية وافطر مع الاذان!
طبعا هذه الاسئلة الغريبة يسألها البعض من الناس الي اطباعهم غريبة والي على نياتهم، بس عاد تعال للسياسيين والمثقفين وقصتهم مع سورية، واسئلتهم الغريبة!
ان تكون معارض للحكومة في سورية او مؤيد، وليش مو هذه القصة الي ابي اتناقش فيها، النقاش هو في موقف النواب والمعارضين للنظام في سورية، موقفهم مثل الاسئلة الرمضانية ليش الحكومة الكويتية ما تتحرك؟ ليش ما نسحب سفيرنا؟ ليش الحكومة ما تطرد السوريين؟ ليش الحكومة ما تقاطع الشركات السورية؟ ليش الحكومة.. وليش الحكومة!! يسألون ويطالبون، وكان الحكومة الكويتية حكومة اوباما، حتى تقرر وتسحب، وتحط، وتشيل، وكانه اي نظام عنده مشاكل مع شعبه لازم الحكومة الكويتية تقاطع وتطرد وتشيل وتحط مع ان الحكومة تحكمها اعراف وتقاليد سياسية، واهمها عدم التدخل في الشأن الداخلي لاية دولة!
موقاعد ادافع ولا اهاجم، بس الي يبي يوقف مع المعارضة في سورية، الحكومة ما صكت الباب، ولا منعت احد، ولا اعتقلت احد، المجال مفتوح للجميع حتى يمارس نشاطه، ويقدر بخمسين ألف طريقة يساعد الناس في سورية، غير انه يوزعون خمسة الاف جوتي للاجئين السوريين في تركيا، مثل ما سوى النائب الفاضل!
بس المشكلة ان الربع عندنا شغلتهم بس يوقفون بساحة الارادة ويصرخون ويهتفون ويروحون البيت، يكون بها الطريقة ساعدوا الناس، وربعنا لانه ما يبون يشتغلون ولا يبون يسوون شي، فكله يقطونها برأس الحكومة وبس.. فيا شعب سورية، اذا معتمدين على ربعنا الي هني، انا اقولكم مثل مقال المثل المصري «ياما جاب الغراب لأمه»!
twitter.com/bushi5a
إقرأ المزيد...
الأربعاء، 10 أغسطس 2011
الحدود مفتوحة الله وياكم
10/8/2011
نوابنا ماشاء الله عليهم، المفروض انه عندهم مهمتين لا اكثر ولا أقل، المهمة الاولى انهم يشرعون القوانين، يعني يحطون قانون ويشيلون قانون، ويعدلون في قانون، والمهمة الثانية، مراقبة السلطة التنفيذية، ومراقبتها مو يعني يمشون ورا الوزير ويراقبون متى يداوم، ومتى ينام، ومتى يتعشى، انما يراقبونه بمعنى انه يراقبون التزامه بالقوانين.. اكثر من هذا مافي!
نوابنا هادّين شغلهم وكل واحد ماخذ مهنة ثانية، الى صاير خبير استراتيجي، ويقعد يحلل الاوضاع الدولية، والثاني صاير خبير نفطي ويعرف في الات الحفر، والثالث خبير كهربائي يعرف في موتورات الكهرباء ولا مهندس خبير، والرابع صاير خبير اخراج والحان ويقعد ينتقد الفنانين والمسلسلات!
أما القضية الجديدة انهم صايرين خبراء في السياسة الخارجية، وقاموا يعطون اوامر، شيلوا السفير حطوا السفير، قاطعوا الدولة العلانية، لا تقاطعون الدولة الفلانية، وكان الناس انتخبوهم كممثلين للسياسة الخارجية، مع اني اشك ان بعض ما يدل وين صايرة الكويت على الخريطة!
واحد بيطرد السفير الايراني بعدين العراقي والان السوري، وبعدين طبعا المغربي والجزائي وواحد راح يقترح السفير الاميركي لان سفارتهم كبيرة، وخامس السفير الفرنسي لانه ما يحب الكرواسون، وسابع يبي يطرد السفير الاسباني لانه يشجع برشلونة.. وكان امر العلاقات الدبلوماسية عبارة عن نقل موظف من مكان الى اخر!
يفترض بالنسبة لنا اولا الكويت واخرا الكويت، وبعد ذلك نحسب مصالح الدول الثانية، فالكويت ومصلحتها فوق الجميع.. والى مو عاجبه الحدود مفتوحة، يقدر يروح يتظاهر في اي بلد عاجبه، والتذكرة على حسابي!
twitter.com/bushi5a
إقرأ المزيد...
الثلاثاء، 9 أغسطس 2011
ياكله العيار
9/8/2011
لمن تقرر السفر على الخطوط الجوية الكويتية، فهذا يعني انه لازم الاول تقعد وتتشهد الشهادتين وتقرا خمسين الف دعاء وتختم القرآن مرتين، لانه هذا هو منقذك الوحيد، فمع الاسف «الكويتية» المؤسسة الرائدة في الطيران، واللي كانت تنافس ارقى شركات الطيران، تحولت الى طيران درجة عاشرة، وتنباع تذاكرها في اسواق الجمعة في بومباي ودلهي، بعشر دنانير عالخمطة!
«الكويتية» كانت تبي تشتري طائرات تدخل الاعضاء وقاموا يصرخون ويتكلمون عن المال العام، وينطون بوجه الحكومة ويخطبون عن المال العام، وكأنهم خبراء في الطيران ، المطار يحتاج الى ازالة ونحن بحاجة الى مطار متطور، ونظيف ومحترم، بدل المطار الفضيحة الموجود حاليا هم يتدخل اعضاء مجلس الامة ويبطون راسنا عن المال العام، الخدمات تحتاج الى تجدد هم يتدخل اعضاء مجلس الامة وكلهم يصرخون على فيلم المال العام، وهدر المال العام، والناس تصدق ان الحكومة مجرمة، وتبي تهدر المال العام!
الخطوط الكويتية المسكينة تحاول توقف على ريلها بأية طريقة بفضل الشباب اللي فيها، بس الكل يحس انه في ناس تحاول ان تحولها الى اسوأ حال، حتى تتم خصخصتها ولمن تتدهور وتتسكرب يعني تخصخص بأقل سعر، ولمن يكون اقل سعر، يكون دايما في واحد لابد ورا الطوفة ناطر وجاهز يشيل بسطة «الكويتية» بأقل ثمن .. هذه كل القصة!
بعض النواب الظاهر يستفيدون من تحت الطاولة وبعض الهوامير بيستفيدون من فوق الطاولة، والبلد هي اللي تخسر، والحكومة كعادتها بخيلة على عيالها وعلى مؤسساتها الناجحة، حتى تفك نفسها من دوخة النواب، وفي النهاية يصير مثل ما قال راعي المثل «مال البخيل ما ياكله الا العيار»!
twitter.com/bushi5a
إقرأ المزيد...
الاثنين، 8 أغسطس 2011
سفير للقتل
8/8/2011
بغينا نكحلها عميناها، ودائما نوابنا «يقصون ويهنا» جدام الناس!
قالوا بنطلع ونطالب بطرد السفير السوري، ومع انه لا هو شغلهم، ولا قضيتهم، هالشي يضر بمصالح الكويت، بس قلنا احنا بلد ديمقراطي، وحرية التجمعات مكفولة، وحرية الرأي مكفولة!
بس اللي صار شي ثاني، اللي صار ان النائب هايف وقف وعطانا من خطاباته العصماء وبعدين طالب باستفتاء العلماء في جواز قتل السفير السوري، والناس إما تصفق له أو ساكتين على هالمصيبة اللي نزلت على راسنا!
المصيبة مو في اللي يقوله هايف، فإحنا نعرف هايف، ونعرف طلعاته، وسوالفه، اللي فجأة طالب بتطبيق المادة الثانية بدون أية مقدمات، والحين فجأة زادت عنده الروح الايمانية في رمضان وقاعد يدور على فتوى تجيز قتل السفير، المشكلة في ربعه اللي حاولوا يرقعون له .. اللي يقول طلب الفتوى حق كل مسلم وانه فقط طالب باستفتاء ما قال اقتلوه، واللي يقول انه يقصد يطبق من قبل القضاء واللي يقول انها زلة لسان!
بس المشكلة ان النائب في اليوم الثاني اصر انها مو زلة لسان وانه مستمر في مطالبته بالفتوى وهذا نائب برلماني يشرع للناس ويحط القوانين، يعني هو المسؤول الاول عن القوانين اللي تنحط يعني بعد يومين كل نائب ما عجبه سفير ولا وزير عادي يوقف ويطالب بفتوى بجواز قتله!
ويطلع لنا نائب ثاني يقول أطالب بفتوى تجيز بجلد وزير التربية لانه ما قبل الطلبة بالجامعة!
وثالث يطلع يقول أبي فتوى بقطع يد وزير الاشغال لانه ما وقع لي معاملاتي!
ورابع يطلع يطالب بفتوى لسرقة الجمعية اللي يعمل فيها لانه يبي يدعم الفقراء في الصومال!
نوابنا ممكن ترحمونا في رمضان بس .. خربتوا صيامنا الله يسامحكم!
twitter.com/bushi5a
إقرأ المزيد...
الأربعاء، 3 أغسطس 2011
«إلا الدستور» طلع خرطي
3/8/2011
النائب هايف، شد حيله وقدم اقتراح بتعديل المادة الثانية من الدستور، وبعض النواب وقعوا على الاقتراح بتغيير المادة الثانية الي من خلاله تصير الشريعة (ال) مصدر (ال) رئيسي، والي يعني ببساطة، تتغير ثلاثة ارباع قوانين الديرة، ويعني ان كل قانون لازم نحط له لحية طويلة ونمسكه مسواك، حتى يضبط مع المادة الثانية!
اولا نسأل النواب الموقعين، والنائب نفسه، مو انتو الي قبل اشهر كنتوا ترفعون شعار إلا الدستور، والدستور خط احمر، ولا لتنقيح الدستور، وتنقيح الدستور مؤامرة على ما ادري منو؟ الا اذا كنت غلطان وفيني زهايمر، والا يمكن النواب حاشهم الزهايمر، وحسبالهم ان الناس تنسى!
ثانيا شنو اهمية انك تغير المادة الثانية، بالعكس المادة تقول انها مصدر رئيسي يعني، ايها النائب الحبيب الطيب، المجال مفتوح لك على الاخر انك تحط قوانين اسلامية واضحة ومرتبة، تهدف الى مصلحة الناس، محد قاضبك من ايدك، ومحد قال لك ممنوع تحط قوانين اسلامية، تعال وقدم القوانين الاسلامية، الباب مفتوح!
ثالثا المشكلة تدري يا سعادة النائب هايف، انه قوانينكم الاسلامية دائما تكون مالها معنى، يا تلاحقون الجنوس، او تلاحقون مسلسل ولا مسرحية، او تمنعون الخيم الرمضانية، أو ماسكين بالسيارات وتمنعون التظليل، يعني ماكو قانون اسلامي تقدمونه صح، وفيه الصالح العام، كلها امور سطحية، تخلي الناس تضحك عليها اكثر مما تحترمها، وكانه الاسلام بس قوانين منع الملابس والمسلسلات!
رابعا يا أخ هايف ان تدري ان اقتراحك ما راح يمشي، وما راح توافق عليه الحكومة ولا المجلس، وراح يكون مصيره مصير الاقتراحات القديمة على تنقيح هالمادة، فليش دشيت علينا عرض وتبي تخرب رمضاننا من أول يوم، الا اذا بس تبي تقول، والله انا قدمت وما صار، وتفك حالك!.. ما نقول إلا رمضان كريم، والله يسامحك!
twitter.com/bushi5a
إقرأ المزيد...