بو شيخــــــة

فتوات


6/4/2011

مسؤولين إحدى الوزارات صايرين أبطال وفتوات، نافشين ريشهم ومطلعين عضلاتهم، على منو.. على مواقع الانترنت المحترمة، بلشوا منعوا الخدمات الاخبارية الوطنية المستقلة والحرة، علشان منو؟ علشان يسكتون بعض هالنواب اللي لسانهم طويل وحيلهم قاصر! ليش، لان الوزارة اردى من الدياية، وابوي ما يقدر الا على أمي، ويخافون من صوت الصراصير، وطبعا مبررهم جاهز، سكرناهم حفظا للوحدة الوطنية!
مع انه قلنا وبح صوتنا انه لازم تصير رقابة على المدونات والمواقع، لانها تحرض على الفتنة، بس الظاهر صار العكس، المدونة التي تحذر من الفتنة، وتدعو للوحدة، هي اللي تتسكر بفضل توجيهات الوزارة العظيمة!!.
نحط لكم مثال واحد بس، موقع الشبكة الوثنية، مروا على الشبكة، وتقرون فيها كل شي، تقرون فيها مصطلحات مجوس وروافض وصفويين وتحريض طائفي واضح ومباشر، تقرون فيها هذا أصيل وهذا بيسري، هذا ولد فلان وهذا ولد علان، وتقرون فيها هذا مطيري وهذا عجمي، وهذا عازمي وهذا شمالي وهذا جنوبي، وتقرون فيها هذا ابن «....» وانت ياولد «.....» نعتذر لعدم النشر حتى ما نخدش حياءكم، والامور عادية ولا كأنه صاير شي، يعني الشبكة مفتوحة على البحري، ولا احد يحاسب ولا احد يقول ليش، ولا كأنه في وزارة اعلام تراقب وتشوف!
الوزارة كعادتها دايخة، ومضيعة الطريج، وتستسبع على المحترمين.. صايرين مثل المدرس اللي الطلبة في آخر الصف يشاغبون، وهو يطلع حرته بالولد المؤدب، اللي قاعد في اول الصف!
كتبنا هالشي للتذكير فقط، الصحافة الحرة والاعلام الحر، ما تهمه لا وزارة اعلام ولا مسؤولين دايخين، وما تخوفه هالحركات، والشرهة مو على الوزارة انما على النواب والكتاب اللي ذابحين روحهم وطنية وحريات، وما بطلوا حلوجهم على هذا القمع الفكري والاعلامي، وما يدرون انه جس نبض لبقية المواقع، وبهالطريقة راح يجيهم الدور، وأذكركم!
Boshi55a@hotmail.com
Boshi5aa.blogspot.com