بو شيخــــــة

ما نبي وزير مثل تامر حسني


14/4/2011

سمو رئيس مجلس الوزراء، نصيحة من مواطن، ومثلك لا يحتاج نصيحة...
نبي وزراء يوقفون مع الحكومة في أزماتها، مو يوقفون مع معارضين الحكومة، لانه ما في حكومة في العالم وزراءها يوقفون مع المعارضة، ويدافعون عنها، بدل ما يوقفون مع الحكومة!
نبي وزراء يهاجمون ويدافعون، يعني نبي وزير كولجي دفاع هجوم، مو وزير مع اول استجواب وتصريح ضده يرفع ايده، ويوقع خمسين الف معاملة بس علشان محد يكلمه! نبي وزير يترس الكرسي، مو بالعكس، لازق بالكرسي، وخايف على كرسيه، وتصير عنده علاقة حب بالكرسي، ويخون الكل بس علشان الكرسي!
نبي وزراء ينصحون، عندهم راي واضح، عندهم كلمة، فاهمين اللي قاعد يصير مو وزراء دايخين، ما يدرون وين الله قاطهم، معاهم معاهم، عليهم عليهم.. نبي وزير يقرأ الاحداث، يعرف راسه من ريله، يعني مقطع ذيل السمكة، مو وزير منتفين ريشه وقاعد! نبي وزير يشتغل، يكرف، يداوم قبل الكل ويطلع بعد الكل، مو وزير كاشخ ومسوي السبعة، ولابس البشت، ويصور ويوزع صوره على الجرايد يقولك تامر حسني، لا يبه نبي وزير يشتغل ما نبي وزير يصور وبس!
نبي وزير ما يكذب، يكون صادق مع نفسه وصادق مع الناس، يقول لنا شنو فيه وشنو ما فيه، مو مثل المدمغين نتابع الاخبار وهو كل شوي يطلع ويقول لنا الامور بخير، ولا تحاتون ولا تخافون وكله تمام، وفي النهاية نكتشف ماكو شي تمام، وكله كلام فاضي! ما نطولها سمو الرئيس، نبي وزراء يوقفون معاك مو معاهم، يشيلونك مو تشيلهم، يدافعون عنك مو تدافع عنهم، وزراء تأمن على ظهرك اذا مشيت جدامهم... وسلامتك طال عمرك!
Boshi55a@hotmail.com
Boshi5aa.blogspot.com