بو شيخــــــة

صفر في كل مكان



13/4/2011

بعد أن شربت شاي حليب مع شوية بخصم، وفرفرت على القنوات والناس تتظاهر في كل مكان، دخت وحطيت راسي ونمت، وحلمت ان كل الوزراء صايرين فاضل صفر، وكلهم يشبهونه!
وحلمت واللهم اجعله خير، انهم كلهم مثل فاضل صفر رافعين «جمومهم» ومجابلين وزاراتهم، ويبون يقضون على الفساد ويحاربونه، مثل ما حارب صفر الاغذية الفاسدة، والفساد في البلدية والاشغال!
طبعا بهذه الطريقة وزير الاعلام، راح يقضي على البرامج الفاسدة في تلفزيونه واذاعته، ويقضي على السرقات باسم المكافآت في وزارته، ويقضي على الاسماء الوهمية اللي تأخذ مكافآت البرامج، ويقضي على المحسوبية في الوزارة وكل واحد وربعه وشلته، ويقضي بعد على مجاملة فضائيات وصحف على حساب فضائيات وصحف ثانية، يعني يوميا راح نسمع عن مصادرة اطنان من البرامج والقرارات الفاسدة في الوزارة!
وفي الكهربا هم حلمت بالوزير وهو يكشف فساد الصفقات، والتوربينات الفاسدة، اللي بس تشتغل تحترق، ويصادر الاف الاطنان من المحولات الفاسدة والتلفانة، ويطلع الاف القطع التقليد والفاسدة واللي تنباع علينا على اساس انها اصلية، ويكشف الاف الاختلاسات والتجاوزات في الوزارة وينور الديرة، ويبين حجم اطنان الفلولتان الفاسدة فيها!
ولو يدش المواصلات هناك بعد العملية سايبة، محد يدري من فين يودي على فين على رأي عادل امام، كله فساد في الخطوط وفي المقسمات واخذ فساد في كل قسم وادارة ومكافآت توزع على الربع، والناس الشغالة تاكل هوا وخصومات!
انا متأكد لو يسوون فوتوكوبي للوزير ويوزعونه على الوزارات راح نشوف يوميا الاف الاطنان من الفساد..!
قمت من النوم وقلت اللهم خير، الموضوع يا جماعة مو تلميع للوزير فاضل صفر لانه ما يحتاج مدح ولا تلميع، فالوزير شغله يشهد له، انا اقول انه نبي وزراء بنفس الطريقة يشتغلون وينظفون البلد.. ممكن ولا صعبة؟!
Boshi55a@hotmail.com
Boshi5aa.blogspot.com