بو شيخــــــة

ليش تأخر تشكيل الحكومة؟


21/4/2011

ليش تأخر تشكيل الحكومة..؟ شلون شكل الوزارة القادمة..؟ منو من الوزراء باقي ومنو منهم راحل..؟ جم شيخ بالوزارة وجم مواطن سوبر وشكثر عدد الوزراء النواب..؟ اسئلة يرددها كل كويتي بينه وبين نفسه او بالدواوين ونفس الاسئلة بالتويتر والفيس بوك والجرايد والبرامج التلفزيونية.. ونفس الاسئلة تعقد لها ندوات واجتماعات وتكتل الكتل وكتلة الدستور والحريم يسولفون فيها! طبعا هذي الاسئلة الكل في الكويت يسولف فيها من باب ان الكويتي ملم بالامور السياسية ويعرف كل شي بالسياسة وعنده طموح يصير وزير علشان يفيد ربعه وجماعته... كل هذا امر مشروع وحق مطلق ولا احد ينازعهم فيه.. لكن... وألف لكن... هل بعض المواطنين الكويتيين اللي قاعدين يتعاطون بهالامور قايمين بدورهم من موقعهم كمدرسين أو موظفين او مواطنين؟ للاسف وبكل ألم اقولها.. لأ... لأ... لأ... ترى مصيبتنا في الكويت واللي مأخرنا ومخلي عندنا فساد اداري ومالي اهم اسبابه عدم التزام بعض المواطنين الكويتيين بعملهم. يتكلمون بالسياسة ويبون يوجهون الحكومة ورئيسها واهم موظفين صار لهم ست سنين ما يداومون.. ويبون يعلمون الوزراء شلون يقومون بعملهم واهم تلاقيهم مدرسين مو منتظمين بالحصص وكل يوم ماخذين تفرغ رياضي مع انهم ما يعرفون يلعبون مقصي... ونفس هالمجموعة من المواطنين اللي مو عاجبهم شي بالحكومة وينتقدون تلاقيهم اول الناس بالمظاهرات والاعتصامات والندوات... علتنا باطنية.. تبتدي بالناخب اللي يحدد خياراته وفق طائفية بغيضة او قبلية مقيتة او فئوية او حزبية تلوع الجبد.. فاذا كانت هذي القاعدة فشلون بتكون النخبة اللي اهم النواب والناشطين والكتاب؟ كله كوووم وبعض الحريم الكويتيين كوووم... ما تطبخ وتطالب بتخصيص وقت للبيت وما تعرف ترد على عيالها وتبي وزارة التربية تربيهم.. وتصوت بالانتخابات حسب راي زوجها واذا قعدت بحفلات جاي الضحى تسولف عن حقوقها؟ بعضنا ما يدري شيبي وتقوده الأقلية وبعضنا شعب البلاك بيري عند الاشارات والاي فون في قاعات الانتظار والآي باد في البيوت.. وكل هالتكنولوجيا مسخرينها حق الضحك والطنازة والتنظير فقط .. ولاني جزء من هذا الشعب ودي اعرف ليش لي الحين ما تشكلت الحكومة ومنو بيكون وزير الإعلام؟
Boshi55a@hotmail.com
Boshi5aa.blogspot.com