الأربعاء، 25 نوفمبر 2009

عطني اسم أمك

26/11/2009
بعض النواب قاموا يكتون فال ويضربون الودع بسبب استجوابات زملائهم وتصعيدهم وتحديهم للنظام السياسي في الكويت.. فتلاقي تصريحاتهم مخربطة ومالها أي أساس من العقلانية.. تحصلك نائب يوم الأحد يمدح وزير الداخلية وينتقد وزير الخارجية.. الاثنين ينتقد وزير الداخلية ويهدد وزير الخارجية بالاستجواب.. ونائب ثان مفتر راسه ياشايل له شمعة ورايح امن الدولة.. أو ماخذ معاه قراطيس ورايح النيابة.. وبعد يومين يسولف عن احترام القانون! حالة النواب غريبة عجيبة.. ولا تستغربون اذا شفتوا نائبا يروح حق ساحر وثان يروح حق مشعوذ علشان يكشف له.. وساعتها بيقول له الساحر عطني اسم امك واقول لك اللي بيصير.. على طاري اسامي الامهات آنا أعرف اسامي امهات كل النواب.. وحاولت اسوي لهم «عمل».. دشيت المطبخ وخلطت أسامي امهات النواب مع هردة وشوية حسو.. تالي حطيتهم بالفريزر اسبوع.. ولما طلعت الخلطة وفتحتها.. شميت ريحة تلوع الجبد.. على طول يبت الجدر وحطيت الخلطة على الجولة مع شوية ماي.. وخليتها تفوح لين خاب ثناها.. وتشكل الدخان أو البخار من فوق الجدر بالجملة التالية (حتى لو) واحترت فلجأت لواحد من الربع اسم امه بدرية.. وقلت له السالفة.. قال لي مالك الا تروح حق ولد ليلى تراه يفهم بهالأمور.. وبالفعل فسرها لي وقال.. حتى لو جملة، لي أخذت أول حرف من كل كلمة تصير (حل) يعني المجلس رايح ملح بسبب تصابي النواب.. بعضهم طبعا.. علشان جذيه عرفت سبب تصريحاتهم وتخبطهم.. وقولوا آمين..

• كلمة راس
قضية الرياضة وحل الأندية لازم نسوي لها عمل.. علشان جذيه ارجو تزويدي من اللي يعرف أسامي أمهات رؤساء الأندية.. يمكن نقدر نكتشف الحل والسبب ونعالج قضيتنا.. ونفتك من هالربربة.. ونرتاح وناخذ كاس العالم بالمعاياة.. ويمكن ننظم كاس العالم في الكويت لتصريحات النواب..
إقرأ المزيد...

الثلاثاء، 24 نوفمبر 2009

المواجهة

25/11/2009
في مرض منتشر بالديرة وايد خطير.. وتأثيراته ألعن من إنفلونزا الخنازير والسرطان مجتمعين.. أسهل شي بالديرة انك تقضب ورقة وقلم أو تفتح مدونة وتكتب فيها التالي.. فلان حرامي وأمه كانت حفافة وخال أبوه يبوق صل ودج من عمارة بو فلان.. والأسهل انك تقدر تفتري
كثر ما تقدر وتحط معلومات مغلوطة عن اي شخصية عامة.. نائب كاتب وزير تاجر شاعر اللي هو.. وممكن تنسبها بالتالي وتقول ان مصدر المعلومات (عبدالله بن سبأ).. انزين.. إذا واحد لايث يجذب يمكن نعديها.. إذا موظف صغير يجذب نمشي له الموضوع.. لكن المصيبة ان الجذب صار صفة ملازمة لبعض النواب والتجار.. ومو أي نائب أو أي تاجر.. تلاقي نائب ينحدر من عائلة عريقة ومو محتاج شي ويجذب ويبهرج ويتهم الناس بمناسبة وبدون مناسبة.. المصيبة إن فيه جم واحد مستفيد يصدقونه واهما مو مقتنعين بكلامه.. ويأيدونه بالطالعة والنازلة.. بالله عليكم نائب جذيه جذاب شالحل فيه؟ ولو انه يجذب بعقل أو جذبة بيضة نطوفها له.. لكن الحبيب يجذب وينقل كلام عن أكبرها وأسمنها ومحد يحاسبه؟ فلا تلومون الناس إذا جذبت وتجنّت مثله.. أما المثل الثاني فهم يهالو أو بالمعنى الأصح عيال تجار.. تلاقي واحدهم الصبح غترة وعقال وبالليل لابس قوملق.. ويتحجى عن المرجلة.. تحتار.. تشوفه إذا سولف يوهمك بالجذب انه يملك الكويت كلها وعنده شراكات عريقة مع شركات عالمية وأهو طل بعينه ما عنده ما عند يدة بونصيب.. تسمع كلامه تستغرب كل ما طلع مشروع ناجح يقول أنا شريك فيه.. وطايح له جذ وتخرف على العالم.. المصيبة وين.. المصيبة بعيال التجار اللي يملكون بالشركات أقل نسبه ويسولفون جنهم يملكون الشارع اللي فيه مقر الشركة.. وفوق شينهم قواة عينهم.. يجذبون ويهددون واهما يا الله من فضلك.. عيوبهم تارسة الديرة وبلاويهم اللي اكثر من دخان الزقاير وصمونة الهمبرجر.. هذي مصيبتنا بالكويت الجذب والتجني ما يكلفك إلا كرامتك وماي ويهك.. فهنيئاً لكم يابعض تجارنا ونوابنا.. ويوهكم نشف مايها وكراماتكم حالها حال دلاغ حنيف..

• كلمة راس
كل النواب يقولون وقالوا «المواجهة هي الفيصل» نعم وآنا أأيدهم وأقول إن المواجهة أفضل شيء.. وبالذات مع النواب والتجار اللي يموتون بالجذب.. لازم نواجهكم ونفضحكم لأنكم ما تفهمون الا هاللغة.. وأبشروا بالمواجهة يايتكم يايتكم.. من أموركم العامة الى الخاصة اللي خليتوها عامة.. بغباء!..
إقرأ المزيد...

الاثنين، 23 نوفمبر 2009

الإعلام سيد الموقف

24/11/2009
نواب الاستجوابات والتطهبل انكشوا عن بكرة أبيهم.. (ياعيني على بكرة ابيهم).. ولا احد درا عن هوا دارهم .. واستجواباتهم كلها مبنية على الشخصنة واستخدام كلمة (تضليل).. مع ان التضليل ممنوع حسب قانون المرور.. النواب انكشوا لما تجاهلتهم وسائل الإعلام وما ركزت على
استجواباتهم.. وغابت أساميهم عن المانشيتات الصحفية.. واختفت حناجرهم عن اللقاءات في القنوات الفضائية.. وهذا الشي يرجع لعدة اسباب.. منها على سبيل المثال لا الحصر.. لان الشعب عرف اللي له واللي عليه.. والا بذمتكم اكو نائب عنده شوية دم وبويهه قطرتين ماي يضيّع قضايا المواطن مثل القروض والتنمية والصحة والتعليم علشان يستجوب وزير مرتين؟ والا النائب الثاني اللي مسوي روحه بو العريف ومستجوب وزير ماسك وزارتين؟ لأنه ما عين اخوه؟ واللي العن النائب اللي على قولة بوبراك «يفتح زر ويسكره» كل يوم طالع لنا بسالفة شيك وميك وهيك وهيك.. هذا سبب.. اما السبب الثاني.. فوسائل الإعلام عرفت ان بعض النواب ما عندهم ما عند يدة بونصيب.. تصريحات وصراخ ومؤتمرات خرطي بخرطي.. ومنها سكرت عنهم الصفحة الأولى والأخيرة.. والقنوات طردتهم شر طردة.. والسبب الأخير في فشل هيلمان الاستجوابات وأضوائها.. اهو جاهزية الوزراء واستعدادهم للمنصة على أنها شرف ما يدعونه.. وعلى راسهم .. الأنيق الجميل الرزين اللبق بو صباح سمو رئيس الحكومة.. كل هالاسباب خلت النواب يخيشون مثل المسري بالهاند.. ويطلعون باون بدون جياكر.. ويطقون ابرتين قبل العشا وبعده مثل البسلي.. زين يسوون فيكم وسائل الإعلام يا نواب الفلس.. انتو وايد عليكم ويخب عليكم جلسات منقولة على القناة الأرضية تحطها الدواوين علشان يقزرونها عليكم.. ويشوفون حواركم الهابط.. مالكم إلا عوير المهرج وزوير القزم يكتبون عن بطولاتكم الدايخة يا مالكم اليهد..

• كلمة راس
حدر ايدي مستندات فيها خراب بيوت ودمار نفوس.. وعندي معلومات تحل مجلس ادارة الهيئة العامة للشباب والرياضة.. واملك قرائن تقول ان نواب لاعبين بإيدهم وريولهم القصيرة بقرار حل الأندية ومسيطرين على الهيئة.. راح أتروى في كشفها بعد ما أتأكد من قانونية النشر.. تبون الصج.. الإعلام سيد الموقف يكشف نواب ويكشت بنواب.. كفو إعلامنا الحر.
إقرأ المزيد...

مصدقين روحهم !

23/11/2009
مساكين هالحرس الوطني إذا قعدوا، قالوا شنو هالحرس، ليش قاعدين، بس طايحين له أكل.. وإذا تدربوا، قالوا ها بيحلون المجلس، والدستور بيعلقونه - سمعت بيعلقونه على البلكونة بس البلدية مانعتهم - عشان جذي قاعدين يدربون الحرس علشان قمع المظاهرات اللي راح تترس الشوارع..!

خلونا نتصور ان المجلس علقوه، لا سمح الله، شنو راح يكون رد فعل الناس؟
1 - بعضهم يقول زين ارتحنا كم سنة، لي ربك يفرجها، وخلونا نشوف الحكومة شتسوي بعد ما كانت تقول ان البرلمان اهمه السبب، وبعد سنتين نتظاهر!
2 - بعضهم يقول لك، سنة وحدة كافي، لانه الديرة بدون نواب ضيقة خلق، ومو وناسة، خاصة ان الديرة ما فيها اي مجال للترفيه، بعد ما دش المد الأحمر البر وصار كل شي ممنوع!
3 - وبعضهم يقول انا بطلع مظاهرات ضد الحل بس مو الحين في فبراير، الحين توه داش البراد، وما لي خلق، بالربيع أحلى مع الأعياد، على الأقل الواحد يشتري له كرتون فوم علشان يعارض الحل بالفوم الملون!
4 - بعضهم يعترض بس مع الربع في الديوانية، قبل لا يلعبون هاند، بس عاد يطلع مظاهرات لارجاع النواب شكو؟يعني هو يتظاهر ويتعب ويصرخ وتاليها النواب يردون المجلس باردة مبردة، يعني اشدعوة النواب مسكتين ذابحين روحهم عالدستور، مواغلبهم صايرين مثل الحصالات!
5 - بعضهم يقول لا، لازم نطلع مظاهرات سلمية، مثل ما يبي الصحفي والمذيع والعسكري الكبير.. فيركب البورش ويتمشى في شارع الحب ويدق هرنات، يعني هم مغازل وهم معارضة!
باختصار يا جماعة، لا شغب، ولا مظاهرات، ولا هوسات، لانه المجلس وجوده وعدمه صاير واحد، لا وضررة صاير اكثر من نفعه والسبة ربعنا النواب!.. قال شنو الحرس يتدربون علشان يقمعون المظاهرات اللي بتطلع لو حلوا المجلس.. لا ومصدقين روحهم!
إقرأ المزيد...

الأربعاء، 18 نوفمبر 2009

19/11/2009
احترامي للحرامي
في قصيدة حلوة للشاعر صاحب السمو الأمير عبدالرحمن بن مساعد.. يقول فيها «احترامي للحرامي» واستشهد فيها النائب احمد السعدون مرة بالمجلس وصارت جزءا من تاريخنا البرلماني كونها دخلت بالمضبطة الخاصة بالمؤسسة التشريعية.. أنا بستأذن الامير عبدالرحمن واغير شوي بمفردات القصيدة
دون المساس بالمضمون.. لأنها تنطبق على واحد خدوده تورمت من مخابي الشيوخ وعطاياهم وبالتالي الناقص يسبهم ويشوفهم مجرد غترة وبشت مو أكثر.. ولأنه مو محترم راح أشيل كلمة احترامي..
وأقول: المحامي هو الحرامي.. فاشل واسمه عصامي.. لؤم مع خبث ودهاء.. مدح والمعنى رثاء.. لوحة مسروقة بغباء.. وصار بالصف الأمامي.. المحامي هو الحرامي..

• مرض البرص
في دراسة جميلة وصلتني عن طريق الإيميل تقول ان طبيبا فلسطينيا توصل لعلاج مرض «البرص» أو البهاق.. عن طريق التشافي النفسي.. الحقيقة انها دراسة تستحق ان تنشر ويطلع عليها كل مصاب بهذا المرض.. ولأن الموضوع طويل راح انقل لكم قصة الاختراع.. يقول الدكتور الفلسطيني جوزيف ايليا.. ان العامل النفسي احد المسببات الرئيسية لهذا المرض وتزايده في انحاء الجسد.. فالكاذب الذي استمرأ الكذب والتلون والادعاء على الآخرين حين ينكشف قد يصاب بهذا المرض.. والأمثلة كثيرة.. تبون الصج اذا صدق الدكتور جوزيف.. افتكر البرص راح ينتشر بالديرة..

• طق يا مطر
استبشرنا خير بنزلة زخات المطر على أرضنا الحبيبة.. بس الغريب العجيب ان الموضوع احتاج تغير بالجو طبعا مسبوق في الكويت، وياما شفنا مرات ومرات.. اول شي رطوبة.. بعدين صارت الدنيا حمرة.. تالي ظلمت.. شوي صارت غمتة.. دقايق والا الغبار مسيطر.. ثواني والمطر انهمر باستحياء.. واشتغلت رحمة الله وهات يا غسيل سيارات وتحلطم ما عرفنالكم تبون مطر والا ما تبون؟ ويمكن انا اشوف ان الاوضاع السياسية بالكويت لازم تكون مثل جونا.. 4 استجوابات مالها معنى.. بعدها القروض ما تطيح.. تالي المجلس هذرة ولوية على ما ميش.. عقبها استجوابات بالهبل.. شوي ويطق المطر بالحل على خيام المرشحين.. ومثل ما رحنا ردينا..

• كلمة راس
هذي رسالة حق اللي ينتقدون بوشيخة وزاويته ومقالاته ولهجته العامية..
أنام ملء جفوني عن شواردها
ويسهر الخلق جراها ويختصم
جبح خلق مختصمين..
إقرأ المزيد...

من هنا وهناك

19/11/2009
احترامي للحرامي
في قصيدة حلوة للشاعر صاحب السمو الأمير عبدالرحمن بن مساعد.. يقول فيها «احترامي للحرامي» واستشهد فيها النائب احمد السعدون مرة بالمجلس وصارت جزءا من تاريخنا البرلماني كونها دخلت بالمضبطة الخاصة بالمؤسسة التشريعية.. أنا بستأذن الامير عبدالرحمن واغير شوي بمفردات القصيدة دون المساس بالمضمون.. لأنها تنطبق على واحد خدوده تورمت من مخابي الشيوخ وعطاياهم وبالتالي الناقص يسبهم ويشوفهم مجرد غترة وبشت مو أكثر.. ولأنه مو محترم راح أشيل كلمة احترامي..
وأقول: المحامي هو الحرامي.. فاشل واسمه عصامي.. لؤم مع خبث ودهاء.. مدح والمعنى رثاء.. لوحة مسروقة بغباء.. وصار بالصف الأمامي.. المحامي هو الحرامي..

• مرض البرص
في دراسة جميلة وصلتني عن طريق الإيميل تقول ان طبيبا فلسطينيا توصل لعلاج مرض «البرص» أو البهاق.. عن طريق التشافي النفسي.. الحقيقة انها دراسة تستحق ان تنشر ويطلع عليها كل مصاب بهذا المرض.. ولأن الموضوع طويل راح انقل لكم قصة الاختراع.. يقول الدكتور الفلسطيني جوزيف ايليا.. ان العامل النفسي احد المسببات الرئيسية لهذا المرض وتزايده في انحاء الجسد.. فالكاذب الذي استمرأ الكذب والتلون والادعاء على الآخرين حين ينكشف قد يصاب بهذا المرض.. والأمثلة كثيرة.. تبون الصج اذا صدق الدكتور جوزيف.. افتكر البرص راح ينتشر بالديرة..

• طق يا مطر
استبشرنا خير بنزلة زخات المطر على أرضنا الحبيبة.. بس الغريب العجيب ان الموضوع احتاج تغير بالجو طبعا مسبوق في الكويت، وياما شفنا مرات ومرات.. اول شي رطوبة.. بعدين صارت الدنيا حمرة.. تالي ظلمت.. شوي صارت غمتة.. دقايق والا الغبار مسيطر.. ثواني والمطر انهمر باستحياء.. واشتغلت رحمة الله وهات يا غسيل سيارات وتحلطم ما عرفنالكم تبون مطر والا ما تبون؟ ويمكن انا اشوف ان الاوضاع السياسية بالكويت لازم تكون مثل جونا.. 4 استجوابات مالها معنى.. بعدها القروض ما تطيح.. تالي المجلس هذرة ولوية على ما ميش.. عقبها استجوابات بالهبل.. شوي ويطق المطر بالحل على خيام المرشحين.. ومثل ما رحنا ردينا..

• كلمة راس
هذي رسالة حق اللي ينتقدون بوشيخة وزاويته ومقالاته ولهجته العامية..
أنام ملء جفوني عن شواردها
ويسهر الخلق جراها ويختصم
جبح خلق مختصمين..
إقرأ المزيد...

الثلاثاء، 17 نوفمبر 2009

حوار هابط.. وبحصانة؟

18/12/2009
في كل فريج أو راس عاير أو سكة أو براحة يتيمعون خمة من الصبيان الداثرين.. أو اللي الشطانة والبلاسة تقطر من يبهتهم.. وعادة هذولا يسمونهم اهل الفريج.. «المصبنة».. لأنهم ما يحشمون أحد ويسبون ويغلطون على الكبير قبل الصغير.. ويتحرشون بمناسبة وبدون مناسبة بكل واحد يمر بطريجهم تحت بند المرجلة المغشوشة بالكثرة مو أكثر.. ولي صار واحدهم بروحه يصير عبود.. وهالنوعية من الناس لما يكبرون ما يحصلون لهم صاحب حتى لو عقلوا.. فتلاقيهم يتحولون الى مستنقع امراض نفسيه تنتهي بتعاطي المخدرات.. أو الانتحار بسبب الوحدة القاتلة.. وهذوله يعتقدون ان حصانتهم تنبع من تواجدهم مع بعض.. وكلامهم يكون جارح.. ويجذبون الجذبة ويصدقونها.. وينهشون بأعراض الناس.. ويدعون اشياء ماهي فيهم مولي.. والمادة امية وعشرة بالدستور عطت للنائب حق ابداء الافكار والآراء تحت القبة واللجان بدون ما يؤاخذ على أفكاره وآراءه بأي حال من الاحوال، طيب هل سب الناس من الآراء والأفكار؟ هل اتهام الناس وتتبع حياتهم الشخصية من الآراء والأفكار؟ هل التحصن بالحصانة دليل مرجلة؟ ليش واحدهم يصير أسد تحت القبة ولي طلع يصير حمار ماي؟.. ليش النائب اذا شاف المايكروفون والكاميرات يصير مثل الثور اللي وصل موسم تزاوجه؟.. ليش النائب لا يؤاخذ على مسبته للناس ونهش اعراضهم؟.. هل هذا شي منطقي؟.. أرجع وأقول المرجلة انك تواجه وتبدي رايك وافكارك بسياق المنطق يا مشرّع الأمة الدايخة.. والحجي اللي قاله مسلم أمس ماهو بعيد عن كلام عيال الفريج مولية..

• كلمة راس
الحملة الوطنية للقضاء على البرغي دشنوها القراء من خلال ايميلاتهم لي اللي طالبتني بإنشاء جمعية للقضاء على البراغي الدايخة.. ومن ثم المطالبة باستجواب رئيس الحكومة اذا البرغي الدايخ ما انقرض.. مو تدرون الموضة هاليومين أربع واوية يسوون جمعية ويطالبون بإقالة الرئيس بسبب برغي.. مشكلة!..
إقرأ المزيد...

الاثنين، 16 نوفمبر 2009

برغي العايلة

17/11/2009

الله يهديها أم شيخة ما يمر يوم إلا وتتحلطم عليّ وعلى شيّوخة.. لا تاكلون حب لا تشربون بيبسي لا ترفعون صوت التلفزيون.. واحنا ما بيدنا حيلة لأنه أم شيخة شرانية وأنا وشيوخة نحب السلام.. وكالعادة توني طالع من البيت دقت عليّ أم شيخة وقالت لي ارجع بسرعة.. طاح قلبي ببطني ورديت عبالي شيخة فيها شي ويوم دشيت البيت شفتها قاضبة بيدها برغي؟ سألتها رادتني علشان برغي؟ قالت لي اي هذا برغي كبت المطبخ مصدّي ولازم تغيره.. طبعا طقتني البوهة وقلت لها نغير مطبخ علشان برغي حلي؟ قالت لي عندك حل من اثنين يا تروح تدور برغي مثله او تغير مطبخي كله.. وابتدت رحلتي التاريخية للبحث عن البرغي المنشود.. ولأن الانترنت ملاذي الأول والأخير في هالسوالف دشيت أدور عن البرغي اللي ابيه.. وشفت العجب العجاب.. البراغي لها أنواع وأسماء وألوان وأحجام.. في برغي فولاذ ما يصدي ولا ينكسر وفيه كفالة عشرين سنة.. وفي برغي ستيل حق الأماكن البارزة.. وبرغي نحاس حق البيبان وقضبات الادراج واليررارات.. وفي نوع من البراغي ملون .. يعني برغي كشخة يصلح حق الأرفف حسب لونهم.. وفي البرغي اللي كلنا نعرفه مال الخشب اللي كثر ما اتيته يستجيب لك.. توديه يمين يسار يروح وياك.. تطقه بمطرقة ما عنده مانع.. وهذا بتقرير الانترنت أردى برغي.. بعد ما تثقفت بالبراغي.. بديت رحلة الألف ميل للمحلات علشان أشتري البرغي المناسب حق مطبخ أم شيخة.. دخلت أول محل تجاري معروف بالكويت «الصفار» وهناك اكتشفت ان براغي الانترت شي وبراغي السوق شي ثاني.. وما قصر مسؤول المعرض وبلّش يشرح لي البراغي وتاريخها.. قال لي «عندنا براغي حسب الطلب.. تبيه حق لوحات تاريخية موجود.. تبي برغي حق أرفف التحف والآثار عندنا.. تبي برغي زائد او ناقص هم عندنا».. ونصحني نصيحة وقال لي.. دير بالك تشتري برغي نحاس يأذيك وكل يوم واحد يفره صوب.. تبون الصج افتر راسي ورجعت البيت وشريت مطبخ يديد لأن على كثر البراغي اللي بالانترنت والسوق اكتشفت ان الديرة فيها برغي واحد ينباع بمحلات مراكز العائلة بجمعياتنا.. وهالبرغي ما يصلح موليه.

• كلمة راس
احنا اليوم لمحنالك.. باكر رح نذكرك بالاسم.. وإذا انت و«الذيل» مالك ما تحترمون أنفسكم رح نكشف للعالم «ماجداتكم» و«شذوذكم» وتكون على نفسها جنت براقش!
إقرأ المزيد...

الأحد، 15 نوفمبر 2009

قريت

16/11/2009
قريت مقال الكاتب الصحفي نبيل الفضل المنشور بجريدة الوطن تحت عنوان (Irex).. وحاشني عقر بقر.. تالي تعومست.. فجأة حسيت بالأرض تدور من حولي ثلاث مرات بالثانية.. ومرة واحدة صفنت واسترجعت الذاكرة وشفت انه كلام منطقي ومتناغم وجميل.. اي ليش لأ.. اللي قاعدين يأزمون الديرة ممكن، وأكيد قاعدين ياخذون الثمن الإصلاحي بطريقة ما توحي أنها عمالة وخيانة عظمى.. الأدهى والأمر ان هالجم نفر قدرت احصرهم.. شغلهم الشاغل تخريب ديمقراطيتنا وتشويه مجتمعنا تحت ذريعة الدستور (اللي داسوا ببطنه).. وأول مرة أعرف أن بوبراك يؤمن بنظرية المؤامرة.. مو منه من اللي شافه منهم..
قريت مقال لواحد ما غيره، اللي عقب دهنه والصمان قام يروح بيروت وجزر المهايط.. الله يرحم ذيج الايام.. يتقلقص بالدرجة السياحية.. وكل نص ساعة يعد فلوسه.. وكل ثمان دقايق يجيك على جوازه اللي مافيه الا ختم سورية والبحرين ويمكن بانكوك.. ما علينا.. هذا الاجلح الأملح اللي متعود يقول حاضر سيدي.. ياي يعلم محامي ماهر وسياسي محنك صار له سنين وبنين شلون يتحجى ويصرح.. مو هذا الزمن ردي اللي خلاه يصير سياسي وكاتب.. عاد هذا واحد من المجموعة اللي كتبت عنها فوق..
وقريت مقال النائب الأسبق والوزير الأسبق.. والكاتب اللي ان شاء الله ما يصير أسبق الحلو الأنيق اللبق علي البغلي المحامي.. عن الدستور وسالفة الشيطان الأخرس.. وبالفعل عرفت أن حماة الدستور ما ينفعون يحمون روحهم من سوالفهم العمية.. والا أكو نائب ما يعرف يقول كلمة «الدستور» عدل شايل سيفه وداش.. السوق الداخلي.. وقاضب ورقة علشان يقول لنا ان الامة مصدر السلطات جميعا؟.. جبح نواب يقطرون ملاقة.. وعسل يا البغلي بالبشت وبالبدلة..

• كلمة راس
أنا كوني مواطن درجة أولى.. أتساءل وقصدي شريف.. اللي حل الاندية لأنها رافضة تعديل القانون على قولته.. هل طلب منهم بكتاب رسمي هالشي ورفضوا؟ هل ناقشهم.. وبعدين هل اللي عينوهم مكانهم بصامة مطلوب منهم الموافقة وأهم مغمضين؟ شهالعبو.. بس والله وحصلنا كبش فدا برتبة وزير.. وعلى قولة مطشر.. بعيد الدرب شيوصلك حيث المسافة بعيدة..
إقرأ المزيد...

السبت، 14 نوفمبر 2009

كرة القدم .. يمكن حرام

15/11/2009
1930 أول فريق كرة قدم كويتي مايدرون وين الله حاطهم.
1940 بطولة شركة النفط ربعنا قوالجي والانجليز تشوّت فيهم.
1950 عيال شرق يلعبون كرة بالمقبرة وعيال جبلة حد يوشهم محيبس.
1960 فرق شعبية ابرزها الكواكب والباجي فنايلهم مشققة وأهدافهم سياسية.
1970 تأسيس اربعتعش نادي يلعبون على التراب وبداية اكتشاف المواهب.
1980 منتخب الكويت نصه من القادسية ونصه من العربي والعنبري احتياط.
1990 استشهد أبو كرة القدم والرياضة الكويتية الشيخ فهد الأحمد.
2000 نادي القادسية علامة فارقة ونادي العربي يمتع اللي ما يتمتع.
2009 رابطة جماهير اندية العربي والقادسية تشجع نادي الكويت علشان يفوز ببطولة من غير محترفين.

• كلمة راس1
أستغرب تحريض وزير الشؤون لحل الاندية لأنها اختارت بالديمقراطية توجهاتها.. واللي أستغرب منه زود ان شباب يمثلون قطاع التجار يشوفون بعين واحدة.. وينكم عن غرفة التجارة؟ وينكم عن الجمعيات التعاونية المعينة في مناطقكم الانتخابية؟ وينكم عن اوضاع البلد.. والا السالفة فيها طلال الفهد؟

• كلمة راس 2
أحد النواب عنده عقدة عيال فهد الأحمد.. وعن طريق مصادري عرفت السالفة اللي مخليته هالنومنة.. بس ما أقدر اكتبها.. بس اقدر اضرب مثل والقارئ يصيدها عالطاير.. العوض من التعويضات والقطيعة من المكافأة.. علشان جذيه الحبيب بالطالعة والنازلة يهستر على احمد الفهد واخوانه.. ولو يصير بلنتي بملاعب الصليبية والحكم ما يحسبه يصرح النائب ويقول .. احمد الفهد ورا الموضوع.. !

• كلمة راس 3
أنا مستغرب شلون النائب محمد هايف لي الحين ساكت على شورتات اللاعبين القصيرة ؟ ومتعجب وايد من سكوته على شيلات الجمهور ؟وطبولهم ؟ تحرك يا أخي وشوف لنا اقتراح يمنع الشورت والطبول والأغاني في الملاعب.. وبالمرة قول رأيك في قوانين الرياضة.. لأنه الهيئات الدولية يديرونها كفار ما يجوز نطيعهم ونعدل قوانينا ؟ جذيه تصير كرة القدم حرام ؟

• كلمة راس 4
تعبت.. جبح أوضاع تلوع الجبد.
إقرأ المزيد...

الأربعاء، 11 نوفمبر 2009

مواد وتعليق

12/11/2009
• مادة 7: العدل والحرية والمساواة دعامات المجتمع، والتعاون والتراحم صلة وثقى بين المواطنين.
- بوشيخة: والله اللي يشوف النجرة بين النواب وتهجمهم على الوزراء يقول هالمادة مالها وجود بالدستور..
• مادة 25: تكفل الدولة تضامن المجتمع في تحمل الأعباء الناجمة عن الكوارث والمحن العامة.
- بوشيخة: ألعن من كارثة القروض ماكو اهي كارثة ومحنة تستدعي تفعيل هالمادة..
• مادة 36: المتهم بريء حتى تثبت إدانته في محاكمة قانونية تؤمن له فيها الضمانات الضرورية لممارسة حق الدفاع.
- بوشيخة: افتكر النواب يقرونها بالعكس والدليل انهم تحت القبة يدينون الكل حتى يثبت انه بريء بالقضاء.
• مادة 50: يقوم نظام الحكم على أساس فصل السلطات مع تعاونها وفقا لأحكام الدستور.
- بوشيخة: إلا هالمادة.. كل ما اقراها اتبوسم واقول حق روحي..ودي ودي اصدق بس قوية قوية..
• مادة 85: لمجلس الأمة دور انعقاد سنوي لا يقل عن ثمانية أشهر، ولا يجوز فض هذا الدور قبل اعتماد الميزانية.
- بوشيخة: هالمادة امية بالامية صح سبعة شهور كلام فاضي وتسعة وعشرين يوما نجرة ويوم واحد سلق للميزانيات..
• مادة 108: عضو المجلس يمثل الأمة بأسرها، ويرعى المصلحة العامة، ولا سلطان لأي هيئة عليه في المجلس أو لجانه.
- بوشيخة: أكثر من كدة ديكتاتورية مفيش..ولا سالفة الأمة بأسرها..
• مادة 110: عضو مجلس الأمة حر في ما يبديه من الآراء والأفكار بالمجلس أو لجانه، ولا تجوز مؤاخذاته عن ذلك بحال من الأحوال.
- بوشيخة: هذا محد مواخذهم وجذيه لو احد مواخذهم على اللي يقولونه شيصير..
• مادة 137: يجوز للمؤسسات العامة وللأشخاص المعنوية العامة المحلية أن تقرض أو تكفل قرضا وفقا للقانون.
- بوشيخة: أشك ان بدر الحميضي قرأ هالمادة.. يعني مافيها شي إذا اقترضنا من صناديق التنمية وساعدنا المواطن..

• كلمة راس
الثقافة الدستورية عند المواطن كلها ما تتعدى جلسات مجلس الامة.. دستور شكبره وشعرضه فيه مواد الدنيا..لكن الناس مخدوعة في الجلسات وبس.. وكأن الدستور مختزل بجلسات البرلمان وممارسات النواب.. على قد ما دستورنا جميل.. نشوف ممارسات النواب شلخت الدستور ومواده..شهالعبو..
إقرأ المزيد...

الثلاثاء، 10 نوفمبر 2009

الشارع مكانكم

11/11/2009
يقول الامام الحسن بن علي عليهما السلام.. إياك وظلم من لايجد عليك ناصر له الا الله.. واللي نشوفه اليوم من مواقف بعض التجمعات السياسية غير المرخصة.. والكتل البرلمانية اللي تنضح بالمصلحة.. على سمو رئيس مجلس الوزراء يخلينا نتيقن بأن الرجل مع قلة من رجال الدولة قاعد يتعرض لظلم بيّن.. وبوصباح قدره مواجهة أشباه الرجال اللي النعامة تستحي من فعايلهم.. «حدس» عقب ما رزهم وعزهم بوصباح يطالبونه بالاستقالة.. و«الشعبي» عقب ما ترسوا الدنيا كلاماً عنه بأنه إصلاحي ركضوا وركبوا موجة «كشف الحقيقة» أي حقيقة؟ ما ادري.. هل حقيقة الصراخ اللي دمر البلد؟ أم حقيقة اللي افتر عداده ورجع لسن المراهقة السياسية.. والأدهى والأمر واللي ضحكني وأنا متألم بيان التحالف الوطني الديمقراطي.. أي تحالف وانتو مكشوفين بخلافاتكم على تذاكر درجة أولى وبزنس؟ أي وطني وانتو شلختوا الوطن وفتتوا كل اركانه.. وعقب كل هذا تتهجمون على بو صباح تبونه يقدم اعتذارا؟ ناصر محمد الاحمد الجابر المبارك بن صباح.. ماهو محتاج بريق الحكومة.. ولا يهمه الكرسي مثلكم.. ولا لجأ للشارع يترجاه بوقت الانتخابات مثل نوابكم.. ناصر المحمد سليل اسرة حكمت 300 سنة وراح تحكم بإذن الله لين يموت الحاقدون بقهرهم.. ناصر المحمد اذا نسيتوا اذكركم.. ابوه وزير وعمامه أمراء وخواله اشراف وجده امير وجد ابوه امير وجد جده امير.. ناصر المحمد ايام فقر بعضكم، وهذا مو عيب، كان ينفق بيمينه مالا تعرف شماله.. فشلتونا جدام العالم.. واحدكم يفتخر بالدواوين بعطايا آل سعود وآل نهيان وآل خليفة وغيرهم من امراء وشيوخ الخليج الكرام.. ولما يشوف الكرم من شيوخه وتاج راسه يتحلطم ويسميها رشوة.. منطق عوي.. ولسان مقلوب.. وعقل ما ميش.. وانتو تعرفون ان ناصر المحمد ما عنده أساليب ملتوية.. رجل سيده.. مؤمن بالله وقضائه وقدره ولا يرده أحد مثلكم عن خدمة اهل الكويت.. وراح ينتصر بالله وتنكشفون جدام الشارع اللي يابكم وله بتردون.. جبح نواب لسانهم يلوط اذانهم وعطايا آل الصباح ترست بطونهم..

• كلمة راس
عندي ملاحظة للإخوان في قناة «العدالة».. وتحديدا برنامج «اللوبي» جان زين تركبون لكم جهاز أو شاشة لاستقبال رسائل المتابعين لكم.. مو الكل يعرف أرقامكم.. وبالمرة نفتك من المنّاع وهو يقول وصلتني «مسج» من ابنتنا سارة الثويران، والانصاري لما يقول عندي رسالة من جليل الطباخ.. ودهيران اللي يكتب مسجاته على الورق ويقراهم.. وبو أنور اللي منزل راسه ويتكركر ويقرا الرسايل ويقول.. فمان الله.
إقرأ المزيد...

الاثنين، 9 نوفمبر 2009

سم بالعسل

10/11/2009
«ومعهم شهيدا مجلس الأمة التشريعي في العام 1939 المغفور لهما محمد المنيس ومحمد القطامي، والسجناء الستة، وكذلك بقية أعضاء المجالس المتعاقبة: مجلس الشورى 1921، ومجلسا الأمة التشريعيان في العام 1938، والمجلس التأسيسي في العام 1962».
هذا جزء من خبر منشور في الصفحة الأخيرة من إحدى الصحف الزميلة.. أول مرة أعرف أن عندنا شهداء مجلس أمة.. طيب منو قتلهم؟ وليش استشهدوا؟ وشنو كانت قضيتهم اللي استدعت شهادتهم؟ وشنو علاقتهم بالسجناء الستة؟ ومن اللي سجنهم؟ طيب شلون نحتفل بسجين حبسه النظام ذيج الفترة؟ وشلون نعتبر الاثنين شهيدين واهما كانوا مع السجناء؟ ومنو اللي كان يحكمنا ذيج الفترة؟ وليش نحتفل بسجنا وشهداء على قولتكم؟ شصاير شالسالفه؟ هذي فتنة عظيمة.. وهذا دمار شامل للمجتمع.. وهز متعمد لصورة الشيوخ والأسرة الحاكمة..ونقول لمن هو ورا هالخبر: بسكم تفتيتاً للوحدة الوطنية.. مافيكم شوية غيرة على أجيالنا القادمة؟ ليش هالتوقيت؟ أشوف الدستور صار له ستين سنة ما أبنتوا «شهداءه» اللي تزعمون ولا احتفلتوا بالمساجين؟ واحدكم صك الستين مو عمره ثمانتعش ويبي يبرز عضلاته اللي مالها معالم.. لكن الشرهة.. على اللي مخلينكم تسرحون وتمرحون وساكتين عنكم.. والا انتو عين عمجوه؟.. الله لا يبارك من يفرق بين الكويتيين ويخربط التاريخ لمصلحته.. وكل واحد ناقم على الكويت حكاماً ومحكومين.

• كلمة راس
سيدي ولي العهد كنت وزيرا سابقا ناجحا للداخلية.. وأنت أكثر من يعرف التاريخ الصباحي الكريم مع اهل الكويت.. فإليك أشكو بعد الله هذا الذي أراه في بلدي الحبيب.. ومنك أطلب يا سيدي التدخل اليوم قبل أن تنفجر الكويت بفتنة لا يرضاها أحد.. فبك استجير بعد ربي يا بوفيصل..
إقرأ المزيد...

الأحد، 8 نوفمبر 2009

بيان الوزير

9/11/2009
ما تفاجأت من بيان وزير الديوان الأميري الشيخ ناصر الصباح.. وبنفس الوقت ضاق خلقي لأن البيان ما شفى غليل أهل الكويت.. نعم البيان يانا بوقته كمتابعين للساحة السياسية وكان مختصرا ومفيدا.. لكن فيه نقطة مهمة غابت عن الشيخ ناصر الصباح.. موضوع الشيك واللي أثاره من أحاديث كثيرة عن تدخل الشيخ بتسريبه استدعى بيانا يكون متكاملا على الأقل يتضمن اشارة واضحة للبراءة من تهمة تسريب الشيك وبنفس الوقت البراءة من بعض الكتّاب اللي ما عندهم شغلة الا مهاجمة سمو الرئيس بمناسبة وبدون مناسبة.. ونقرأ من ما يقرأ غيرنا بالمنتديات والمدونات وبعض كتاب الصحافة ان هالكتّاب محسوبون على الشيخ ناصر الصباح.. ولأن بعض هالكتّاب يرتبطون بوزير الديوان بحكم علاقات قديمة كان الواجب يطلع بيان متكامل ينفي علاقته بهالأمور.. علشان جذيه بيان الشيكات كان دمعة وقفت على خد الحقيقة ونشفت لأن الخد ينتظر دموعا كثيرة تطهره من الخطايا.. فهل يبرد قلوبنا وزير الديوان ويكمل جميله وواجبه تجاه ولد عمه؟

بيان برقان
بيان بنك برقان ينطبق عليه المثل المصري «الحلو ما يكملش» ولأن مهندس البيان عنده عقدة من الإعلام شرّق وغرّب ودش القرقور من حيث لا يعلم.. هذا الرجل متقصد للإعلام بشكل غريب عجيب.. يمكن لانه تأثر بالنائب فيصل اللي يشوف ان الإعلام فاسد بمجرد قوله للحقيقة.. مو معقول هذا العذر الماصخ.. مات واحد قام واحد واتهم الإعلام وحمله السبب.. شيك يطلع من بنك شعرضه وشطوله يقوم من يتهم الإعلام ويقول لنا وقفة.. الإعلام شكو؟ هل الإعلام عضو مجلس ادارة؟ هل الإعلام يداوم بالدور السابع؟ شوية منطق واللي يحجي خله يجابل شغله ولا يدش ساحة الإعلام لأنه ذيج الساعة بيكون في حانا مانا..

• كلمة راس
تبون الصج شفت الناس بالكويت تتفق على وايد قضايا وأمور لكن اتفاقهم المطلق على سلامة نوايا الشيخ ناصر المحمد حيرني.. ولما احترت سألت أحد المقربين من الشيخ فبدد حيرتي وقال لي.. صدقني الشيخ ناصر حليم جدا وكريم جدا جدا.. وعنده حسن الظن والنية مقدمين على السوء والشك.. والرجل قبل كل هذا يؤمن إيمانا مطلق ابأن الله سبحانه وتعالى ما يضيع أجر المحسنين.
إقرأ المزيد...

الأربعاء، 4 نوفمبر 2009

بنك الزفر وحمار الجت

5/11/2009

في مسرحية «فرسان المناخ» كان في مشهد يتكلم عن انشاء بنك بالبحر.. واستقر الممثلين بتسمية البنك «بنك الزفر».. ولأن الزفرة محد يحب يشمها.. ولا احد يرضى يمشون فيه الزفر.. فمفردة «زفر» مو محبب استخدامها.. لكن اللي صار أمس بمجلس الأمة تبون الصج خلاني أشم ريحة زفر العن من ريحة سوق السمج ومخلفاته.. لأن النائب اياه اللي ما عنده سالفة غير سالفة الشيكات كشف لنا موقف بنك ما احترم خصوصية الناس ولا حفظ امورهم الشخصية.. ومنو الشخص؟ سمو رئيس مجلس الوزراء.. ناصر بن محمد الأحمد الجابر المبارك الصباح.. أقسم برب العزة ان اللي سرّب الشيك ماعنده دم ولا بويهه ذرة ماي.. هل التبرع للمبرات والكرم صار عيب؟ والا تبوني افتحها بحري واتكلم عن عطايا وهبات بالسر؟ ترى الشيخ ناصر لو بيعطي احد رشوة يسحب له كاش؟ ولا ملزوم يعطي رشوة واهو مهيمن على مصالح الشعب بحكم الدستور؟.. سبق وقلتها منو اللي مستفيد من هز صورة الشيخ ناصر بشخصه بعد ما فشل بهزها سياسيا؟ منو اللي يبي الشيخ ناصر يطيح علشان يوصل له الدور؟ اعتقد صار الأمر واضح أوضح من الشمس نفسها.. وترى النائب إياه أداة واللي يبي يعرف الدليل يشوفه شلون ياكل هوا وينترس حلجه رمل اذا سألوه عن أسماء المستفيدين من الشيكات.. قبل قال نما إلى علمي والحين يقول ما عندي يقين.. لكن يبقى مجرد وسيلة وقابل يكون «حمار جت» يشيله وما ياكله.. بس الخطورة مو هني.. الخطورة اذا البنك الزفر طلع حسابات خاصة برئيس الحكومة؟ عيل المواطن العادي أكيد حساباته وتحويلاته السرية مكشوفة.. ويمكن بأي وقت يفضحون أي مواطن حسابه عندهم.. لأن الشيك مكتوب عليه مدفوع.. ومختوم بختم البنك.. يعني النسخة طلعت من البنك والنائب أداة وراضي يكون «حمار جت».. لكن الشرهة على البنك المركزي إذا سكت والشرهة على كل نائب ما ينفي هالتهمة عن نفسه، واذا النائب سابق على قولة «حمار الجت».. فأنا ادعو كل مواطن لرفع دعوى على النواب السابقين خاصة وانهم بدون حصانة ويحاججهم ويخاصمهم امام القضاء يا انهم يثبتون براءتهم وينكشف النائب او انهم يدانون ولحظتها لكل حادث حديث..
إقرأ المزيد...

الثلاثاء، 3 نوفمبر 2009

بوشيخة... مانشيت وتعليق

4/11/2009

* الراي - الرد على أسئلة المسلم ينتظر.. كلمة القضاء
- بوشيخة: عسى القضاء والقدر يكون أسرع ونفتك
* اوان - مصروفات الرئيس في «أمانة » المجلس
- بوشيخة: والله زمن اللي الكرم الحكومي مع ضيوف الدولة صار سبه وعذروب
* الجريدة - جلسة المجلس اليوم على صفيح ساخن
- بوشيخة: ما عندهم ما عند يدتي.. أسخف منهم ماكو
* الرؤية - الخالد يحيل نفسه إلى محكمة الوزراء
- بوشيخة: بونواف تبي الصج محد عرف حق بوحمود كثرك..
* النهار - بدائل جديدة للكوادر المالية
- بوشيخة: مانبي كوادر نبي بدائل لفوائد القروض
* الوطن - الخالد: أحيلوني.. للمحكمة!!
- بوشيخة: هذي خطة حرب الاستنزاف يا بونواف والداد حق بوحمود واعليه عليه..
* القبس - الخرافي: جلسة المعاقين 3 ديسمبر.. والحكومة يجب ألا تظهر خائفة
- بوشيخة: هذي فيها زغاله من بوعبداللطيف والا شالرابط بين المعاقين والحكومة؟
* الصباح - الروضان: الإجابة عن مصروفات الرئيس سلمت إلى مجلس الأمة
- بوشيخة: والله يننتونا بهالمصروفات اللي يسمعكم يقول صارفين مليار..
* السياسة - الحكومة: خيارنا المواجهة
- بوشيخة: وهذا عين الصواب وزين تسوون ترى النواب ام ناصر لسان طويل والحيل قاصر
* الانباء - البراك لـ «الأنباء»: إحالة الخالد نفسه لمحكمة الوزراء لن تعفيه من الاستجواب
- بوشيخة: محد موهقك يا بوحمود الا الوزير اللي ما يستجوب
* الدار - الخالد «قصّ الحق من نفسه» !
- بوشيخة: الخالد قص الطريج على المؤزمين..

• كلمة راس
في مفاجأة راح اكشف عنها خلال يومين او اقل، من خلالها راح تعرفون شقد في ناس في الكويت ينامون ويصحون على الفتنة ويموتون على نبش القبور والرقص على الجثث.. بس صبركم علي.. لأني راح اعري اثنين من الأراجوزات اللي قاعد يحركهم بو فلان..
إقرأ المزيد...

الاثنين، 2 نوفمبر 2009

الكويت أهم

3/11/2009

بكل ديوانية وبكل مقر عمل وبكل طابور اسمع الناس تقول (وفق الدستور) عن ممارسات النواب وتعاطي الوزراء مع قضايانا الرئيسية المحلية.. ولا عمري سمعت احد يقول (وفق حبنا للكويت).. مليون مرة قلناها وتنطعنا فيها لو يرد الراحل عبدالله السالم نبوس ايده وتالي نبوس ايدنا مقلوبة على نعمة الدستور.. مع تحفظنا المؤكد على ان الكويت قبل الدستور حكامها هما هما ما تغيروا عقبه قراب من الشعب ويستشيرونه بآليات مشابهة للدستور.. لكن اللي صاير الحين غريب، عجيب.. عسى ما انتقدت نائب لممارسة ما الا وسموك منقلب على الدستور! وعسى ما ابديت رايك بمادة من مواده الا وهاجموك بكل أسلحة الكلام.. ليش؟ تعالوا أنا اقول لكم.. وبضرب لكم مثال.. واحد اربعة وعشرين ساعة مرته تطقه بالقندرة – كرمكم الله – وتنومه بالصالة بسبب وبدون سبب.. ومطيحة حظه يدام اليران.. وشالخة أم أمه يدام عياله.. وبنفس الوقت أهو مسؤول كبير في الدوام شراح يسوي بموظفينه؟ الأكيد انه بينتقم لنفسه ويسوي روحه ديج وأهو أردى من دياية عدي.. هذا بالضبط اللي قاعدين نعيشه اليوم.. ناس مالها قدر بالدستور وقبله صارت تحكم بسبب قناعات ناخبين حد يوشهم عشا وبيزات ومعاملات.. يابولنا المتردية والنطيحة.. وناس هالنومنة ما ممكن يفكرون بالكويت وعيالها.. وما أردى منهم الا بعض الوزرا اللي عسى ما صرخوا عليه الا قام وركض لهم.. شي غريب، عجيب يعث يلوع الجبد واييب القرحة.. عيز صاحب السمو الله يحفظه وأهو يوجهنا.. تعب سمو ولي العهد واهو يعطينا ملاحظاته.. سمو رئيس مجلس الوزرا بكل مناسبة يأكد كلام الامير وولي العهد.. رئيس المجلس دفع دمه مقابل توصيل فكرة شكر النعمة والعمل على الإنجاز.. وبعض النواب كبير وصغير ما يستحون ولا يخيلون ولا بويوههم قطرة دم.. والكويت آخر همهم.. وعقب كل هذا يقولون لك (وفق الدستور) والله يبا اللي يسمعكم يظن انكم صج «دستوريين».. انا عن روحي اشوف الكويت اغلى من الدستور ترليون مرة..

• كلمة راس
في مقابلة للنائب العدوة في قناة العدالة قال «نريد وزراء فرسان مثل النواب» أول مرة أشوف نائب يمدح نفسه.. بعدين إذا الوزراء مو فرسان اعذروهم لا تستجوبونهم.. شهالمنطق.. والمصيبة ان المناع يأيده والانصاري لاهي بموبايله ودهيران يالابس النظارة يا فاصخها ومقدم البرنامج بو أنور كله فاج حلجه ويضحك..
إقرأ المزيد...

الأحد، 1 نوفمبر 2009

شفيكم ساكتين؟

2/11/2009

إلى كل أبناء وبنات الأسرة الحاكمة في دولة الكويت شنو سبب سكوتكم عن اللي قاعد يهاجمكم بصفاقة وقلة ذوق وجذب وزيف ويبين للشعب بشكل غير مباشر انكم مو قد المسؤولية؟ شنو سبب صمتكم المريب عن واحد دوني يحاول يفكك الشعب اللي يحبكم بالفطرة؟
وينكم عن اللي بالطالعة والنازلة ما مهنته الا اثارة الفتنة؟ لا تقولون لي انه سفيه وما يستاهل الرد.. ولا تقولون لي ان ما يأثر بأحد وان الناس تعرفكم.. ترى حتى الاخو العود بالبيت يفقد هيبته اذا خلا جاره يطقه بحكم انه سفيه وياهل! هذا سرطان ما يوقف الا لين يقتل كل خلايا الحياة في الجسم.. وانتو راس الجسم اللي اهو الشعب.. والله ثم والله ان الشعب الكويتي يحبكم حب لو لفيتوا الدنيا كلها ما تحصلونه بسبب مواقفكم وطيبتكم وياه.. لكن هالنكرة الشاذ فكريا يكرهكم ويبي يدمركم وانتو ساكتين عنه ليش؟ هل هو ضعف منكم؟ هل هو حلم منكم؟بس الحليم يغضب؟ وين غضبكم؟ وين تدخلكم الحكيم لقتل افكاره.. يبا حنا مو ضد حرية الراي واعتقد ان نواب وكتاب الكويت كلهم ينتقدون افعال الشيوخ اللي بالعمل العام.. لكن هذا ما خلا شي الا وقاله.. يقول انكم مو أهل للسيطرة على الناس وان بعضكم طرق البشت؟ يسولف عن خلافات بينكم ويصور للشارع انكم مختلفين وتبون مصدات للشعب؟ عاجبكم الحجي؟ مقتنعين كيفكم.. لكن هذا تحذير من مواطن يشوف بعين ربت عندك ويسمع بإذن سمعت بأخباركم كأسرة واكتبها بيمين شبعت من عطاياكم للشعب ايام الرخا والفقر.. ترى هالدوني اهدافه المعلنة مناكفتكم، عيل غير المعلنه شتكون؟ اقسم بالله العظيم ان اللي بدوا يصدقونه أكثر مما تتصورون ورقمهم يزيد كل دقيقة والسبب سكوتكم وصمتكم الغير مبرر.. انا ما اقول ذبحوه او عذبوه وادري ان هذا مو من اخلاقياتكم.. لكن معقوله ماكو شيخ يتحرك ويوقفه عن حده بتحويله الى السلطات المختصة.. ترى هذا يمس أمن الكويت.. ترى هالدوني خطر محدق بآرائه المسمومة.. هذا انا قلت لكم وانتو كيفكم..

• كلمة راس
ادري بيطلع لي الف دوني مثله ويقولون عيل وين حرية الرأي وانتقاد الشخصيات العامه من الاسرة.. وآنا اقول لهم وارد عليهم.. تعلموا من الربعي مع كل خصومته السياسية مع حكومات الشيخ سعد، الله يرحمه، ما قط يوم هاجم الاسرة برموزها خارج إطار الدستور.
إقرأ المزيد...