شبر ماي

31/8/2009
الوضع في الديرة هاليومين صاير غريب عجيب.. كل مشكلة صغيرة بتصريحات النواب تصير كارثة! جلسة خاصة ومشاخط وملاسن وتحلطم وكأن الكويت فيها مشردين وآخرتها 50 موظفا تسرحوا من شغلهم بسبب الأزمة المالية العالمية والحكومة ساعدتهم وخلصت مشكلتهم..
الكهربا صار لها ست سنوات تطفي وتشب والحين ليش الوزير الشاب بدر الشريعان استلم الوزارة ومتخصص قاموا النواب وصاحو عليه ويبون جلسة خاصة.. والريال بتوقيع واحد راح يحل المشكلة مطلع ألفين وعشرة.. انفلونزا الخنازير وباء عالمي وهلال الساير شاد حيله وطبيب ومتمرس وحكيم وقاعد يشتغل ما خلووه اشتغلوا عليه شغل غريب من نوعه وطالبوه بالاستقالة.. وهذا هلال حط ايده على الجرح وقاعد يجتهد في محاصرة المرض بإمكانياته وخبرته ومعاه فريق مو مقصرين.. لكن النواب صاروا مثل اللي توها بالغة كل ساعة والثانية يبون جلسة خاصة.. مشرف وما أدراك ما مجاري مشرف.. وبرضو النواب شالو شليلهم وصرحوا وصاروا خبراء بالمجاري والصرف الصحي ويبون جلسة خاصة.. نخلص يطلع لنا جم نائب ويتهم قنوات كويتية بالعمالة والاعتداء على الرموز! يخرب بيت بعض النواب يحسسونك انهم مكشوف لهم الغطا وعارفين كل شي.. واهما ثور الله ببرسيمه ما يدرون وين حاطهم.. مشكلتنا بتصريحات النواب وجلساتهم الطارئة والخاصة.. كل واحد فيهم بيصير علينا عنتر.. والحكومة ما تنلام فيهم.. وكل الوزرا وعلى راسهم بو صباح شادين الحيل وقاعدين يشتغلون بس يا خلاف انهكوهم النواب بتصريحاتهم الداثرة.. نوابنا يغرقون بشبر ماي والدليل صاحبهم اللي غرق بالمكسيك.. يا ليته طلب جلسة خاصة علشان نعرف اهو اللي ساق الجت سكي والا منهو؟!