بشت الفحم

10/08/2009
في مثل شعبي عندنا يقول «فلان مثل خيشة الفحم لا طاح عليك دمرك ولي طحت عليه دمرك» بس مع الأيام تغير مفهوم هالمثل وصار بشت الفحم مو خيشة الفحم...والسبب ان بعض نواب المجلس وبعض وزراء الحكومة من يلبس واحد منهم البشت تهف نفسه على الاستفادة ..ويحلبون الديره حلاب..تلاقيه العضو بالمجلس اذا تحجى عن المال العام يخليك تبجي وتطق صدر ويمكن تفج ييبك وتلطم على راسك من كلامه وطريقة سرده..شوي والا نفس العضو ماخذ رشوة من تاجر منتهي علشان يضغط عالوزير يمشي مناقصة...


يطلع لك وزير من كثر الشرف والامانة والبراءة اللي على ملامح ويهه.. يخليك تركع ويمكن تسجد له ..وتصريحاته كلها عن حماية الاموال العامة..فجأة والا الوزير نفسه مشارك راعي مكينة التصوير اللي بالوزارة ويحلب النملة...كل هذا يهون لما يطلع لك وكيل ويقول ان الوزارة ستشتري الفين طاولة وكرسي بمواصفات عالمية..يخرب بيت بيتك يعني بالله الطاولة والكرسي اللي بتشتريهم يتحجون انجليزي؟ والا يتصفطون مثلا؟ والا يمكن الكرسي يلحقك اول ما تدش مكتبك ويبوسك؟ وآخرتها يشتري من منطقة الضجيج الفين كرسي الف منهم تالف والفين طاولة بدون ريول... والله يبا الواحد ضاع بهالديرة ما يدري منو اشرف من منو بالجذب...وآنا عن نفسي كنت اعتقد ان بوعبدالعزيز أشرف من الشرف وذمته ذهب خالص..لكن الواقع كشف لي ان بو عبدالعزيز فلم هندي صار له ثلاثين سنة ينعرض علينا...ويمكن سالفة الفحم المكلسن تخلي الواحد يفتر راسه بدون ما يشرب زموتة..ويطير عقله بدون ما يكن زقارة مصرية...الحين عرفت ليش مثل خيشة الفحم صار بشت الفحم..لأن بو عبدالعزيز كثر ما قال عن الدستور والمال العام وكثر ما كانت فايدته عالية من المال العام والدستور...بس ترى بو عبدالعزيز ماله شغل..ولده العود حب يجرب حظه بأمية وخمستعش مليون وانصاد..مثل ما تدرون بو عبدالعزيز لاهي ببشته ما عنده وقت يرتب السالفة..وأكبر دليل انه قدم ستة اسئلة شكلت في ردودها دراسة جدوى لمشروع البشت المكلسن قصدي بشت الفحم..صج شريف

كلمة راس
شيوخة بنتي سألتني بكل براءة..يبا منو بوعبدالعزيز هذا؟ فكان جوابي لها كالتالي: زار صدام فصار غزو..راح قطر صار انقلاب..سوى تكتل فيه عضو مجلس وطني..حط خشمه بالرياضة وقفوا النشاط ..وآخر شي تفرغ حق الكويت فانحاشت التنمية..شيوخة نامت من القهر على مستقبلها..