النداء الأخير

1/9/2009
إلى قيادتنا السياسية الرشيدة حفظها الله.. إلى سعادة رئيس مجلس الأمة حفظه الله.. إلى الحكومة كلها حفظها الله.. إلى مجلس الأمة حفظ الله بعضهم.. إلى كافة الشرفاء من المواطنين والمقيمين على هذه الأرض الكريمة الطيبة حفظكم الله وحفظها.. النداء الأخير.. اللهم إني بلغت اللهم فاشهد..
نيابة عن كل المسافرين على متن مؤسسة الخطوط الجوية الكويتية وأصالة عن نفسي أعلن أن المؤسسة تعاني من كل شيء وفي كل شيء وأنه ورغم لطف الرحمن ودعاء أهل الكويت يؤسفني إبلاغكم بأن الخطر قادم ولا مناص منه.. فلا تستغربوا إن سمعتم عن كارثة جوية يروح فيها ثلاثمئة كويتي ومقيم بسبب تبجح النواب ومغالاة الوزير وعناد المواطنين.. تخيلوا معاي شلون بيكون الموقف؟ أم تنتظر ولدها راجع من الدراسة.. أبو ناطر بنته اللي رادة من شهر العسل؟ عيوز قلبها يتلهف على ولد بنتها اللي راجع من العلاج؟ أخو ينتظر بحنين رجعة أخته من الغربة؟ وافد واقف عند الحاجز يستقبل زوجته وعياله؟ كل هذولا شنو ذنبهم اذا قالوا لهم الطيارة طاحت؟ اللهم لا اعتراض على قضائك ولا أنا قاعد أتمنى الشر.. لكن القاعدة الفقهية تقول: «ولا تلقوا بأنفسكم في التهلكة» وتقول تالي «قدر الله وما شاء فعل».. والدين والأخلاق يحثوننا على تجنب كل كارثة نستشعرها.. تكفه يا قيادتنا طلبتك وانا بوشيخة ولد الكويت انك تحطين حد طال عمركم وتطمني قلوبنا على أحبابنا وعيالنا.. تكفه يا قيادتنا خلصيها.. وإلى مسلم البراك وأحمد السعدون أقول خلوا عندكم شوية اهتمام بأرواحنا كثر حرصكم على المال العام الله لايرده اذا بنخسر عيالنا.. وتحديدا للرئيس جاسم الخرافي.. والدكم رحمه الله وطيب ثراه أسس الكويتية بالخمسينات.. وننتظر منكم موقفا قبل لا يطيح الفاس بالراس.. اللهم بلغت اللهم فاشهد. • كلمة راس اللي عنده شك واحد بالإميه بكلامي عن الكويتية.. يقص تذكرة ويجرب علشان يشوف بعينه.. واللي ما عنده يسافر خل يدق على أحد يشتغل بالكويتية ويسمع العجب العجاب.. صج فرسان عيال الكويت يطيرون طيارات بجهودهم وعطائهم.. الله يستر.
إقرأ المزيد...

شبر ماي

31/8/2009
الوضع في الديرة هاليومين صاير غريب عجيب.. كل مشكلة صغيرة بتصريحات النواب تصير كارثة! جلسة خاصة ومشاخط وملاسن وتحلطم وكأن الكويت فيها مشردين وآخرتها 50 موظفا تسرحوا من شغلهم بسبب الأزمة المالية العالمية والحكومة ساعدتهم وخلصت مشكلتهم..
الكهربا صار لها ست سنوات تطفي وتشب والحين ليش الوزير الشاب بدر الشريعان استلم الوزارة ومتخصص قاموا النواب وصاحو عليه ويبون جلسة خاصة.. والريال بتوقيع واحد راح يحل المشكلة مطلع ألفين وعشرة.. انفلونزا الخنازير وباء عالمي وهلال الساير شاد حيله وطبيب ومتمرس وحكيم وقاعد يشتغل ما خلووه اشتغلوا عليه شغل غريب من نوعه وطالبوه بالاستقالة.. وهذا هلال حط ايده على الجرح وقاعد يجتهد في محاصرة المرض بإمكانياته وخبرته ومعاه فريق مو مقصرين.. لكن النواب صاروا مثل اللي توها بالغة كل ساعة والثانية يبون جلسة خاصة.. مشرف وما أدراك ما مجاري مشرف.. وبرضو النواب شالو شليلهم وصرحوا وصاروا خبراء بالمجاري والصرف الصحي ويبون جلسة خاصة.. نخلص يطلع لنا جم نائب ويتهم قنوات كويتية بالعمالة والاعتداء على الرموز! يخرب بيت بعض النواب يحسسونك انهم مكشوف لهم الغطا وعارفين كل شي.. واهما ثور الله ببرسيمه ما يدرون وين حاطهم.. مشكلتنا بتصريحات النواب وجلساتهم الطارئة والخاصة.. كل واحد فيهم بيصير علينا عنتر.. والحكومة ما تنلام فيهم.. وكل الوزرا وعلى راسهم بو صباح شادين الحيل وقاعدين يشتغلون بس يا خلاف انهكوهم النواب بتصريحاتهم الداثرة.. نوابنا يغرقون بشبر ماي والدليل صاحبهم اللي غرق بالمكسيك.. يا ليته طلب جلسة خاصة علشان نعرف اهو اللي ساق الجت سكي والا منهو؟!
إقرأ المزيد...

مرعوب الكتروني

27/08/2009
قبل جم يوم طلعت البوم الذكريات من الكبت وقعدت اطالع واتطمش على صور قديمه..وبالصدفه شفت صورة واحد كااااااان من ربعنا واحنا صغار..طويل القامه عريض المنكبين على قولة سند بمسرحية على هامان يافرعون.. كان مسحوت بالصوره وطويل وملامحه غريبه..الصوره كانت حق الاخ الصديق السابق ايام النضال تحت لواء المنبر الديموقراطي..
ايام..المهم قلت حق روحي وين كان صاحبنا ذيج الايام ووين صار.. اليوم الحبيب نفسه زايد الجيله بزيادة وصار له وضع وشنه ورنه بين العالم؟؟؟شلون؟؟انا اقول لكم اللي اكتشفته..دقيت على واحد من ربع ذيج الفتره اسمه الحركي..بو لؤي..ترون المنبر حركات مو اي شي..المراد ماني مطول عليكم..دقيت له وقال لي قصة اللي زايد علينا زود هاليوم..يقول صاحبي بو لؤي..انه المنبر طردوه شر طرده بعد ما اكتشفوا انه بلاع بيزه وينوقل حجي..يعني الحبيب مثل مرعوب بمسلسل الاقدار..عاد اللي زايد علينا زود هاليومين..انتقل كالعاده للضفه الثانيه وطراره على شوية تزهلق..ولقاءات بالقنوات وجذبه بيضه على خزعبلات ..لا والله الحبيب صار من اهل الانترنت وسوى له جريده وموقع ومنتدى..الغريب في الامر انه اهو اللي يكتب المقال واهو اللي يعلق واهو نفسه اللي يرد على التعليقات..لي هني والموضوع عادي..هذا اللوح اللي خده تورد وقام يلبس نظارات من سويسرا وساعات من الطرف الاغر ودشاديش من اجواخ بوالحسن..والله يرحم ايام الباتا..قام يلبس جواتي ماركة بيتشوتي ولوي فيتو.. سألت بولؤي هالمنتف الحافي من وين له كل هذا؟؟ فقال لي بولؤي يا بوشيخه ناس تبيع طماط ناس تبيع رقي وناس تبيع ذهب..وهذا باع ذمته..
كلمة راسلأن الدنيا برمضان كلها فضائيات ومسلسلات حصريه..قررت اني اسوي لي مدونه وانشر فيها افلام بوعمر وشلة حي الطرب بسوم المطرب واحمدوه بوقلمين..حصريا ..واللي يبي يزورها ويشوف ..وتعليقات ماكو..الخوف ان مرعوب يدش يعلق لانه صاير يوسف سيف بالنت.. هذا عنوان المدونة.
إقرأ المزيد...

عندي أمنية

26/08/2009
انا عندي امنية بسيطة، صغيرة مو كبيرة، ان رئيس الوزراء والحكومة يأخذون اجازة لمدة اسبوع فقط، ويسلمون الحكومة برئاستها ومجلسها لثلاثة نواب، واحد منهم معجزة، ويحطون أحد الكتاب وزيرا للاعلام، والمنظّر العام، ونشوف شنو يسوون، وشلون يتعاملون مع الاوضاع، وشنو خطتهم!
انا اقص ايدي وريولي واقص شعري بالمرة، اذا قدروا يطلعون لنا بخطة وحدة او بمشروع واحد عليه القيمة يساعد في تنمية البلاد، او حتى يقترحون قوانين لها اهمية، أو يقدمون خطط مستقبلية للاجيال القادمة، او يحلون مشاكل الصحة والتعليم، ما يخالف اتواضع، على الاقل يقولون لنا شنو خطتهم شنو بيسوون وشلون؟ يعني فرضا قالوا لهم لا تأخذون كل الحكومة بس حلوا مشاكل الصحة، فقط لا غير، حطوا لنا خطة على الاقل حتى نحل مشاكلها بسرعة، انا ابصم انهم راح يفشلون، والمرضى بدل ما يتعالجون راح يمرضون، وبدل ارسالهم للعلاج في الخارج يدزونهم للصليبخات، تدرون ليش يفشلون ويسقطون بالامتحان؟ لانه اولا طول عمرهم يتكلمون، ويصرحون، ويسولفون، ويصرخون، وهذا سهل، تعال اشتغل، حط خطة، ماكو، لانه عمرهم ما فكروا، ولا قدموا، ولا يعرفون يسوون كل هالاشياء، يعني عمركم سمعتوا انهم قدموا شيء، ولا سووا شيء غير الصراخ والتصريح والتهديد؟ انا ما ابي اقول ان حكومتنا مسكتة وشاقة الارض، بس عاد نوابنا هم دايخين، ووقت الصجية ماكو شي، حتى لو يقترحون استلام حقيبة وزارية ما يستلمونها، تدرون ليش لانهم يدرون بالوضع، ولانهم يعرفون امكانياتهم، وانهم وقت الصجية ينكشفون، وكل واحد يعض دشداشته وقبة من المسؤولية في هالديرة ماكو احسن من القعدة والنقد والكلام والصراخ!
إقرأ المزيد...

ابن خامس لمايكل جاكسون

25/08/2009

في الكويت، طلع عندنا ابن خامس لمايكل جاكسون، مو غشمرة صج، ويقولون انه مرشح وإعلامي متبتب ومربرب، طيب شلون؟ انا اقولكم، لان فيه صفات مشابهة لمايكل جاكسون يعني نفس الجينات الوراثية، تقول طبجتين!
الإعلامي، والمرشح الفاشل، لونه يتغير، مثل مايكل، من اسود صار ابيض، هذا نفس الشي بس صار من اسود الى لون «كحلي مزنجر» حاول يسوي عمليات تبييض، ماصار، لانه قلبه اسود! مرة مايكل جاكسون فكر لازم يسوي ضربة إعلامية، والاعلام يسولف، جان يطلع سالفة ان شعره احترق وقت التصوير، والوكالات نشرت الخبر، والناس تسولف، وتعاطفت معاه، اي شي ولا شعر مايكل جاكسون، وطبعا صاحبنا لانه مصلع، وكاشف راسه، وغاسل وجهه بشي لونه اصفر، فبرك سالفة حرق سيارات وانه اعتداء عليه، وتهديد، وفيلم هندي! طيب بعد شنو، انا اقولكم مايكل جاكسون كل يوم عملية تجميل، وخشمه بروحه الف عملية، وصاحبنا اللي راز خشمه بكل مكان، ويبوس في هالخشوم، كل يوم عملية تجميل، مرة مطول خشمه، مرة قاصه، مرة تافخ خدوده، عاد عليه خدود تقول سميرة توفيق بزمانها، ما يخالف انا قديم، وذوقي قديم شوي! سامعين عن رقصة القمر مالت مايكل جاكسون هذا الاخ الإعلامي والمرشح العبقري المحلل، عنده رقصة سماها رقصة «بوقمر»، هذي الرقصة، الاخ يرقص خطوة جدام، خطوتين ورا، حسبالك رايح جدام بس هو ماشي ورا، ويرقص بكل الطرق المهم الناس تصفق، ويلم «النقطة»! هذا كل شغل ولد مايكل جاكسون الخامس، اللي وده يصير نائب، يموت ويصير نائب، بس حامض على بوزه، مكشوف والناس عارفته، وفيه ذيل عمره ما يتعدل! إقرأ المزيد...

طرار وفتيني

24/08/2009

بوعمر لافض فوه وعاش حاسدوه..ما خلانا نكمل قصصنا الرمضانيه عن مؤؤساتنا الكويتيه حسب ما وعدنا القراء الاحبه..بسبب مقالاته المنتهيه.. يا بو عمر للمره الالف اقولها لك اركد كافي كوكسة كافي تشقلب..وبعدين بسك تناقض.. قبل جم يوم تقول وتستشهد بملاحظات صاحب السمو..واليوم تخالفها وتثير الفتنه بين الكويتين..
قاعد تشب النار بين ابناء الاسره الحاكمه وتحديدا بين الشيوخ ناصر المحمد وجابر المبارك وناصر الصباح؟!! شنهي مصلحتك من دازك؟؟ وتعديت الحد وصرت توجه الكويت وسياستها الخارجية؟؟ انت شكو بإيران والسعودية؟؟ لا لك اصول في هالدولتين ولا لك امتداد فيهم موليه؟؟ اللهم البحرين وصاحبك اللي هناك بوشعر طويل..!!...الظاهر انك فلست كتابيا وماديا..والاكيد ان حسابك انكشف بعد ما شاركت بوفهد المحظوظ بالعكس..يا اخي عيب اللي قاعد تسويه..حتى اقرب الناس لك تأذى... شتبي يعني؟؟ تبي يدششونك السجن علشان تصير مانديلا الكويت ..حامض على بوزك..تبي بيزات من الدولتين اللي ذكرتهم؟؟ مش بوزك لأن هناك ما عندهم رغبه في الاستماع لك.. كافي طراره وتلون..اما قصتك اللي بمقالتك قبل الاخيره عن جلوسك مع وزير الاعلام الاسبق بوالحسن..فخلك واضح انت قعدت وياه بصفتك رئيس تحرير جريدة الشيخ علي الخليفة..ولا تسوي روحك مهم ترى حتى راجو صبيّ بيت يرانكم يعرفك وعنده خبر عن نومة الخيمة.. اركد وخل النفس عليك طيبة برمضان ولا تضطرني ابلش سوالف الاعلانات وبيزاتها اللي خلتك تكتب اليوم.. واذا ايدك تحكك وقلمك فيه حبر اكتب مذكراتك كمحامي ما كسب ولا قضية..
كلمة راس
الدار-الحريه-الصباح-اوان..رؤساء تحريرها تشرفوا بلقاء الشيخ العود وسمعوا توجيهاته واذا كانت مواقفهم بنظرك يا بوعمر غير معناها انك تعاند سمو الامير وهذا امر خطير..اما هذي الصحف فلها ميزانيات وتراخيص وقانون ينظمها..لكن انت يا راس الحيه يا طرار الفتنه من اللي حايفك وينظمك. إقرأ المزيد...

انتخبنا ملاقيف؟

24/08/2009
أنا تعبت، وادري هم أنتو تعبتوا، من النواب، من منو بعد؟ كل واحد منهم قاعد في قارة، كل واحد منهم مختار ديرته اللي يقزر الصيف فيها، واحنا قاعدين في الديرة، ما يخالف نحب ديرتنا، بس المشكلة ان كل واحد من النواب شايل معاه فاكسه وموبايله، وأخذ تصريحات بايخة! سمعوا عن تغيير المناهج كلهم يصرحون، طيب ما تعرفون شنو الموضوع؟ ولا شنو قالت الوزيرة؟
مو مهم، المهم نصرح، قبل لا غيرنا يصرح، والاخ يصرح ويعفس الديرة وهو نايم بالبراد تحت سفح الجبل في لبنان (حلوة تحت سفح الجبل)! نخلص من المناهج، يسمعون ان وزير الأشغال قال شي عن القوانين الرياضية، طبعا يجهزون روحهم، وبدل ما الصحافيين يسألونهم هم يتصلون على الصحافيين، وتكفه أنشروا تصريحي، واخذ تصريح، شنو الموضوع مع منو، ضد منو، مو مهم لازم نصرح بسرعة قبل النوم! خلصنا رياضة، ياشباب سمعنا عن موضوع النفط، ويقولون في شبهة، ويقولون في غلط، طبعا مو مهم، ولا المهم شنو الموضوع، وشنو المشكلة، لازم نتكلم عن المال العام، اخذ سب في اللي نعرفه واللي ما نعرفه، وفلوسنا وما نفرط فيها، طبعا الاخ نايم عالبحر، ويبلبط برجليه، ويرسل مسج للصحف، انا معترض، وسأستجوب الوزير، وادوس ببطن النفط والمتنفذين، طبعا الاخ ولا يعرف منو المتنفذين ولايعرف شنو المخالفة، ولا منو سيستجوب، المهم ان يصرح قبل الآخرين، حتى لا يعايرونه ربعه! يومين وراح تخلص قصة النفط، وانا متأكد من هذا، طبعا بعد اسبوع سيصرحون عن الكهرباء، وبعدها عن الاوقاف، وبعدها الاعلام.. هم قاعدين بالبراد واحنا بالغبار، يعني بالمختصر بدل ما ننتخب نواب يشرعون ويراقبون انتخبنا ملاقيف، رافعين شعار «كل من طق طبله قال أنا قبله»؟
إقرأ المزيد...

غرفة مو ملحق

23/08/2009
مبارك عليكم الشهر وعساكم تعودونه يا رب يا أهل الكويت الطيبين.. ولأن الجو برمضان يصير خوش جو.. الواحد وده يكون زين مع نفسه والكل.. ومن هذا الباب راح اخصص مقالاتي في شهر الخير عن مؤسسات المجتمع المدني.. انتقدها بأسلوب بوشيخة المعتاد..
مانبي دندرة ولوية ولا نبي ندش في خصومة مع احد.. الكويت اهم من الكل وفوق الجميع.. سالفتي اليوم لكم عن غرفة التيار على قولة بعضهم.. كان الهدف من وجودها تنظيم الشغل وترتيب وضع التجار ومعاملاتهم وتجارتهم وتعاملاتهم داخل وخارج الكويت.. والاخوان في الغرفة من تأسست ما قصروا وكفوا ووفوا.. لكن الغرفة في الفترة الاخيرة صارت بربس.. كل مشروع تجاري ينطرح من قبل الحكومة تعارضه الغرفة.. وكل مشروع يقدمونه النواب الغرفة ترفضه.. واذا صارت مشكلة في القطاع الخاص عمك أصمخ يا أهل الغرفة.. واذا السوق طاح والبورصة تخبطت بالإدارة الغرفة تصد عنها؟ شهالغرفة اللي مو قادرة تفتح بابها وتواجه مشاكل التجار؟ وأنا كمواطن مالي شغل في الغرفة أسمع من بعض التجار ان الغرفة مجرد وسيط لتوزيع الوكالات مو أكثر.. ولا هامهم اللي قاعد يصير بالديرة.. وأعضاء مجلس الإدارة من الرئيس وانت نازل ما نشوفهم إلا بالمناسبات.. جنهم قلاصات العصير اللي تطلعهم أم شيوخة إذا عزمت رفيجاتاها؟!.. بعضهم مجتهد ووده يسوي بس يا خلاف الإيد الواحدة ما تطق اصبع.. عاد الغرفة خوش مبنى مبناها لو الحكومة تستغله وتسويه مووول يستفيدون منه المواطنين.. ودار مداره تسوي محلات المهارة.. اللي يبيعون درزن الصراويل الطويلة بأربعة دنانير.. او انهم يعطونه حق وزارة الداخلية.. مكاتب ومبنى وفلوس واعلانات تعزية وافراح ووفود على غرفة التيار.. اشوه انها قسيمة التجار جان شيفكنا.. أهما غرفة ومحد صايدهم.. وخلصت وملصت يات الدياية وعنفصت وباجر لنا سالفة يديدة؟. ملاحظة (نهي كلمة راس في رمضان)
إقرأ المزيد...

يا شين السرج على البقر

21/08/2009
حلمت ان مازن الانصاري دق علي وقال لي يا بوشيخه قيادات وزارة الاعلام طالبن يقعدون وياك..دقيت اللكزس الحمرا سلف..واتجهت للوزارة على انغام اغنية توا النهار توا وعند الباب محد وقفني من الحرس لانهم يدرون بزيارتي..دشيت الوزاره وابتدت الجوله بصحبة موظف العلاقات العامه..رحت مكتب الوزير وما لقيته لانه متفرغ حق النفط..على طول رحت حق الوكيل والا متيمعين عنده القيادات وناطريني.. سلمت عليهم وسألتهم شتبون مني داعيني الوزاره؟؟قالوا لي
افكارك محتاجينها ونبيك تنتقدنا بينك وبينا يا بوشيخه..وبعد ما شربت استكانة الجاي توهت بحديثي لهم وقلت لهم بالحلم طبعا..الوكيل والوكلا المساعدين ماني ياي صوبكم لان المدرا اهما الاساس في كل عمل..وبديت بعلي الريس وقبل لا اوجه كلامي له كح وطاح غشيان فطلبوا له اسعاف..ما ينلام الريال تعبان من السفرات والمهمات الرسميه..على طول فريت رقبتي جني نسر..وشفت بندي المطيري شايل شليليه بيطلع..هم ما ينلام الريال شاعر واحساسه مصري بالاعمال وما يتحمل النقد وعذرته..قلت ماكو غير المسري الشمعه اللمعه سراي ليلة اليمعه..ناقشته وافحمني بردوده وخبرته وحسيت اني قاعد احاجي وكيل التلفزيون..التفت صوب فهد صياح ولقيته رزه ومتمكن من ردوده وذكرني بعادل الصبيح ايام استجوابه..ويوم خلصت كلامي معاهم دش علينا مدير توه واصل سألته من حضرتك قال آنا مدير بالوزاره ومتخصص بالتصنيفات..قلت له ليش متأخر قال لي راحت علي نومه..نومه وراحت عليك؟؟ طبعا عيونه متفخه ودشداشته مو مضروبه اووتي وشواربه ستايل هتلر..سألته عن شغله ما فهم سألته عن خطط الوزاره ما فهم ..سألته عن نوال الزغبي ابتسم وقال مو ممنوعه؟؟ سألته عن كل شي بكل شي والاخ طلع مقلب...اسمه يدل على انه فارس وشكله يقولانه شاوي.. ورفت بعد الاجتماع انه الاخ ماغيره شرطي حفلات اللي يهز جتفه او اللي تهز خصرها يحاسبهم مو اكثر..واللي كدرني اكثر انه الاخ نفسه هاليومين صاير شرطي صحافه وعنه حصانه ويقدر يحاسب النواب..صحيت من النوم ودقيت الفورد سلف ورحت الجريدهولقيت ان الحلم واقع مؤلم..وحده من الثنتين يا ان الوكيل فيصل الخليفه المالك يدري عنه ويمش فيه الزفر؟؟ او انه ما يدري ان الوزاره فيها واحد مثل هتلر ما غيره..
كلمة راس1
الكاتب بوقلمين حفيد الاسكندر الزفر اللي لاصق روحه بعائله محترمه عن طريق تشابه الاسماء بعد قصة بلوتوث تركيا..تحول الى طرار قانوني..ولانه من سكان المرقاب..رميله سابقا..اقوله يا بو قلمين.. الدي ان ايه ملاذك الاخير.
كلمة راس2
بسوم بولحيه المطرب السابق يستشهد بمقالاته بكتب تشير الى روايات تعضد آراء احد المذاهب وبنفس الوقت يشير الى ركاكة هذي الكتب بالنسبه له..يا بسوم يا دكتور الرقيه الشرعيه..خلك على كتاب ابو فرج الاصفهاني للأغاني وعيش حياتك بالسرداب اللي خبرك.
كلمة راس3
بو عمر بد ما فلّس وانكشف صار ينشر نفس المقال بزاويته الخضرا وميزانه الداثر وببعض المنتديات ..وطبعا الناقص الالكتروني بزياده يضبط له الانتشار في الشبكه..بو عمر بشرفك بشرفك بشرفك..بينك وبين نفسك لما تجابل المنظره شتسوي؟؟ تبصق والا تلحس البصقه؟؟
إقرأ المزيد...

قريش سياسي

20/08/2009
اعضاء مجلس الامه الود ودهم ما يطلعون اجازة موليه..مو لانهم حريصين على الديره ومصالح الامه المخدوعه فيهم..ولا علشان يجابلون شغلهم بذمه وضمير..كل اللي يهمهم في الموضوع فرد عضلاتهم الهالميه...ومناكفة حكومة الشيخ ناصر...بعضهم مو كلهم طبعا..ومجلس الامه تحول الى جمعية نفع خاص..وصار حلبة مصارعه اسبانيه..وموضوع المسرحين كان وراح يكون مجرد عذر اقبح من ذنب..

بعض النواب عندهم عقدة الصراخ بمناسبه وبدون مناسبه...وبعضهم يعاني من الوحده..وبعضهم عدا السبعين وتفكيره طلع تقاعد..وبعضهم يموت وبشته على ظهره..وبعضهم مثل الحريم يبي يحش فيموت على جلسات المجلس..وهالسنه طلعولنا بقضية المسرحين اللي حلها مجلس الوزرا وخلص..لكن لانهم مجلس امه دايخه..حبوا يعقدون جلسة خاصه تكون بمثابة "قريش" سياسي يستقبلون فيه شهر رمضان..وابشركم قرائي الاعزاء..شهر الرحمه راح يكون شهر الزحمه السياسيه..لأن النواب ما يهيعون ولا يركدون ابد..والدليل انه جريمة العيون باليهرا سووها حصان وركبوه عسا يركبهم ابليس..ولأن الشياطين مربطه برمضان..نوابنا راح يحلون محلهم سياسيا..وراح يلوعون جبود جبودنا وينطون لنا كل يوم بسالفه عميه من سوالفهم...والحين اعتقد الجيل السياسي الحالي من النواب المفهيين سبق كل كل المجالس السابقه بموضوع "القريش" وهذا انجاز يحسب للنواب..
كلمة راس1
الكاتب بوقلمين حفيد الاسكندر الزفر اللي لاصق روحه بعائله محترمه عن طريق تشابه الاسماء بعد قصة بلوتوث تركيا..تحول الى طرار قانوني..ولانه من سكان المرقاب..رميله سابقا..اقوله يا بو قلمين.. الدي ان ايه ملاذك الاخير.
كلمة راس2
بسوم بولحيه المطرب السابق يستشهد بمقالاته بكتب تشير الى روايات تعضد آراء احد المذاهب وبنفس الوقت يشير الى ركاكة هذي الكتب بالنسبه له..يا بسوم يا دكتور الرقيه الشرعيه..خلك على كتاب ابو فرج الاصفهاني للأغاني وعيش حياتك بالسرداب اللي خبرك.
كلمة راس3
بو عمر بد ما فلّس وانكشف صار ينشر نفس المقال بزاويته الخضرا وميزانه الداثر وببعض المنتديات ..وطبعا الناقص الالكتروني بزياده يضبط له الانتشار في الشبكه..بو عمر بشرفك بشرفك بشرفك..بينك وبين نفسك لما تجابل المنظره شتسوي؟؟ تبصق والا تلحس البصقه؟؟
إقرأ المزيد...

شهداؤنا والقلوب السوداء

19/08/2009
انا لله وانا اليه راجعون.. ان العيون لتدمع، والقلوب لتحزن على هذه المصيبة التي ألمت ليس على الجهراء فقط، بل على الكويت كلها، ولا يمكن مهما كتبت أن أعبر عن شعوري بالحزن، فمن يده بالماء مو مثل اللي ايده بالنار! وبقدر ما شعرت بالحزن والأسى على النساء والاطفال، وحزن

الناس، حزنت من بعض نوابنا وعليهم! ياجماعة في الاحزان نترك الدموع تجري، ونترحم على الشهداء، الا بعض نوابنا، وبعض المتصيدين بالماء العكر، كانوا مثل الوحوش اللي تبي تنهش بالجيف، تريد استغلال الحادث حتى تبرز، وكأن القضية حادث مرور، ولا ينبغي ان نصمت و«نسكر حلوجهم» ولو يوم على الاقل! مثل هالحوادث، تصيب الجميع سواء في الكويت او خارجها، نتيجة اهمال، او فعل فاعل، او قضاء وقدر.. فليش هذا النهش بلحم الاحياء، وليش المتاجرة باحزان الناس الطيبين، وليش بعض النواب يبكون بدموع التماسيح، ويخشون ابتساماتهم الصفراء، وكأنهم وجدوا مصيبة يلطمون فيها ويضربون الحكومة! ان تكون عندهم خصومة ما في مشكلة، يااخوان خاصموا جادلوا، تناقشوا، وحاربوا.. ولكن هناك فرقا بين عدو شريف وعدو لئيم، بين من يخاصم ويقاتل باخلاق الرجال، وهناك اللي يفجر في الخصومة، ويستغل حزن الناس في حروبه القذرة! شيء محزن لهذا الشعب ان يستغله نواب من النوعية، اللي تبي حتى في احزاننا تستعرض عضلاتها من اجل شوية اصوات.. سود الله وجوهكم مثل قلوبكم! انا لله وانا اليه راجعون!

إقرأ المزيد...

حريق الغيرة

18/08/2009
من العجيب الغريب ان الغيرة النسائية ممكن تسوي اشياء كثيرة॥ تخلي الرجل يغض النظر عن أي خطوة يقدم عليها مستقبلا.. المرأة غريزيا ما يهمها شي ولا تفكر بعواقب افعالها ولا تفرق معاها الشغلة.. والرجل اذا حمى الوطيس واشتعلت غيرته وعمت عينه ممكن يكون وحش كاسر يهدم كل شي بلحظة غضب.. اجتماعيا ممكن نتقبل هذا الشي وممكن نبرره تحت أي ظرف.. لكن الغيرة السياسية

ما ممكن تبريرها موليه بأي شكل من الأشكال.. وعندنا في الكويت أشكال وأرناق من الغيرة السياسية.. وعندنا فنون سياسية بالغيرة.. والدليل ان النواب ركضوا ودقوا طبول الغيرة وتراقصوا بغضب غير مبرر بمأساة حريق الجهراء.. يعني غريب عجيب امر بعض النواب ردحوا ردح غير مفهوم في تصريحاتهم وحملوا الحكومة بالبداية مسؤولية تقاعس وعدم تجاوب وغيره من كلام ماله معنى.. وبعدها انفرد النواب بغضب أحمق وغيرة سلبية وشالوا الدنيا وحطوها وطالبوا وزير الصحة.. ووزير الداخلية بالقيام بمهامهم! عجيب امركم يا بعض النواب انتو شكو داشين عرض بالموضوع.. تبون تشبون النار بأي طريقه؟ وتبون تتكسبون على جثث العالم.. عيب ركدوا مو جذيه السياسة.. والا بتفهمونا انكم احرص من صاحب السمو وولي العهد اللي تألموا من أول لحظة؟ والا يعني انتو وايد متأثرين وبيدكم الامر؟ يبا احنا نثق بحكومتنا ووزرائها ولا نشك دقيقه بتفاعلهم الايجابي.. جم رجل اطفاء مات واهوا ينقذ بدون ردح.. جم رجل امن قدم حياته علشان حضراتكم تطنطنون والحين عقب ما اتهمتوا اطراف حكومية وادارات بالتقصير اتضح ان الحادث بفعل فاعل! ومع هذا نطقتوا بالشواذ وشلتوا على وزير الداخلية بأنه فضح أسماء المجرمين! أنا أقول اللي يهدد امن الكويت ارهابي وملعون ولازم ينجلد بالصفاة.. واللي يذبح له 40 مرة و 10 اطفال لازم اسمه ينتشر علشان يكون عبرة لغيره.. اما انتو يا بعض نواب الامة الدايخة.. فترسوا حلوجكم هوى.. وفكونا من لبحتكم.. ولا ترقصون مثل فيفي عبدو على جثث العالم। • كلمة راس وكالات عالمية ودول غير مسلمة تابعت مأساة العيون في محافظة الجهراء بمهنية وانسانية بينما بعض النواب لحيته ترس ويهه حاول يتكسب سياسيا باسم الدين.. طيح الله حظك يا زمن خليت عوير وزوير بصدر المجلس.

إقرأ المزيد...

بو عمر صاد نفسه

17/08/09
بو عمر.. صاد نفسه «بالليوان» كالعادة.. تعالوا معاي وشوفوا واقروا التناقض.. يقول بو عمر اللي عمره ما خاف على الكويت ان الطائفية ستفتك بالمجتمع.. والله جان زين يرشونك «بف باف» ويفتكون فيك.. وقبل جم سنة بس كان يقول ان القيادة الاسلامية للمذهب السني في الكويت كتيار سياسي لم تعد تملك المصداقية؟ وشهد لك ذيج الحزة سعود السمكة اذا كنت ناسي اذكرك.. هلا والله على قولة عبد بو عمر.. وعلى قولة اهل البصرة، ولك انت شبيك تسودنت آراءك! ومثل ما يقول المثل الكويتي «عماكور طاح بالتنور»..

بو عمر ما تعتقد ان رداءتك بمهنة المحاماة خلت أحد الاعضاء من اللي يصيرلك ما يوكلك بقضية رغم كثرة لجوئه للقضاء؟ بعدين يا بو عمر عطني مثالاً واحداً يدل على تمسكك بالثوابت الوطنية اللي داش فيها كلك هاليومين وتعيبها علينا؟ هل استمراؤك لمهاجمة ابناء الاسرة من الثوابت الوطنية؟ هل هجومك القبيح على سمو رئيس مجلس الوزراء بشكل شخصي وانت اللي تعرف دماثة خلقه من الثوابت الوطنية يا بو عمر؟ تبيني ازيدك شوق وشغف والا كافي؟ تبيني اذكرك بالبراغي اللي فججتها ولكيتها ايام جريدة الوطن؟ تبيني اذكرك بالحسرة اللي تركتها ايام محمد الخالد؟ هل هذي ثوابتك الوطنية؟ عيب بعد هالعمر تكون راس الفتنة وتحث الناس على استعداء الاسره وابنائها.. ترى حتى الميدة اللي بالجون تعرف مصادر دخلك وسبب كتاباتك اللي رح نكشفها لك.. وتهديدك بالرد يتماشى تماما مع قناعتك الشخصية في مواجهة نفسك.. وشوف علم يوصلك ويتعداك.. وخذها كاش.. واسمع الحجي اللي يشق القحفية ويجمد على الشارب.. آل الجناعات كلهم بدون استثناء من صغير وكبير من مرة وريال يعرفون قدرهم عند اهل الديرة.. فلا تحاول تفتخر بشي انت ما تملكه واعتقد يا بو عمر افراح واتراح اقرب الناس لك اللي تتخلف عن حضورها دليل على انتفاء صفة القربى اللي ياي تتذرع فيها.. واذا كنت منبوذا وتبي تعدل هالشي فأنا على استعداد اني اصلح ذات البين بينك وبين عائلتك الكريمة.. اما طنازتك على ناصر المحمد بأنه خريج السربون فحدك.. بو صباح خريج اسرة كريمة تفتخر فيه عكسك.. اما انت فخريج حقوق غير موفق وبتقدير انا وانت نعرفه عدل.. لي هني وكافي ترى التهديد يبي «فعل»، والفعل يحتاج شجاعة، واعتقد يا بو عمر كلامي واضح..

إقرأ المزيد...

من هنا وهناك

13/08/09
• المطرب بو لحية بعد ما قط العود من إيده وربى لحيته وصار دكتور بالرقية الشرعية ما قدر يتخلص من أذنه الموسيقية॥ واتجه للكتابة بقلمه النشاز مثل صوته الدايخ॥ انا مستغرب منه ليش يهاجم ايران واهي مسقط راسه؟ ومستغرب اكثر من هجومه على السيد المهري ويده كان من الجماعة!
• نجم حي الطرب مع انه ما عنده خصر لكنه يهز هز مو طبيعي بفكره وقلمه.. ومستعد يقدم وصلة الردح مالته حق اللي يدفع اكثر.. ويموت بالهز حق الشيوخ مع انهم مو مقتنعين فيه.. المتهرطق.. المكرّش.. المحامي الفاشل.. ضم حق فرقته مهرج كل يوم بمسرح.. وناقص الكتروني مطرود.. خوش فرقة.. يطقون الكواولة عشرة صفر!

• بوقلمين اياه اللي قاعد يموت كل يوم عشرين مرة بسبب انتشار بلوتوث تركيا.. عنده حول في الكتابة.. يقرا شهر يوليو ويونيو.. مو منه من القلم الثاني خلاه يتدوده.. كاتب مغدور واهوا طالب.. وخفيف واهوا جامعي.. ماراح يكون غير جذيه.. وفوق كل هذا وده يصير نجم تلفزيوني بس مشكلته بمخارج الحروف.. والفر كاسيه من راسه لي ريوله العويه!
• نائب السياكل والجت سكي.. يصرح وايد بكلام ما يفهمه.. وخصوصا في قصة تصويت المرأة.. ميت من علي الراشد.. ومندق من مرزوق الغانم.. ومحتر من صالح الملا.. لانهم اصغر منه بس افهم واذكى واحلا منه.. نصيحتي لك يا بو السياكل.. تروح ام المرادم مثل اول وتغاوص و تروح كبّر وتربط من ورا..

• كلمة راس
لكل قارئ او مهتم بزاوية بوشيخة.. دز لي رسالة او ايميل او تعليق.. كل الشكر للي نصحني ووجهني ومدحني وانتقدني.. ولكل واحد شتمني او حاول يستفزني اقول له حاول ترتقي بطرحك.. واذا مقالنا عجبك نقعه بماي واشربه يمكن تصحصح وتقدر تقرا اللي بين السطور.

إقرأ المزيد...

سقط أيواد

12/08/09
الشعب الكويتي شعب يحب الأمثال الشعبية.. وعندنا موسوعات بالأمثال والمكتبة الكويتية متروسة كتب من هالنوع.. واليوم يايب لكم جزء من مثل.. يقولونه أهل الكويت عن اللي ينزغه الشيطان في بيت كريم وعايلة كريمة.. وهالجزء من المثل ينطبق على بو عمر مليونين ونص بالإمية.. شلون؟ تعالوا أقول لكم وابين لكم.. بو عمر انولد في بيت عريق وينتسب لعائلة كريمة منهم رجال الدين والسياسة الفطاحل.. ولهم بالولاء للحكم مواقف ما ينكرها الجاحد.. وعائلته الكبيرة فيها رجال ينحطون على اليمين ويتصدرون المجالس.. لهم مساهمات تاريخية في بناء الكويت.. وفي نساء بالعائلة الكريمة بالتفكير سبقوا وقتهم.. لكن بو عمر ابى الا ان يكون سقطا..

(كتبتها بالفصيح يا بوشيخة منت هين) ولأن بو عمر من هالعائلة الكريمة وحالها حال الكثير من العوايل فيها الزين والشين.. الا ان بو عمر استأثر بالشين كله واستحق بجدارة لقب سقط ايواد.. هذي قصة المثل أو جزء من المثل.. لها الحب منا هالعائله وابشرهم بأن الله ان شاء الله راح يغفر لهم ذنوبهم وخطاياهم الصغيره بكبائر بو عمر وهرطقاته.. اما بو عمر فعندي لكم سالفة عمية عنه.. كان يقول انه ما يتشرف يقرا مقالات بو فهد رفيق دربه بالحمّام.. وكان يجاهر بهالكلام.. واليوم التف عليه وصار اعز ربعه.. شلون؟ انا اقول لكم.. بو عمر شال هرطقاته اللي جمعها بكتاب مريض مثله وراح يبي ينشرها عن طريق دار بوفهد.. وبوفهد يا غافلين لكم الله صار له ثلاثين سنة ميود قرطاسه ويكش فيه الذبان فاضطر يقبل بو عمر وكتابه السقيم وصاروا دويتو مثل اللي غنوا «حركب الحنطور».. وبالفعل ركبوا بو فهد وبو عمر الحنطور بس من جدام.. المراد.. ماني مطولها عليكم.. شلون قدر بو عمر يقص على بوفهد ويشاركه بالشركة اليديدة؟ من وين ياب البيزات؟ هذا اللي راح ابينه لكم تالي..

• كلمة راس
المحامي الفاشل بو عمر.. لف ودار عشر سنوات على الكبار وشفط جيوبهم.. الغريب في الأمر انه ما قدر يلف ويدور داخل عائلته بتاتا.. ركزوا على بتاتا.. تدرون ليش؟ لأنها عائلة كريمة ترفض اللؤم بكل صوره.. بو عمر بطة سودة مكروهة يا سادة.

إقرأ المزيد...

ساقط بالاثنين

11/08/09
بعد ما حسّر في الشعب الكويتي وسعى بالفرقة والتشرذم..طلع الحبيب من الشبكة وكتب يتهم الشيعة بولائهم للنظام؟ صار الولاء تهمة..يا سلام..ما عرفنالك مرة تقول ان النظام يجب ان يحترم..ومرة تقول ان النظام يستحق الولاء والحين ياينا بنظريتك الفجة.. وفكرك المريض..وتقول ان الشيعة موالين للحكم؟ وتعيب عليهم التصاقهم بسمو الرئيس؟ شتبي عيل تبينا نواليك يا قزم..يا مريض؟ مو مشكلة انا باخذك على قد عقلك..وبحاول افهم نفاقك وتحديك السافر لمؤسسة الحكم..

وبفترض ان ولاء الشيعة لازم يكون لك..بس انت ما عندك مقومات الحكم..واحد مثلك ينام بالخيمة ومو قادر يقنع حرمة باحترامه شلون أواليه؟ واحد مثلك بيته من زجاج وما يقدر يتسبح لان عورته راح تنكشف شلون نعطيه ثقتنا؟ واحد مثلك مخباته مشقوقة من العطايا مقابل افكار هدامة كيف ننساق له؟ وواحد مثلك يا بو عمر يجذب الجذبة ويصدقها شلون نمشي وراه؟ يا اخي انت ماخذ بنفسك مقلب كبير..احترامك معدوم من اقرب الناس لك وتبينا نحترم اللي تكتبه؟ واذا تبي تحرضنا على النظام الحاكم بالكويت فتاكل هوى..وأكل هوى وشوار لين تشبع..مع ان احنا فتحنا عيونا وشفنا آل الصباح اهل للحكم والاحترام والطاعة..لكن انت وامثالك مو قادرين تحكمون بيوتكم..ولا احد يحترمكم من القريب منكم..وكثر ما تطيع وتنزل راسك للي قلت عليهم حتى راجو السايق ما يطيعك..وياي تبينا نسمعك وتوجهنا؟ انت تحديدا مثل الباشا اللي بالافلام العربية اللي بنته شاتته وانحاشت مع مدرب الكلاب ..وولده سحب عليه وتزوج الشغالة..وعلى قولة الشاعر: آه يا زمان الردى ما اصعب ودادك مر..الجلب عض الاسد وخلا دموعه تخر..ويا «بو عمر» لا تفرح انت مو اسد..انت اخرك الحلب والصدّ..

• كلمة راس
في جم كاتب هاليومين واحدهم يمدح الثاني واهما كلهم يتيمعون بديوانية واحدة.. يبا فكونا وامدحوا بعض بديوانيتكم.. والا هذي توجيهات الاخ الاكبر اللي قاصين عليه وشافطين بيزاته.. عوير وزوير مالكم حل..

إقرأ المزيد...

بشت الفحم

10/08/2009
في مثل شعبي عندنا يقول «فلان مثل خيشة الفحم لا طاح عليك دمرك ولي طحت عليه دمرك» بس مع الأيام تغير مفهوم هالمثل وصار بشت الفحم مو خيشة الفحم...والسبب ان بعض نواب المجلس وبعض وزراء الحكومة من يلبس واحد منهم البشت تهف نفسه على الاستفادة ..ويحلبون الديره حلاب..تلاقيه العضو بالمجلس اذا تحجى عن المال العام يخليك تبجي وتطق صدر ويمكن تفج ييبك وتلطم على راسك من كلامه وطريقة سرده..شوي والا نفس العضو ماخذ رشوة من تاجر منتهي علشان يضغط عالوزير يمشي مناقصة...


يطلع لك وزير من كثر الشرف والامانة والبراءة اللي على ملامح ويهه.. يخليك تركع ويمكن تسجد له ..وتصريحاته كلها عن حماية الاموال العامة..فجأة والا الوزير نفسه مشارك راعي مكينة التصوير اللي بالوزارة ويحلب النملة...كل هذا يهون لما يطلع لك وكيل ويقول ان الوزارة ستشتري الفين طاولة وكرسي بمواصفات عالمية..يخرب بيت بيتك يعني بالله الطاولة والكرسي اللي بتشتريهم يتحجون انجليزي؟ والا يتصفطون مثلا؟ والا يمكن الكرسي يلحقك اول ما تدش مكتبك ويبوسك؟ وآخرتها يشتري من منطقة الضجيج الفين كرسي الف منهم تالف والفين طاولة بدون ريول... والله يبا الواحد ضاع بهالديرة ما يدري منو اشرف من منو بالجذب...وآنا عن نفسي كنت اعتقد ان بوعبدالعزيز أشرف من الشرف وذمته ذهب خالص..لكن الواقع كشف لي ان بو عبدالعزيز فلم هندي صار له ثلاثين سنة ينعرض علينا...ويمكن سالفة الفحم المكلسن تخلي الواحد يفتر راسه بدون ما يشرب زموتة..ويطير عقله بدون ما يكن زقارة مصرية...الحين عرفت ليش مثل خيشة الفحم صار بشت الفحم..لأن بو عبدالعزيز كثر ما قال عن الدستور والمال العام وكثر ما كانت فايدته عالية من المال العام والدستور...بس ترى بو عبدالعزيز ماله شغل..ولده العود حب يجرب حظه بأمية وخمستعش مليون وانصاد..مثل ما تدرون بو عبدالعزيز لاهي ببشته ما عنده وقت يرتب السالفة..وأكبر دليل انه قدم ستة اسئلة شكلت في ردودها دراسة جدوى لمشروع البشت المكلسن قصدي بشت الفحم..صج شريف

كلمة راس
شيوخة بنتي سألتني بكل براءة..يبا منو بوعبدالعزيز هذا؟ فكان جوابي لها كالتالي: زار صدام فصار غزو..راح قطر صار انقلاب..سوى تكتل فيه عضو مجلس وطني..حط خشمه بالرياضة وقفوا النشاط ..وآخر شي تفرغ حق الكويت فانحاشت التنمية..شيوخة نامت من القهر على مستقبلها..
إقرأ المزيد...

أحمدو وبسّوم.. وبلوتوث تركيا

6/8/2009
بحياتي ما التقيت برجل الدين السيد المهري.. ولا تربطني فيه علاقة قرابة.. مع اني اتشرف بنسبه العريق.. أقرأ تصريحاته حالي حال أي كويتي مهتم بالشأن السياسي وغيره.. واختلف مع الرجل ببعض القضايا الرئيسية.. ودام انه طرح نفسه بالساحة السياسية صار واجب عليه تقبل النقد.. ولا السيد قاصر عن الدفاع عن نفسه والمحامي الاستاذ خالد الشطي ماشالله عليه هاب ريح وصايد خصوم السيد خوش صيدة.. لكن احقاقاً للحق أنا انسان ضد الشخصنة في النقد الا اذا كان لها ما يبررها من أفعال شخصية عامة..


مثلاً بو عمر ينام بالخيمة والكل يدري عنه فما فيها شي اذا قلناله دش البيت ونام بالصالة.. او مثلا بو عبدالعزيز متلون بمواقفه وما يقط البشت عن جتفه فنقول له عدادك افتر دير بالك على مواقفك.. لكن الصفاقة بطرح البعض اهانات ضد السيد والسخرية من وكالة العلماء له وعمامته، هذا شي ما ينسكت عنه.. وجان زين اللي انتقدوا السيد بشكل شخصي خاليين عيوب او أوادم.. احمدو كان سلفي وصار سلفي مودرن وبلوتوث تركيا يشهد انه مودرن وكاتب بو قلمين بامتياز.. وبسوم المطرب السابق اللي تاب وحط لحية وخذا شهادة معظرطه بالاعشاب والجن.. هني الواحد تنبط جبده.. وابشرك يا سيد اذا اتتك مذمة من الهيلق فهي شهادة بأنك أرجل منهم وأفضل منهم بمراحل كبيرة.. اما أحمدو وبسوم فدواهم عندي.. الأول محد يقراله الا ثلاث جنوس وصاحبته السابقة اللي صلت فيه شرق.. وبسوم عقب أغنية علموه كيف يجفو واللوك اليديد باللحية الطويلة وموضوع المطيرجية.. محد يقرا له إلا شمخي اللي رازه على الطل.. وهيك كتّاب ومنتقدين بدهم بوشيخة يمسح فيهم بلاط صاحبة الجلاله ويمرمطهم .. فلا تحزن يا سيد وامسحها بويوهنا ولك مني كل خميس اتفرغ حق هالحشرات الضارة في المجتمع..

• كلمة راس
من المعيب ان تكون مجلة بصبغة دينية في هذا الانحطاط الفكري البعيد عن المهنية.. بس ما عليه الشرهة على وزارة الاعلام اللي قوت شوكتهم.. وابشرك يا رئيس تحريرها ترى بوشيخة اخترق مكتبك وصارت الادلة عنده وانت عارف وانا عارف اللي اقصده.

إقرأ المزيد...

بنغالي مجلس الأمة

5/8/2009
مع انهم قالوا ان اللي كسّر المكاتب والبيبان بالمجلس بنغالي..الا اني اشك انهم تستروا على نائب متخفي بلبس بنغالي.. ما علينا منهم.. لو فرضنا جدلا ان اللي كسر بنغالي.. هذا دليل على ان مجلس الأمة حارة كل من هويتو الو.. والامين العام حاط دوبه ودوب السكرتارية يبيهم يبصمون بالداشة والطالعة.. ليش المجلس عقب سالفة البنغالي العمية يسوى؟ أنا عندي شك ان اسلوب البنغالي بتكسير المكاتب بشكل عشوائي ماله الا تحليلين لا ثالث لهما

الاول انه من خلال دوامه بالمجلس تأثر بأبو عبدالعزيز وشافه انه متشتت بالسياسة وكل يوم له موقف وحب يقلده بس بطريقته الخاصة.. والثاني انه يبي يخالف بوعبدالعزيز اللي دايما يقول وما ينفذ تهديداته الدايخة..فقام ونفذ التكسير والاقتحام قول وفعل.. وبالحالتين البنغالي طلع فيها وكان صادق مع نفسه.. والبنغالي دش بعز النهار وسوا اللي يبيه بدون ما يكون نائب ولا احد يحييه من الحرس.. وبوعبدالعزيز صار له ثلاثين سنة يدش ويطلع على الهبني.. وبما ان وكالة يقولون شغالة.. يقال ان البنغالي حب يوصل رسالة حق الفتى المعجزة لأنه كان له علاقة بالعمال الوافدين.. ويقال ايضا.. ان البنغالي متأثر بمواقف نائب ثالث ايام ثانوية الدوحة وحب يقلده ويكسر البيبان.. بالنهاية البنغالي شارك بالاثارة والتأزيم بطريقته واثبت ان الامين العام وبوعبدالعزيز والفتى المعجزة والنائب الثالث مو خوش مثله..

• كلمة راس
عندي اقتراح حق اخواننا المسرّحين.. روحوا المطار استقبلوا رئيس الوزراء.. وشيلوا لافتةكتبوا عليها.. يبا نبيها منك ومن الحكومة.. لأن المجلس تاجر بقضيتنا وضيّعها.. وتأكدوا ان الحل بيكون أسرع وأفضل.. وصالح الغنام يشهد..

إقرأ المزيد...

عمر غير الشريف

4/8/2009
عمر الشريف الممثل العالمي الله بلاه بلعب القمار فضيع كل بيزاته وقعد على الحديدة...وعمر غير الشريف ممثل سياسي منتهية صلاحيته وكان ربح وزادت ثروته لانه لعب بالقمار السياسي والردح بكل قوته...واذا كان عمر الشريف..قضى عمره بوناسة وتلذذ بحياته وكان شريف مع نفسه وكون له اسم سينمائي..لكن عمر غير الشريف.. مسيرته كلها جذب ونفاق ومسح جوخ ولعب بالكلام ووعود فارغه..


وشوية طرارة مع قليل من قلة الاحترام والحيا...وشريف صفة تبعد عن عمر كما تبعد الوفرة عن خط العبدلي على قولة عنتر الكويتي..وكعادته عمر غير الشريف صاد نفسه في موضوع السيارة اللي احترقت...والظاهر انه كان محتاج سيارة يديدة مو أكثر..وأنا كوني مواطن كويتي اطالب وزير البلدية د.فاضل صفر انه ياخذ سيارة عمر غير الشريف..ويخصص لها مكان مثل ساحة الارادة او بالدروازة..ويحطها كنصب تذكاري شاهد على جذب عمر غير الشريف..علشان كل ما مر عليها كويتي او مقيم على ارض الكويت الحبيبة يعرف تاريخه وهرطقاته وجهبذته المزيفة..يا اخي ستين الف مرة قلنالك يوز اركد..بيتك من زجاج..وراضين انك تحذفنا بصخر..بس اذا بيتك من زجاج قول لي شلون راح تاخذ شاور؟؟راح نشوف عوراتك اللي شفناها بجذبك وزيفك وادعاءاتك..يا اخي بلاش لماضة..بسك جذب وتخرف..سويت روحك بطل وادعيت بوجود حكومة ظل حرقت سيارتك..وطلع الكلام والتقرير غير كلامك..كافي..الشرهة ماهي عليك على اللي مؤمن فيك ويعتقد بصواب رأيك..بس شنسوي مو بيدنا ومن الحب ما قتل والظاهر انك من زود الحب حلت لك نومة الخيمة.

كلمة راس
عمر غير الشريف طايح طيحة هالأيام بأحد الشيوخ..يمكن يبي يتقرب علشان يرتب اموره أكثر بعد ما قضى على اللي نصحهم..حامض على بوزك..هذا الشيخ يقدر على الف واحد مثلك واذا تبي تعرف شوف لقاءه بقناة الجزيرة لما كان عمره 32 سنة يا عمر غير الشريف وغير العفيف.

إقرأ المزيد...