خلاجين النواب

13/1/2010
بعض هالنواب عليهم حركات بايخة، ما ادري ليس لمن اشوف جلسة برلمان او اقرأ عنهم اتذكر افلام المقاولات المصرية، او المسرحيات السخيفة الكوميدية، اللي يحاول الممثل يضحك الجمهور غصب!
بعض النواب مثل هالممثلين يتحول الى مهرج وممثل ومصارع وشريطي، وغصب بيخلي الجمهور يضحك، والجمهور هم غصب يضحك علشان لا يحرج الممثل اللي اختاره، بس هم مايقدر دائما يضحك ويصفق، لان النكت بايخة وقديمة ومكررة!
ممثل ينكت عن الوحدة الوطنية، والوطن، والمواطنة، وهو قبل يومين داش فرعية، وطالع من فرعية، دايس ببطن الوطن، وشايته ولا شوتات عبدالله البلوشي.
وممثل ثاني متخصص في السوالف عن المال العام، والأخ بس يوصل المال العام عند بيته يسكت، ففلان يصير له، ومن الأهل، ومخسر المؤسسة الملايين عادي وحلال، والجمهور عارف وساكت!
وممثل ثالث ذابحنا دستور وقانون، وهو اكثر واحد فالع في هالدستور المسكين، ومشغل الدستور عنده صبي، متى ما يبي يناديه، ولا دايما منومه بالملحق ولا يسأل عنه!
في قضية إسقاط القروض بدل ما النواب يقعدون ويتكلمون ويتناقشون يؤيدون ويعارضون مثل بقية النواب المحترمين في كل العالم، حولوها الى فيلم استعراضي صراخ ونجرة وضحك ومسخرة، يعني بصراحة كان شي يفشل، مع انه المفروض هذولة ناس كبار، ولازم يصيرون قدوة أو «حدوة» على رأي سعيد صالح!
بس الواحد شنو يقول يعني هذي خلاجين سيفوه، والخلاجين في النهاية شنو تبي تطلع بدل «فرساتشي» ولا «أرماني»؟ وفي النهاية سيفوه ينشر غسيله على البلكونة علشان يشوفه اللي يسوى واللي ما يسوى، والسبب طبعا انتخابنا للبعض اللي ما يسوى حتى الخلاجين المعلقة!